Read ejagham 1 Ane korin, echî 7 Bible Online

1 Ane korin, echî 7 - ejagham bible

1 Ane korin, echî 7

¹Deê ń támé bibhə̂p ibhə́né ka nwet nnyi o séŋe ên mbâ amé. Nne á to se yê á bhó gye ka nchot ebháé, é ká bhip.

²Kən ka obhô achot enuŋ akôp á kí kpo tighâ á chiŋa, deê kpe nnyón nne-ndûm a kó owe nkáé, nne-nkáé a kó owe ndûm.

³Deê nne-ndûm a yim mbâ nkáé owe ka ekpak a fonê ka eyimím, nne-nkáé fə́ne a yim ekan-ékân.

⁴Echî aŋ? Nne-nkáé á ka joé ka ibhê biji, a ri a káre ndûm. Nne-ndûm á ka joé ka ibhê biji, a ri a káre nkáé.

⁵Deê nkáé na ndûm á nuŋá na atem təm áfo á kam sê á fî kpá biji ka abhon í mfín, á góre Obhasi. Kən deê á chə́bhe njəm ka ekpin ábho á kâ bhâ okə́t átíŋ á gbô egaé Satan, ka á ká məŋé ofi biji ábho.

⁶Ń chorá áno mbí noŋ etí etáám, ebhín asík.

⁷Á kô sê chénchén ane á rî nná noŋ mme eê, kən Obhasi a yimî áno kpe bhaghé énê a káre ejê ekəp egyê. Nne yót a fôn ekəp njí, nnyo tat a fôn ekəp áji.

⁸Ên mba o nyə́ne ên ó ka kó ebháé, é kpê na mba á rî ka ekə́t, é nop kə́n ó kə́t ên áno, noŋ mme n di.

⁹Kən ájoé etʉ̂ ejə́né o ri mba ó ka məŋé ofi ên biji, ḿbə́ŋé nne-nkáé kpe nne-ndûm a kí ruí ên ngyím, nâ kó ên bibháé. Echî aŋ? É nop ebháé ekóóm na nji nne a kumí, ḿbə́ŋé enuŋ a ruá yê ngyím.

¹⁰Mbâ ên mba ó ko ên akáé, ó ko ên arûm, n kí səre ên noŋ ebhín, ń tô bəre mme asík kən a ri Ńtâ Jisos. Deê nkáé a kâ mághe ndûm.

¹¹Kən ájoé a mághe, deê a kâ kpô kó nnyo tat. Deê á kot, a chə́bhe njəm mbâ etəm í ndûm owe á tâŋ achot á jak ochî na ebháé ábho. Ndûm fə́ne deê a kâ mághe nkáé.

¹²Mbâ ane mba á rî ka ebháé na ane mba á ká ki ḿbə́ŋé na Jisos, deê ń káre ên otágha-etí obhámé. Ḿbi ó ka dʉ mbâ Ńtâ Jisos. Ájoé ntem-mmon-i-nnyen a ri na nne-nkáé nnyo á ka kí ḿbə́ŋé na Jisos, nne-nkáé nnyo á kam ekumúm, deê a kâ mághe yê.

¹³Nne-nkáé fə́ne nnyo á joé na nne-ndûm nnyo á ka kí ḿbə́ŋé na Jisos, nne-ndûm nnyo á kam ekumúm, deê nkáé a kâ mághe yê.

¹⁴Echî aŋ? Nne-ndûm nnyo á ka kí ḿbə́ŋé na Jisos, Obhasi a kí kam na yê ka obhô ochəma-biji mbi nne-ndûm nnyó a fôn na nkáé owe. Nâ noŋ fə́ne é rî na nne-nkáé nnyo á ka kí ḿbə́ŋé na Jisos. Obhasi a kí kam na yê ka obhô ochəma-biji mbi nne-nkáé nnyó a fôn na ndûm owe. Ájoé áno asík, tîk abhon ábho á jóe noŋ abhon mba ásé ábho á ká məŋé Obhasi. Kən ka ekpak é rî, Obhasi a kí kam na ábho.

