Read ejagham 1 Ane korin, echî 4 Bible Online

1 Ane korin, echî 4 - ejagham bible

1 Ane korin, echî 4

¹Deê ane á mə́ŋe mân sê êt a ri ágbán í Jisos Krayis. Obhasi a káre ébhə́me ejê ka obhô obhə́ré.

²Ḿgbán kpe nnyón nnyo ńsé a karê yê ejûm a fi, a ri a tóŋé ekpin nji ńsé á bhó fon efup na yê.

³Ájoé ên, na kpe a ri esup, á kí taŋ ə̂m, ń ka fon ebhú. Kən mme ḿfoné, ḿ bó taŋ biji.

⁴Ḿbə́ŋé amé á bhó səre ə̂m se ń yim obhí. Kən ńji é ká fap sê ebhú tat ń ka fon obhí. Ńtâ Jisos átíŋ nâ a kí taŋ ə̂m.

⁵Nâ ka bhíbhí ên nne kpe yót esup kən ebhú é sí. Chik ên tata Ńtâ Jisos Krayis a bhá. Yê nnyo a kí ko achot chénchén mma á rî mfá-mfá ka ejírim, a tûp jáé. Ejûm nji nne á woma a yîm ka ḿbə́ŋé, yê a kí tup ńjə́ne jáé. Nâ ebhú mân nji Obhasi a kí kat kpe énê nnyo á bhíghi ekarám.

⁶Atem-abhon-í-nnyen, achot mmá chénchén n chorê áno m kpê na biji ibhámé na Aporos ka onono obhə́né. Bəre ó kpí ên mbâ eyəré echî nchot nnyi á chóre sê, “Yim ejûm ekpak ebhín é fíi.” Tîk é dʉ̂ mân áfo nne owəné kpe yót á bhó kep se ńnyô nne nâ a chíŋi obhô, ńnyo á ka fáp kpe ejûm.

⁷We nnyo o kí kere se we ó chiŋi ochíŋ, o fábhe kpá jen? Bhaghé ejûm ejâ nji o fonê nji Obhasi asík a karê wâ? Ájoé mân á káre wâ okaré, ó yuŋá biji jen ka ejûm ekəp?

⁸Ó kera ên sê ta ó fon chénchén nji o wóme ên a? Ta ó gbo ên efaŋ ka achot Obhasi, ó chəbhe ên noŋ atúi-ofâm a? Kən êt e nyə́ne é ka gbo kpá atúi-ofâm noŋ ên. Kə́n n kôt bəre ó jóe ên atúi-ofâm ka etʉri, é kumá na ên ka ekumi otúi.

⁹Kən êt ágbán í Jisos Krayis, é rî ə̂m bəre Obhasi a kô ane chénchén, a mághe êt njəm. E ri noŋ ane mba esup é bhip ábho, á kí ko ábho á jí yúí, ngun á yena. Ka amə̂t atem-ane é kpê na baénjel, é chəbhe noŋ ane oseŋe etat ńgô, mba kpe á ká bhik obhik.

¹⁰É chəbhe ánə́mé ane ka amə̂t í ngun ka obhô nchot i Jisos Krayis. Kən ên, sê ên a ri aməŋá-ejûm mba á chəm na Jisos Krayis. Ên sê ngyím eyəné a sôn, kən eyəré á ka son. Ane á chəbhe á kará ên ejík, kən êt á yíra oyírí.

¹¹Ta é si égyé, nji e kí di é ka fon, nji gwóóm é ka fon, nji kaghám é ka fon. Ane á kára êt onyʉk, eji ekâ é ka fon.

¹²Kən é fôn é dí, é gbura nyúbhí êt áfoné. Ngun á tu êt, é gorá a ri Obhasi sê a karé ábho enare. Á karé êt oseŋe, e kí kəp ḿbə́ŋé.

¹³Ane á chot achot abhí á kpe na êt, é toŋa ábho a ri onobhá-eji. É chəbhe na égyé-égyê ka amə̂t í ngun noŋ átép mma ane á bhúma ńgô ka ésámé. Êt é chəbhe mfoné-mfoné ane ndoŋ ka amə̂t í ngun.

¹⁴Ń ka seŋ achot mmá chénchén bəre ń káre ên ísonê, kən ń seŋa bəre ń tá ên etí. Echî aŋ? Ên o ri noŋ abhon okot abhámé.

¹⁵Kpe noŋ o fonê ên áno ane á ti mba á kí kpi ên nchot i Jisos Krayis, ńsé owəné ka achot mmá a ri yót átíŋ. Mme nâ n di ńsé nchane nnyo e chəmê nná e chə́bhe nne yót na Jisos Krayis. Nâ ka ebhú n daŋê nná mbá n sə́re ên otîp ogyebhá-ḿbə́ŋé Obhasi.

¹⁶Ka obhô mbí, n kí goré ên bəre ó gyébhe ên erû ejámé.

¹⁷Nâ ńjə́ne n túmi ên Timoti nnyo mmon omé ka nchot Obhasi. N korê yê kpe-eji. Ń ka fon efup na ekpin ejê. N túmi yê bəre a bhá tit ên ekpak ekpin nji m fiî ka nchot i Jisos Krayis. Nji-nji ḿ kpi ên, nâ mme ḿ kpik chénchén ane echəme atóbhá Jisos, kpe á rî fan.

¹⁸Etʉ̂ ên ó chəbhe o yuŋá ên biji. O kí kere ebhú tat sê ń do bhá ágo.

¹⁹Kən Ńtâ Obhasi á kam, n kə́ bha mkpât ebhú. Ebhú ḿ ba, tîk n yên, mme ḿfoné, ejûm nji ayuŋá-biji mbá kə́n á yîm. É kâ jóe ka ejʉ́ŋʉ́m ka nnyo-ńnyô ámi.

²⁰Ń chorá áno mbí chénchén, ka otúi Obhasi cháŋ ka nnyo-ńnyô, a ri ikom.

²¹Njə́n nji o korê ên? Ḿ gbút íkpá ḿ bá tə̂m ên otəm, kən ḿ mághe ofúbhá-ḿbə́ŋé ḿ bá tóŋé ên bəre ń kot ên ka etʉri?