Read ejagham 1 Ane korin, echî 16 Bible Online

1 Ane korin, echî 16 - ejagham bible

1 Ane korin, echî 16

¹Atem-abhon-í-nnyen, ka nchot ntí etúbhúm mmi sê ó kó ên ó nyáŋé atem-abhon-í-nnyen ka Jerusarem, deê ó yîm fə́ne ka ekpak nji n sə́re bichəme atóbhá Jisos ka Garasiya bəre á yîm.

²N sə́re ábho bəre ka ofú efîn Obhasi, deê kpe nnyón nne owəné a kí mô ejûm ka mkpe, ka ekpak obhô obhê o síi. Ńji tîk é yîm ebhú ḿ ba, tîk ó ro kpó yui ên biji se á túp ntí.

³Ḿ ba, n kí seŋ nwet n káre na ane mba ên áfoné o sáŋe, á kô bikəp ibhə́né á jak nnyi Jerusarem.

⁴Ájoé ń kere bəre ń jî eróŋ nnyi Jerusarem, tîk m kpére n jak na ábho.

⁵Tîk m bák ḿ bá yén ên ebhú ń ji nnyi Masedoniya. Ń woma bəre ń chíŋ nnyi Masedoniya.

⁶Ebhú tat tîk n kúmi na ên tata mfín ekók a mân. Tîk o nyáŋe ên ə̂m mân ka ejen ejámé, mbá-mbá n kí ji.

⁷Ń ka wóm ḿ fú ejen ofú mbâ eyəné, kən ń woma bəre Ńtâ Jisos a kam ń ká mô ebhú a rap na ên.

⁸Kən tîk n kâ ka Efesus ta erom í Pentekos é sî.

⁹Echî aŋ? Obhasi a rə́bhe ə̂m mbá se ń yîm etûm áfo ekəp é jóe kpe noŋ ane etî-etî á nógha áno sê á gbʉ́í ə̂m.

¹⁰Ájoé Timoti a bhâ kpúghi ên áfo, yîm ên yê ejûm nji é kí gyebhé yê ka ḿbə́ŋé. Echî aŋ? Yê a kí yim fə́ne etûm í Ńtâ Obhasi noŋ mme.

¹¹Deê nne kpe yót a kâ kêp yê ńgô chichi, kən kak ên yê obhô a tʉrí biji ejen ejê a bhá kpúghi ə̂m na ogyebhá-ḿbə́ŋé. E ri ngá, mme na atem-abhon-í-nnyen chénchén, e chighá yê.

¹²Mbâ Aporos áfo nnyo ntem-mmon-i-nnyen owəré fə́ne, ń nok bəre ń sə́ré yê a bhá ágo na atem-abhon-í-nnyen mba á kə́ bha ágo, kən a nyə́ne á ka məŋé kpá ájoé yê a bhá mfá-mfá. Kən ebhú-ebhú á fon ebhə̂k, tîk a bhák.

¹³Kó ên ebhú, joé ên tə́mé-tə́mé ka ḿbə́ŋé nnyi o kíi ên na Jisos, nne a kâ fôn efup, fiî ên son-son ka nchot Obhasi.

¹⁴Deê kpe njə́n ejûm nji o kí yim ên, ó yîm ên ka okot.

¹⁵Atem-abhon-í-nnyen, ó məŋe ên sê ndə́p-i-njû Stefanas nâ á rî ndaŋa-mbá ane ka eték Akaya mba á yúŋi ḿbə́ŋé á kî na Jisos Krayis. Á kare fə́ne biji ábho ka etûm sê á nyáŋé ane Obhasi. N kí goré ên, atem-abhon-í-nnyen, bəre

¹⁶nji ane mbá á rî áno ochî, tôp ên ábho. Tôp ên fə́ne ágbán ábho na ane chénchén mba á yíma etûm na ábho.

¹⁷É gyebhe ə̂m kpe-eji nji Stefanas na Fotunatus na Akayiku á bháe, nji ên cháŋ, ábho á rî.

¹⁸Ábho mbá á yîm ḿbə́ŋé a chə́bhe ə̂m jáé-jáé noŋ á yîm ên. Ka chághe ên ache na ntʉ́ghi ane mbá.

¹⁹Ane bichəme atóbhá Jisos ka ebhat Esiya á kí tum ên ekûp. Akira na Prisiriya é kpê na echəme atóbhá Jisos ka njû ábho á kí tum ên ekûp í ḿbə́ŋé ka mbiŋ i Ńtâ Jisos.

²⁰Chénchén atem-abhon-í-nnyen ngá á kí tûm ên ekûp. Kûp ên atem-abhon-í-nnyen ágo ka echî ka echî, o tamá ên ábho ngaŋ ka mbiŋ Obhasi.

²¹Ekûp nji mme ḿfoné, mme Pol, nâ n séŋe na obhámé obhô.

²²Nne kpe nnyón nnyo á ka fon okot na Ńtâ Jisos Krayis, deê é bhíp ntʉ́ghi nne ányo. Deê Ńtâ Jisos a bhá.

²³Deê Ńtâ Jisos a tóŋé ên onobhá-eji.

²⁴Deê okot obhámé ó jóe na ên chénchén ka mbiŋ i Jisos Krayis. Áno.