Read ejagham 1 Ane korin, echî 15 Bible Online

1 Ane korin, echî 15 - ejagham bible

1 Ane korin, echî 15

¹Atem-abhon-í-nnyen, eê ń tît ên nchot otîp ogyebhá-ḿbə́ŋé Obhasi mbi n sə́re ên nná. Ta o kâm ên na otîp mbí, o gyími ên na ḿbə́ne o jak ên ochî.

²Ḿbə́ne nâ ó kí yim ên ó sém ájoé ó fi ên ka ekpak n sə́re ên. Áno asík, nâ ḿbə́ŋé eyəné nnyi o kíi ên a ri chichi.

³Mfoné-mfoné ndûm ejûm nji n sə́re ên ka ekpak á sə́re ə̂m fə́ne a ri se: ka ekpak á séŋe ka nwet Obhasi, Jisos Krayis a kpóe ka echî ejə́ré.

⁴Ka ekpak á séŋe fə́ne, á kə̂n yê, kən ka osúí mfín ésá a nyə́me ka ekʉ̂.

⁵Nji a nyəmê ka ekʉ̂, a fâp Pita nnyo ḿgbán owe yót ka ochî. Kən a bhâ fâp mân ka ochî chénchén ábho ófó na ábháe.

⁶A bhâ fâp mân ka ochî ane mba á tóbha yê, ábho á chíŋi ntem-esam njəm nsam érôn (500). Etî-etî ábho á nyə́ne á ká kpo, kən etʉ̂ á kpo.

⁷A fâp Jems ka ochî, a kpô fáp fə́ne ka ochî ágbán abhê chénchén.

⁸Ka nsígha-njəm mân, a fâp ka ochî obhámé nnyo kə́n ń ka bhik obhik.

⁹Echî aŋ? Ka ágbán abhê fép, mme nâ n di mbá-njəm. Ń ka bhik obhik nji á kí bhiŋ ə̂m sê ḿgbán owe, ka mme nâ ń kará nná ane echəme ejê ekpatə́m oseŋe.

¹⁰Kən ka onobhá-eji Obhasi ń chəbhe áno ekpak í nne nnyó égyé. Onobhá-eji obhê mbi a tóŋe ə̂m ó ká tan ka chichi. Kən n yîm etûm n chíŋi ágbán mba ngá chénchén. Ń tô bəre mme asík, kən a ri onobhá-eji Obhasi mbi a tóŋe ə̂m nâ ó yími ə̂m n yîm etûm na ikom.

¹¹Kən kpe é rî a ri mme, kpe a ri ágbán mba tat, otîp ogyebhá-ḿbə́ŋé mbi Jisos Krayis mbi bhə́t nâ é səra nná. Ḿbə́ne nâ ên ó kam ên áno.

¹²Ájoé á kí səre ane sê Jisos Krayis a nyə́me ka ekʉ̂, etʉ̂ ên o kí yim ên mân nan o sə́rá ên sê enyəmə́m ka ekʉ̂ cháŋ?

¹³Enyəmə́m ka ekʉ̂ é ro joé, nâ fə́ne Jisos Krayis á ka nyəmé ka ekʉ̂.

¹⁴Ájoé Obhasi á ka yim yê a nyəmé ka ekʉ̂, nâ é ka fon ejûm nji e kí kpi ane. Ḿbə́ŋé eyəré fə́ne nnyi e kíi na yê á kí tan ka chichi.

¹⁵É joé ka etʉri sê nne á bhó nyəmé ka ekʉ̂, kən êt e kí səre sê Obhasi a yîm Jisos Krayis a nyə́me ka ekʉ̂, áfo é səra áno áfúbhí e kpek na Obhasi.

¹⁶É joé sê nne á bhó nyəmé ka ekʉ̂, nâ á ká yim fə́ne yê a nyəmé ka ekʉ̂.

¹⁷Ájoé á ká yim yê a nyə́me ka ekʉ̂, nâ ḿbə́ŋé nnyi o kíi ên na yê a ri eriri, o nyə́ne ên ka obhí obhə́né.

¹⁸Nâ fə́ne ane mba á kíi ḿbə́ŋé na yê kən á kpó, é tan ábho.

¹⁹Ájoé ḿbə́ŋé nnyi e kíi na yê a nyáŋe êt ka ekpin ejə́ré ka ngun nnyí ńnyə́ne-nnyənê é bhó ji ochî, nâ e ri nji ane ngun á rî êt nsôn á chíŋi kpe bhaghé énê.

²⁰Kən nji é rî ka etʉri é rî sê, Obhasi a yîm Jisos Krayis a nyə́me ka ekʉ̂. Yê nâ a ri ndaŋa-mbá nne nnyo a nyəmê ka ekʉ̂, ka chénchén mba á kpóe.