¹⁵Kən ájoé kpe nkáé kpe ndûm nnyo á ka kí ḿbə́ŋé na Jisos, a kére se yê a kí maghé ebháé, deê a maghé. É joé áno, ebhín Obhasi é ká kpo fi kpe nkáé, kpe ndûm ányo nnyo a chə́bhe ntem-mmon-i-nnyen, ka Obhasi a sáŋe ên se yê a karé ên enare.

¹⁶Ên ane-akáé mba o ri ên atem-abhon-í-nnyen, ó ka məŋé ên sê arûm abhə́né kə́n á sêm ka obhô obhə́né a? Mba ane-arûm fə́ne mba o ri ên atem-abhon-í-nnyen, ó ka məŋé ên fə́ne sê akáé abhə́né kə́n á sêm ka obhô obhə́né a?

¹⁷Kən deê kpe énê a fi ekpin ejê nji Ńtâ Jisos a karê yê, a kam na ńgyímí nnyi yê a ri kpá kən Obhasi a bhîŋ yê se a joé nne owe. Nâ ejûm nji ń səra chénchén ane ka echəme atóbhá Jisos kpe njə́n.

¹⁸Ájoé etʉ̂ ên o ri mfá mba o raŋê mbá o kîm ên nkîm kən Obhasi a bhiŋ ên noŋ ane abhê, ka nôk ên sê ó yíghi ên ánáŋé nkîm mmá. Ájoé ó ka raŋ ên mbá o kîm ên nkîm, ka nok ên sê ó kím.

¹⁹Echî aŋ? Na ó kím ên nkîm, na o kâ kîm ên, áji asík é rî ndûm ejûm. Ndûm ejûm a ri etóbhóm nchot Obhasi.

²⁰Deê kpe énê a fi ka ńgyímí nnyi yê a ri kən Obhasi a sâŋ yê.

²¹Ájoé ebhú Obhasi a sáŋe wâ o ri a ri nsʉ́ŋ, deê o kâ kére. Kən ájoé ó yen ekpak nji o kí yim ó sém, yim.

²²Ka nan? Nne nnyo Ńtâ Jisos a bhiŋî yê, kpe a ri nsʉ́ŋ, ka ochî Ntûfâm, a sêm. Nnyo á ka joé ka osʉ́ŋ ebhú á bhíŋi yê, a kí chəbhé nsʉ́ŋ i Jisos Krayis.

²³Məŋê ên sê Obhasi a namê ên a káre ejûm. Nâ nne a kâ gbô osʉ́ŋ a karé ntem-nne.

²⁴Atem-abhon-í-nnyen, nâ kpe ńgyímí nnyi-nnyi o ri ên kpá kən Obhasi a bhiŋ ên ó jóe ên ane abhê, joê áfo ka ńnyə́ne na Obhasi.

²⁵Ḿ ba mân mbâ ane mba á ká məŋé nchot ebháé kpá. Nchot nnyi n kə́ bha nná ochot, ebhín Obhasi asík. A dʉ ə̂m ka ḿbə́ŋé noŋ nne nnyo Ńtâ Jisos a tóŋe onobhá-eji á ka fup.

²⁶Ń kere bəre na ekpatə́m oseŋe mbi o ri nná ka ebhú njí, é nóbhe nne a kə́t ka ńgyímí eye.

²⁷Nne nnyo a kô nkáé, deê a kâ mághe nkáé owe. Nnyo a nyə́ne á ka kó, deê a kâ kô.

²⁸Kpe noŋ n chorá áno, ájoé mmon i ndûm á kere se yê a kó nkáé, obhí asík a yimî. Mmon i nkáé fə́ne nnyo á ko ndûm, á ka yim obhí. Kən məŋê ên sê ane mba á rî na akáé, á rî na arûm, nâ á yéna oseŋe ka ngun nnyí. Ń ka wóm kə́n ó gyé ên ka oseŋe mbí.

