Read ejagham 1 Ane korin, echî 14 Bible Online

1 Ane korin, echî 14 - ejagham bible

1 Ane korin, echî 14

¹Deê mân ó nôk ên ó fôn okot. Nok ên fə́ne na ḿbə́ŋé eyəné fép sê Obhasi Ebhare Ntʉgantʉ a karé ên ekəp, títí nji otîp Obhasi ekarám.

²Echî aŋ? Nne nnyo á chorá ka nyum i nték etat, mbâ ane asík á chorá, á chorá a ri mbâ Obhasi, ka nne nnyo á məŋá nji yê á chorá cháŋ. Á chorá a ri ébhə́me Obhasi ka ikom Obhasi Ebhare Ntʉgantʉ.

³Kən nne nnyo á kará otîp Obhasi, á chorá mbâ atem-ane. Nchot eye a kí kak ane ḿbə́ŋé, a yimá akát ábho á sik nsi, a nyáŋá ábho.

⁴Nne nnyo á chorá ka nyum i nték etat, á nyaŋa biji ibhê, kən nnyo á kará otîp Obhasi, á nyaŋa echəme atóbhá Jisos ndə́m.

⁵Ń woma bəre ó chorá ên nyum i nték etat, a ri kə́n n kôt o fôn ên ekəp otîp Obhasi ekarám. Echî aŋ? Nne nnyo á kará otîp Obhasi a fâŋ a chíŋi nne nnyo á chorá ka nyum i nték etat. O kí chot ka nyum i nték etat ta nne a jóe a sə́rá ane echî ejûm nji ó chorá áno, kən nchot eya a nyáŋé echəme atóbhá Jisos ndə́m.

⁶Atem-abhon-í-nnyen, é kó sê ḿ ba mbâ eyəné n dóghe echoróm na ên ka eyum eték nji ó bhó yuk ên, ń nyaŋa ên mân áfo ka jen? Ń ka nyáŋé ên təm ḿ ba na nchot nnyi Obhasi a tóŋe ə̂m, na oməŋá-ejûm, na okpígha-ejûm, na fə́ne otîp mbi Obhasi a karê ə̂m.

⁷Kó ên noŋ egaé. Ájoé kpe iyîm mbi í ká fon ekpin noŋ kpe ibhaŋ mfi nne a kí fi, na kpe ebhú tat gitá, í ró gbo jáé-jáé, nne á bhó məŋé ekpak ekôn nji-nji á súma.

⁸Ájoé abhukpoŋ enok mma á fíi á ká joé jáé, nnyón nne-enok nnyo a kí tʉrí biji enok?

⁹Nâ noŋ fə́ne é rî na ên. Ájoé ó chot ên ka nyum i nték etat nnyi nne á bhó yuk, ane á kí yim nan á mə́ŋe ejûm nji ó chorá ên? Nchot eya a kí tan ka nsi.

¹⁰Nyum i nték a tî otí ka ngun, chénchén fə́ne kpe nji é rô joé na echî cháŋ.

¹¹Kən ń do məŋé echî eyum eték, ń joá áno njéné mbâ nchorá-chórá, yê fə́ne njéné mbâ amé.

¹²Nâ mân ka eji o kí ki ên amə̂t ó fôn ên ekəp nji Obhasi Ebhare Ntʉgantʉ á kará, nok fon ên ekəp nji o kí ko ó nyáŋé echəme atóbhá Jisos ndə́m, é sə́ne.

¹³Ka echî njí mân, nne nnyo á chorá ka nyum eték etat, a goré Obhasi a karé yê ekəp nji a kí kpighâ nchot eye a sə́rá ane.

¹⁴Echî aŋ? Ájoé n kí gorâ Obhasi ka nyum eték etat, ń góra áno na ńtʉgântʉ amé, na íkíkéré ifámé asík.

¹⁵Áji é kí ko ə̂m é jî fan? N di ń góre Obhasi na ńtʉgântʉ amé é kpê na íkíkéré ifámé. N di ń kón ekôn ń káre Obhasi na ńtʉgântʉ amé é kpê na íkíkéré ifámé eróŋ.

¹⁶Ka é rî sê ájoé ó kará Obhasi ekûp na ejík ka ńtʉgântʉ eya ńnyə́ne-nnyənê, nne ka echəme áji a kí yim nan a chot se, “É rî áno” nji á ka yuk ekûp nji o karê Obhasi? Kpe ekpak á məŋá ejûm nji ó chorá cháŋ.

¹⁷Ebhú tat ó kare Obhasi ekûp nono, kən é ká nyaŋe ntem owa, ka á ka yúk.

¹⁸N kí kup Obhasi nji a karê ə̂m ekəp ń chot nyum i nték ń chiŋi ên chénchén.

¹⁹Kən kpe noŋ é rî áno, kən ń joé ka echəme atóbhá Jisos, é rî nono ájoé ń chot achî-achot árôn ka eyum í eték nji ane á kí yuk á kpí, na nji ń chôt nchot ofú ndə́m, nyúghá cháŋ.

²⁰Atem-abhon-í-nnyen, ka kpó fon ên íkíkéré noŋ abhonche. Joê ên noŋ abhonche mba obhí á ká məŋé, kən ka íkíkéré deê ó tóŋé ên sê ó kui ên.