²¹Noŋ nne yót, Adam, nâ a bháe na ekʉ̂, nâ echî fə́ne nji nne yót a bháe na enyəmə́m ka ekʉ̂.

²²Ka obhô ochəma-biji na Adam, ane chénchén á kí kpo, nâ noŋ fə́ne kpe nnyón nne a kí nyəmé ka ekʉ̂ ka obhô ochəma-biji na Jisos Krayis.

²³Kən enyəmə́m njí ka ekʉ̂ é kí fap ntə̂m ébháe. Jisos Krayis nâ a ri ndaŋa-mbá nne ka enyəmə́m ka ekʉ̂. Ebhú a kə́ bha, ane abhê eróŋ á kí nyəmé noŋ yê.

²⁴Nâ ebhú mân ntə̂m i ngun a sî, nji Jisos Krayis á kpo jeghé obhíbhí chénchén otúi na chénchén ikom eték na ikom kpe mfə́n, a kô mân otúi obhê a fê mbâ Obhasi Ńsé owe.

²⁵Echî é rî sê a ri Jisos Krayis nâ a kí fi otúi ta Obhasi a yîm ane-ebhan abhê ekígha-akát obhê.

²⁶Ekʉ̂ nâ a ri ntə́ma-ndə́p nne-ebhan nnyo á rî á bhíbhí.

²⁷Á séŋe sê, “Obhasi a kî chénchén iyîm ka óséré obhê.” Á to sê chénchén ejûm é chə́bhe ka óséré Jisos Krayis, á ká səre sê Obhasi eróŋ a ri, ka a ri Obhasi nâ a yimî se chénchén iyîm mbí í jóe ka óséré obhê.

²⁸Echî aŋ? Se nji á kí iyîm chénchén ka óséré Jisos Krayis, yê mân ka Mmon a kí ki biji ibhê ka oséré Obhasi nnyo a kíi iyîm chénchén ka óséré obhê. Nâ ebhú mân nji Obhasi a kí joé Ntûfâm iyîm chénchén.

²⁹Ájoé nchot nnyí cháŋ ka echî, jen kən ane á fúgha ayép ka obhiŋ ane mba á kpóe? Ájoé ane mba á kpóe nná á bhó nyəmé ka ekʉ̂, echî nji ane á fúgha ayép ka obhiŋ ábho a ri jen?

³⁰Echî oseŋe obhə́ré mân kpe bhaghé ebhú a ri jen?

³¹Atem-abhon-í-nnyen, n kí səre ên bəre kpe sê ekʉ̂ ń ka chaé mbá-njəm kpe ka ofú bhə́t. Nâ noŋ fə́ne ń gyebhá áno ḿbə́ŋé ka echî ejə́né ka nji ó chəme ên na Jisos Krayis nnyo a ri Ntûfâm owəré.

³²Ebhú n di ka Efesus, achot mma á tə́ma ə̂m, é rî noŋ kpe nne á noghá na onyam obhí. Ájoé Obhasi á bhó sʉghâ ane ka ekʉ̂, echî ń kará ə̂m biji oseŋe a ri jen? Ájoé nne á kpo nâ a kpô, kə́n ń səra ên mfá-mfá bəre, “Atem-abhon-í-nnyen, é dí ên, é gwó ên, ka ójô e kí kpo.”

³³Ka kâm ên mân ane á ríri ên. Məŋê ên sê ó chəm ekam na nnyágha-ejʉ̂, o jʉ̂ ejʉ̂.

³⁴Deê ó fôn ên íkíkéré ino, maghê ên obhí. A ri ekpatə́m echî eyúbhúm nji etʉ̂ ejə́né ó ka məŋé ên Obhasi.

³⁵Etʉ̂ ejə́né, tîk o bhə̂p ên sê, “É kí yim nan nne a kpô okpó a chə́bhe njəm ka ekpin. Biji ntʉ́ghi mbə́n nâ a kí fon?”

³⁶Nne nnyo á bhəp ntʉ́ghi ebhə̂p njí, á nəma onə́mé. Kpe édî nji o kí bhe o kâk ka nsi é bhó dʉ ta é kpô kpá.

³⁷Mməghe-ejûm nnyi o bheê, kpe a ri nkʉi, kpe a ri ejûm etat, á bhó joé ekan noŋ ebhú á dʉ̂ odʉ.

³⁸Obhasi nâ á kará ńnyə́ne biji ka ekpak é kóre yê. Á kará fə́ne biji mbí ka ńgyímí, ka ńgyímí.

³⁹Echî aŋ? Ngu fə́ne a ri ka ńgyímí, ka ńgyímí. Nnyi nne egyê, nnyi onyam egyê, nnyi nnón egyê, nnyi osí fə́ne egyê.