²⁹Atem-abhon-í-nnyen, echî nchot amé a ri se ebhú áji nji Obhasi a sáŋe é mân chén. É róghé ka mfá-mfá, ane mba á rî na akáé á yîm noŋ kpe á ká fon.

³⁰Mba á kí rʉri ane ábho mba á kpóe, á yîm noŋ kpe nne á ka kpó ábho. Mba á fóne ogyebhá-ḿbə́ŋé, deê á yimá noŋ kpe ane mba á bhó gyebhé ḿbə́ŋé. Deê ane mba á náme iyîm á fôn ekpin noŋ kpe ábho asík á fóne iyîm mbí.

³¹Mba á kághe biji ka nchot i ngun, deê á kâ kére sê nâ ndûm ejûm. Echî aŋ? Ngun nnyí, ka ekpak ó yena ên áno, á ro kə́t ebhú é râp.

³²Ń ka wóm bəre ó káre ên ḿbə́ŋé eyəné oseŋe. Nne-ndûm nnyo á ka fon nkáé, íkíkéré ifê í jóa a ri ka achot í Ńtâ Jisos, ekpak a kí yim é gyébhe yê ka ḿbə́ŋé.

³³Kən nkógha-nkáé, íkíkéré ifê í jóa áno ka achot í ngun, a kérá ekpak nji a kí yim é gyébhe nkáé ka ḿbə́ŋé.

³⁴A kí chəbhé a kérá iyîm íbháe. Nne-nkáé nnyo á ka kó ndûm noŋ fə́ne á ká məŋé nne-ndûm, íkíkéré ifê í jóa áno ka achot í Ńtâ Jisos se yê a kak biji a yim etûm ejê na ḿbə́ŋé yə́t. Kən nne-nkáé nnyo á ko ndûm, íkíkéré ifê í jóa áno ka iyîm í ngun, ekpak nji yê a kí yim ndûm a gyebhé ḿbə́ŋé.

³⁵Chénchén mbí ń chorá nná a ri ka onono obhə́né. Ń ka chot bəre ḿ gbʉ́í kpe nne owəné yót ka íkíkéré mfi-mfi a fonê. Kən ń noghá bəre o yimá ên kpe jen ejə́né ka mfoné mbá, o tóbhá ên fə́ne Ńtâ Jisos na ḿbə́ŋé eyəné yə́t.

³⁶Mbâ ane mba á gye atem sê á kó kən á kpó kere se á bhó ko atem. Ájoé nne-ndûm a kére se á bhó jighi biji na mmon-i-nkáé nnyo a gyée se a kí ko, mmon-i-nkáé fə́ne a kí kui a jak, á kére se é nôp ábho á kó atem, deê á kó ebháé ka ekpak a wóme. Áfo obhí asík.

³⁷Kən ájoé nne-ndûm a yîm ḿbə́ŋé eye, nne nnyo a chóe yê cháŋ, se yê á bhó ko nnyo nne-nkáé nnyó, a fî fə́ne biji ibhê ekpak a timî, é kí joé nono ájoé á ka kó ebháé.

³⁸Nâ é fap sê yê nnyo a kóe nnyo nne-nkáé nnyo yê a gyée, a yîm nono, kən nnyo á ka kó, a yîm nono a chíŋi nnyo ngá.

³⁹Eji nne-ndûm owa a nyə́ne ekpin, we nne-nkáé o fonê o káre təm ndûm owa. Nji ndûm owa á kpo, o korê mân o kô nnyo tat, kən ó bhó ko nnyo á ka məŋé Jisos Krayis.

⁴⁰Kən ka ifámé íkíkéré, ntʉ́ghi nne-nkáé nnyó a kí fon ogyebhá-ḿbə́ŋé a chíŋi ájoé a kə̂t, ndûm á ka kpó ko. Ń kere bəre ikom Obhasi Ebhare Ntʉgantʉ í rî na mme eróŋ.