²¹Á séŋe ka nwet Obhasi se, “Ńtâ Obhasi a chorê se, N kí tum ane mba á chóra nyum i nték etat á bhá kpí ane abhámé achot. A ri nyum i nték ajéné nâ n kí ko n chorá nchot, kən ane abhámé á bhó ki echî.”

²²Nâ é fap sê echoróm ka nyum i nték etat a ri eriŋ ane mba á ká ki ḿbə́ŋé na Jisos, nji ane mba á kíi asík. Okará-otîp Obhasi a ri eriŋ ane mba á kíi ḿbə́ŋé na Jisos, nji mba á ká ki asík.

²³É kó mân sê ane Obhasi á chəme á kí chot a ri ka nyum i nték nnyi ane á bhó yuk, njéné na kpe ebhú tat nne nnyo á ka kí ḿbə́ŋé na Jisos á gye ka eji echəme njí, á bhó səre se ane mbá á kí gbe ekí a?

²⁴Kən ájoé ane chénchén ka echəme njí á kí karé otîp Obhasi, nne á gyek áno nnyo á ka kí ḿbə́ŋé na Jisos na kpe ebhú tat njéné, otîp mbí á kára áno ó kí yim nne nnyó a məŋé obhí obhê.

²⁵Otîp mbí ó kí ko íkíkéré ḿbə́ŋé nne nnyó ó tûp jáé. É kí yim nne nnyó mân a tə̂m achî-arúŋ ka nsi a káre ejík mbâ Obhasi. A kâm se, “Ka etʉri, Obhasi a ri áfo na ên.”

²⁶Atem-abhon-í-nnyen, ńgyê ejûm nji o fonê ên ka eyimím ebhú ó chəmé ên ka echəme ejə́né. Ó chəmé ên, nne yót a kí fon ekôn Obhasi, nnyo tat okpígha-ejûm, nnyo tat nchot nnyi Obhasi a tóŋe yê, nnyo tat nchot ka eyum í nték etî-etî, nnyo tat a kí səre nji á chorá ka eyum í nték etat. Chénchén mbí é yimá nná sê á nyáŋé atem.

²⁷Ane á joé ka ekam ejə́né mba á chóra ka nyum i nték, ebhú tat ábháe kən á kâ chíŋi ásá, deê á chorá á fará ofaré. Deê fə́ne nne a joé nnyo a kí kpighâ achot ábho a sə́rá ane.

²⁸Kən ájoé nne nnyo a kí kpighi cháŋ, deê ntʉ́ghi ane mbá á kə́t nyamḿ á kâ chôt kpe ejûm. Á kot, deê á chorá mbâ Obhasi ka ḿbə́ŋé.

²⁹Ane mba á kára otîp Obhasi á joé á rî, deê ábháe kpe ásá á káre otîp ábho, mba ngá fə́ne deê á gaá nchot ábho á yena ájoé a ri ka echî.

³⁰Ebhú tat, Obhasi a tóŋe nchot mbâ nne nnyo a kun okun ka echəme, á ruí ngyím a kí chot, deê nnyo á chorá áno ndaŋa-mbá a kumí nyamḿ.

³¹Karê ên otîp Obhasi áno yót na yót, tîk ane chénchén á kpí aron á fôn ḿbə́ŋé.

³²Ane mba Obhasi a karê ábho ekəp nji otîp obhê ekarám, deê á mə́ŋe ekpak á kí fi ekəp njí.

³³Echî aŋ? Obhasi á ka bhiŋ êt se é bhá na anyôp, kən a bhiŋî êt se é chúi ochuí. Nâ erû nji bichəme atóbhá Jisos chénchén á fíi.

³⁴Ane-akáé á kâ yîm ejok ka echəme atóbhá Jisos. Á ka fon ka echoróm kpe ejûm ekpak ebhín ane Jus é fíi. Ane-akáé á ká fon ka egyímím ochî.

³⁵Nne-nkáé á fon kpe ebhə̂p, deê a chik, á si njû, a bhə́p ndûm owe. A ri ejûm ísonê ájoé nne-nkáé á joé a kará ejok ka echəme atóbhá Jisos.

³⁶Ó kera ên tîk sê nchot Obhasi a róghe a ri mbâ eyəné? Ó kera ên sê təm ên nâ o fonê ên nchot Obhasi a?

³⁷Nne mân nnyo á kere se yê a ri nkara-otîp Obhasi, yê a fôn ekəp Obhasi etat, a ri a yén se nji n séŋe nná mfá a ri ebhín nji Ńtâ Obhasi a karê.

³⁸Nne á ka yúk nji ń seŋa nná, ka yúk ên yê fə́ne.

³⁹Atem-abhon-í-nnyen, nâ kî ên mân ḿbə́ŋé eyəné ka ekarám otîp Obhasi. Ń ka to bəre nne nnyo á fon ekəp nji a kí chot ka nyum i nték etat a kâ chôt.

⁴⁰Kən kpe bhaghé ejûm é nóbhe sê á yîm nono ka nnyen-i-mbá.