⁴⁰Iyîm ósô í rî ka mbi ábho biji, mbi nsi ka mbi ábho. Ono iyîm ósô egyê, mbi iyîm í ngun fə́ne egyê.

⁴¹Ebhát í njúí é rî egyê, nji nnyam-ósô egyê, nji ńdʉnândʉ-ósô egyê. Kən ńdʉnândʉ a ri ka mkpak ka mkpak, ebhát ábho é rî áno ka ńgyímí ka ńgyímí.

⁴²Nâ noŋ fə́ne é rî na biji nne nnyo a nyəmê ka ekʉ̂. Biji nne í rî áno noŋ ejûm nji o kí bhe. Ó səm, o kâk ka nsi, í kí cha. Kən Obhasi á yim yê a chəbhé njəm ka ekpin, biji í bhó kpo cha.

⁴³Á kən nne, biji ibhê í ro kpó joé nono, í ká kpo fon ikom. Kən á kpo yim yê a nyə́me ka ekʉ̂, biji í chəbhe í nobhá, í chəbhe na ikom.

⁴⁴Á kən nne í rî a ri iyîm í ngun, kən nne á kpo nyəmé ka ekʉ̂, a chə́bhe ńgô na Obhasi. Ájoé nne a fôn biji ngá ka ókpú, nâ a fôn fə́ne ńtʉgântʉ.

⁴⁵Á séŋe sê, “Ndaŋa-mbá nne nnyo Obhasi a yimî ka nsi, Adam, a bhâ fôn ekpin.” Kən Adam nnyo a kpô bhá ka nsígha-njəm a ri Jisos. Yê nâ a ri ńtʉgântʉ nnyo á kará ekpin.

⁴⁶Ntʉgantʉ asík nâ a raŋê mbá a bhák, a ri biji. Kən Ntʉgantʉ a kə́ bha mân nsígha-njəm.

⁴⁷Ndaŋa-mbá nne a dʉ ka ngun, a ri ekpək í nsi. Kən nnyo ngá nnyo a bháe a dʉ mbâ Obhasi.

⁴⁸Ane ngun á rî áno noŋ nne nnyo ndaŋa-mbá ányo. Kən ane mba á dʉ̂ mbâ Obhasi á tóŋa êt ekpak nji nne nnyo a dʉ mbâ Obhasi a ri.

⁴⁹Mfá-mfá njí e ri áno noŋ nne nnyo Obhasi a kóe otop a yîm. Ofú bhə́t e kí joé noŋ nne nnyo a dʉ mbâ Obhasi.

⁵⁰Atem-abhon-í-nnyen, deê ń sə́ré ên bəre ngu-biji na agyʉ́ŋ í bhó joé ka otúi Obhasi. Ejûm nji é kí cha fə́ne é bhó joé na nji é bhó cha.

⁵¹Yûk ên, mme ń sə́ré ên mô nchot ebhə̂t. É bhó kpo ên chénchén, kən e ri é yóŋé ên chénchén.

⁵²E kí yoŋe gbantə́m, ntə̂m yə́t ka ebhú nji ntə́ma-ndə́p abhukpoŋ á kí gbo. É kí joé nan? Á kí fi abhukpoŋ, ane mba á kpóe á kí nyəmé á fôn biji mbi í ro chá. Ka ebhú áji nâ êt chénchén e kí yoŋe ka biji.

⁵³Biji ibhə́ré mbí, mbi í kí cha nná, í rî í kpíghí í chə́bhe mbi í bhó cha. Ejûm nji é kí kpo é kí chəbhé nji é bhó kpo.

⁵⁴Ebhú mbi í kí cha, í chəbhé mbi í bhó cha, na nji é kí kpo, é chə́bhe nji é bhó kpo, mma á séŋe mân ka nwet á kí fap ka ekpak á séŋe sê, “Obhasi a yúi erʉk ekʉ̂, a jéghe otóŋé érûm ejê.”

⁵⁵“Ekʉ̂, érûm ejâ é rî fan, ikom mfi ó seŋá nne, í ji fan?”

⁵⁶A ri ka obhô obhí nâ ekʉ̂ a fonê ikom mfi a kí yim nne ejûm. Ikom obhí ngá í dʉ̂ ka ebhín Obhasi.

⁵⁷Kən deê é kúp Obhasi ka obhô Ńtâ Jisos Krayis nnyo á yimá êt e foná érûm ka enok ejə́ré na obhí.

⁵⁸Atem í ḿbə́ŋé, nâ kumí ên nyamḿ, nne a kâ fûp kpe ejûm. Fiî ên ka etûm í Ńtâ Jisos, o məŋá ên a ri sê etûm nji ó yimá ên mbâ Ńtâ Jisos, é bhó tan ka chichi.