Read ejagham 1 Ane korin, echî 8 Bible Online

1 Ane korin, echî 8 - ejagham bible

1 Ane korin, echî 8

¹N kí chot mfá-mfá ḿ kpê na nchot édî nji nne a kô a jôm efin. Ka ekpak o chorê ên, êt atóbhá Jisos é fon oməŋá-ejûm ka nchot ajom. Kən oməŋá-ejûm átíŋ ó yíma nne a yuŋá biji. Okot nâ ó gyêk nne a kúá.

²Nne nnyo á kere se yê a fôn oməŋá-ejûm, deê a məŋé se a nyə́ne kpe á ka məŋé ka ekpak a fonê ka eməŋə́m.

³Kən nne nnyo á kot Obhasi, yê nâ Obhasi a kí məŋé.

⁴Nâ ka nchot edíím édî nji á jóme á káre ajom, é məŋe ên ka etʉri sê ajom a ri chichi ejûm ka nsi nnyí. É məŋe ên sê Obhasi a ri yót átíŋ.

⁵Ka nan? Kpe ane á kére sê ajom á rî ka nsi, kpe ka ósô, ka etʉri á kére sê ajom mmá á rî á tî otí, sê atúi-ofâm ajom á rî.

⁶Kən êt é məŋe sê Obhasi a ri yót. Yê a ri Ńsé nnyo a yimî iyîm chénchén, e fonê ekpin ejə́ré fə́ne ka obhô obhê. Ntûfâm a ri fə́ne yót, a kamá Jisos Krayis. Obhasi a yimî iyîm chénchén ka obhô obhê. É foná fə́ne ekpin ka obhô obhê.

⁷Kən atem-abhon-í-nnyen asík chénchén nâ á mə́ŋe sê ajom a ri chichi ejûm. Ane á rî ka echəme ejə́ré mba á raŋ mbá á gyê ka achot ajom mmá. Ḿbə́ŋé ábho á ka son, á kéra sê á di édî nji á jóme á káre ajom, nâ ábho á yími obhí.

⁸Kən é məŋe sê édî é bhó yim Obhasi a kó ekpin ejə́ré se é rî ka nnyen-i-mbá. É bhó bhip êt ájoé é ka dí édî njí. Orʉrí fə́ne cháŋ nji é di.

⁹Kən kó ên ebhú, Obhasi a káre êt obhô se kpe e korê jen e dî kən deê obhô mbí ó ka yim êt é chə́bhe a ri ejûm nji ane mba ḿbə́ŋé nnyi á kíi na Jisos á nyə́ne á ka son, á yîm obhí.

¹⁰Ka nan? É kó sê nne nnyo ḿbə́ŋé a nyə́ne á ka son a yên wâ, ka we nnyo ó məŋe achot mmá, o kí di édî ka njû njom, ó kere se á ro fon ḿbə́ŋé, á bhó top ekát ejâ a?

¹¹Nâ oməŋá-ejûm obhâ ó yui nne nnyó nnyo ḿbə́ŋé á ka son nná, yê ka ntem-mmon-i-nnyen nnyo Jisos a kpóe nná ka echî ejê.

¹²Nâ é fap sê nji o kí yim ntem-mmon-i-nnyen a gyék ka obhî, o kí bhibhi yê ḿbə́ŋé nnyi esonóm á ka son. Ka ekpak njí o kí yim Jisos Krayis obhí.

¹³Nâ mân ájoé édî nâ é yíma ntem-mmon-i-nnyen omé a gbo, ńjə́ne ń do dí, n kâ yîm yê a gbo.