Read ejagham 1 Ane korin, echî 3 Bible Online

1 Ane korin, echî 3 - ejagham bible

1 Ane korin, echî 3

¹Atem-abhon-í-nnyen, ka etʉri, ebhú n di ágo na ên, ń ka chot na ên noŋ ane mba á fon Obhasi Ebhare Ntʉgantʉ. Kən n chorê na ên noŋ ane mba á nyə́ne ka ekpin í ngun nnyí. Echî aŋ? O nyə́ne ên noŋ abhóné ka nchot i Jisos Krayis.

²Achot mma m kpíi ên á rî noŋ abhê mma mmonche á yabhá nná, á ká son noŋ mfoné édî nji ngá, ka ó ka bhik ên ebhú áji. Kpe mfá-mfá, ó ka bhik ên.

³Echî aŋ? O nyə́ne ên noŋ ane ngun nnyí. Ó kigha ên atem amə̂t, o kpóŋá ên na atem. Ájoé o nyə́ne o yimá ên iyîm mbí, to é tóŋe sê o nyə́ne ên áno ane ngun, o foná ekpin ka ekpak ane ngun á wóme.

⁴Ájoé etʉ̂ ane abhə́né á kí chorâ sê ábho á tóbha ə̂m, etʉ̂ sê ábho á tóbha Aporos, nâ o nyə́ne ên áno ane ngun nnyí.

⁵Mme Pol nâ énê kpá títí? Aporos nâ énê? Êt a ri ágbán mba Obhasi a túmi se é bhá nyáŋé ên ó kí ên ḿbə́ŋé na Jisos Krayis. Obhasi a káre kpe énê owəré ejê etûm nji a kí yim.

⁶Mme n di noŋ nne nnyo a bheê iyîm obhe. Aporos a fúghá ayép ka ḿbə́ne se í kúí. Kən a ri Obhasi nâ a yimî ḿbə́ne í kí kui.

⁷Nâ é fap sê nnyo a bheê iyîm na yê nnyo á fugha ayép se í kúí, á ká fap kpe ejûm. A ri Obhasi nnyo a yimî ḿbə́ne í kúí nâ a chíŋi ochíŋ.

⁸Yê nnyo a bheê obhe na nnyo á fugha ayép ka iyîm, echî etûm ábho a ri jə́t. Á kí fon fə́ne ekəp ábho ka ekpak etûm nji á yími.

⁹Êt a ri atem-ane etûm Obhasi, ên o ri noŋ ebhin ejê. Ên fə́ne o ri noŋ njû eye.

¹⁰Ka onobhá-eji mbi Obhasi a tóŋe ə̂m, noŋ fə́ne mgbegha-njû nnyo a məŋê etûm ejê, ń dene eróghá-ndə́p í njû, ane mba tat á kí gbe. Kən deê nne a kó ebhú ka ekpak á gbek.

¹¹Echî aŋ? Ekpak í ndə́p etat kpó cháŋ nnyi nne a kí rene é chíŋi Jisos Krayis.

¹²Nâ kpe énê nnyo a kí gbe njû nnyi á róghe nná, nâ a korê se yê a kí ko gûl a gbe, na kpe sírbha, na kpe ánoê atáé, na kpe átí, na kpe ájé-etə́m, na kpe átí-nkʉi, nchot cháŋ.

¹³Kən a ri ofú ó kə́ bha mbi etûm-etûm nji nne a yimî é kí toŋe jáé, ka á kí toŋe ńjə́ne a ri na ngûn. Ngûn mmí nâ ń kí gaé ntûm nnyí é mə́ŋe ekpak etûm nji kpe énê a yimî.

¹⁴Ájoé á gaé ntûm chénchén nnyi nne a yimî ka njû nnyí na ngûn, nji é ká rik, nne ányo a kí fon ekəp.

¹⁵Kən nji é rik, é kí tan yê, kən a kí sem noŋ a séme ngûn.

¹⁶Məŋê ên mân sê o ri ên áno noŋ ókʉ́rí achot Obhasi, Ebhare Ntʉgantʉ owe fə́ne a ri ka ekam ejə́né.

¹⁷Məŋê ên sê kpe énê nnyo á bhibhi ókʉ́rí achot Obhasi, Obhasi a kí bhibhi yê fə́ne. Echî aŋ? Ókʉ́rí achot Obhasi ó ká fon akôp. Ên nâ o ri ên ókʉ́rí achot Obhasi.

¹⁸Nne a kâ ríri biji. A kâ kô erû ngun a kére se yê a mə́ŋe ejûm. Deê a kam énə́mé nne, tîk a fôn mân mfoné-mfoné oməŋá-ejûm.

¹⁹Ń chorá áno ka oməŋá-ejûm í ngun nnyí, a ri énə́mé ka ochî Obhasi. Á séŋe sê, “Obhasi á fik mməŋa-ejûm ka oka obhê.”

²⁰Á kpô séŋ fə́ne sê, “Ńtâ Obhasi a mə́ŋe se íkíkéré aməŋá-ejûm a ri chichi.”

²¹Nâ deê nne a kâ yûŋ biji ka iyîm mbi ane ngun á yim. Ka etʉri, chénchén iyîm í rî í káre ên.

²²Pol na Aporos na Pita na ngun nnyí na ekpin na ekʉ̂, égyé na ójô, chénchén a ri ibhə́né.

²³Ên áfoné o ri ó káre ên Jisos Krayis. Jisos Krayis fə́ne ngá a ri a káre Obhasi.