Read ejagham 1 Ane korin, echî 9 Bible Online

1 Ane korin, echî 9 - ejagham bible

1 Ane korin, echî 9

¹Ka biji ibhámé, ń ka yén kpe ejûm nji é fîk ə̂m. Mme a ri ḿgbán i Jisos Krayis. Na amə̂t amámé, ń yen Jisos Krayis nnyo a ri Ntûfâm owəré. Ên áfoné nâ o ri ên noŋ ekəp etûm nji ń yimá mbâ Ńtâ Jisos Krayis.

²Kpe ane etat á rô kam sê mme a ri ḿgbán i Jisos, ên ó məŋe. Eriŋ é rî ka jen? Ên ó ki ên ḿbə́ŋé na Jisos Krayis nnyo mme ń ko otîp ogyebhá-ḿbə́ŋé obhê ḿ ba səre ên.

³Ebhú ane á gyée ə̂m indəré etóŋóm ka nchot nnyí, nji ḿ bəbha ábho a ri se,

⁴ane á ká fon ka ekarám êt nji díím na nji gwóóm ka etûm nji é yimá a?

⁵Á bhíni êt obhín sê e kâ kô ebháé Obhasi, e jená e fará na akáé abhə́ré a? Nâ noŋ Pita na ágbán í Jisos mba ngá, é kpê na abhon-í-nnyen í Jisos, á yíma.

⁶Átíŋ təm mme na Banabas nâ ó kera ên sê e ri é yîm etûm na abhô abhə́ré kən e fôn kpe ejûm edíím.

⁷É ko ane-enok ka enok, á kok a ri ntí ábho, ábho áfoné, kən á dik édî a? Énê nnyo a kí yim ebhin á bhó ko édî ka ebhin ejê a dí? Nnyón mbábha-obhúi nnyo á bhó gwo abhê obhúi obhê?

⁸Achot mma ń chorá nná, á ká dʉ ka ikom ifámé. To achot í nchane mát nâ ebhín í Mosis é chóre.

⁹Á séŋe ka ebhín njí se, “O kâ bhôp nnyo mfoŋ se a kâ dî édî ebhú a kí yim etûm í nkʉi egoghóm.” Ó kere ên sê nji Obhasi a chorê nná nchot nnyí a ri na mfoŋ a?

¹⁰Áno asík. Obhasi a chorê áno a kpê na êt ane. Echî aŋ? Deê mkpaŋa-ebhin na mfʉghá-fʉ́ghá á yimá na íkíkéré sê tîk á fôn nkiri ka édî ebhin njí.

¹¹Ájoé é kak otîp ogyebhá-ḿbə́ŋé ka ḿbə́ŋé eyəné, ńjə́ne fə́ne é kə́ bha na onono ka ekpin ejə́né, obhí ó rî ka jen nji ó karé êt nji é kí fi ekpin ejə́ré?

¹²Ka eji ó kam ên sê é nop ekarám ane etat iyîm mbi í kí fi ekpin ábho, êt mân nâ e fonê ka ejoóm ndaŋa-mbá ane mba kə́n o kí karé. Kən kpe noŋ e fonê ńgyímí ányi nnyi kə́n e bhə̂p ên ogye obhə́ré, é ka bhə́p. E kâm chénchén oseŋe ka etûm eyimím sê é kâ yîm ejûm nji é kí gbʉi ên mbá otîp ogyebhá-ḿbə́ŋé mbi ó kpê na Jisos Krayis.

¹³Ó məŋe ên sê ane mba á yíma etûm ka ókʉ́rí achot Obhasi á kôk édî ábho ka nji ane á káre ka ókʉ́rí mbí. Ane mba á yíma etûm ka eji á túbha ekəp Obhasi, á kôk fə́ne nnyi ábho nkiri ka ekəp.

¹⁴Nâ noŋ fə́ne é rî na ane mba á sə́ra ane otîp ogyebhá-ḿbə́ŋé Obhasi. Ńtâ Jisos a sə́re se deê ane á káre ayimá-etûm mbá nji é kí fi ekpin ábho ka etûm nji á yíma.

¹⁵Kən kpe noŋ m fonê ńgyímí ányi, nnyi kə́n m bə̂p ên ogye obhámé, ń ka bhə́p. Ń ka séŋ fə́ne nwet nnyí bəre ḿ bə́p ên mân ó káre ə̂m ogye mbí. Ekʉ̂ é nôp é chîŋ na nji ḿ bə́p ntʉ́ghi ejûm njí. Echî aŋ? Nne a kâ bhâ okó nchot amé nnyi ń suma nná obhô ngaŋ se a ro mcjpt o chichi.

¹⁶Kən kpe noŋ ń səra áno ane otîp ogyebhá-ḿbə́ŋé mbí, ń ka fon ikom mfi kə́n n sûm obhô-ngaŋ. Ka nan? Obhasi nâ a toê ə̂m se ń sə́ré ane. Ń do səre fə́ne, tîk é jóe ekpatə́m ejûm oseŋe mbâ amé.

¹⁷Ebhú sê ḿ kpik nná ane otîp mbí ka ikom ifámé ê, nâ eji kə́n n kí amə̂t bəre ḿ fôn ekəp, kən ikom ifámé asík. Obhasi nâ a nyáŋe etûm njí a káre ə̂m se ń yîm.

¹⁸Ekəp ejámé mân a ri jen? A ri nji á sáŋe ə̂m sê ń sə́ré ane otîp ogyebhá-ḿbə́ŋé Obhasi, n kâ bhə̂p kpe ejûm. Nâ echî nji ń ka bhə́p, kpe na ńgyímí nnyi m fonê.

¹⁹Mme n di ka biji ibhámé, ń ka joé ka osʉ́ŋ í nne kpe yót. Kən kpe noŋ é rî áno, ń yîm biji nsʉ́ŋ ane chénchén bəre ń nôk ane etî-etî á mə́ŋe Jisos Krayis.

²⁰Ń kumi na ane Jus, ń yimá ekpak ábho á yíma bəre ń nôk ábho á mə́ŋe Jisos Krayis. Kpe noŋ mme cháŋ ka óséré ebhín í Mosis, kən ń joé na ane mba á tóbha ebhín njí, ń yimá noŋ ábho bəre ń nôk á mə́ŋe Jisos Krayis.

²¹Ń joé ka ekam ane mba á ká joé ane Jus, á bhó top ebhín í Mosis, ń yimá fə́ne noŋ ábho bəre ń nôk á mə́ŋe Jisos. Ń ka sə́ré bəre nâ mme ḿ bó top ebhín Obhasi. Áno asík. Mme n tóbhá ebhín í Jisos Krayis.

²²Ń joé ka eji ane á rî ḿbə́ŋé ábho nnyi a kíi na Jisos á ka səné, n kí ki biji ibhámé bəre nne ábho yót, bəre ń nôk á mə́ŋe Jisos. Nâ é rî sê ń yimá ekpin ejámé é bhighá na ane chénchén bəre kpe nan ń yîm etʉ̂ á sém ka obhí.

²³Ń yimá áno iyîm mbí chénchén ka obhô otîp ogyebhá-ḿbə́ŋé Obhasi bəre ń nôk mme ḿfoné ḿ fôn nkiri ka onono mbi ó rî áfo.

²⁴Ane etî-etî á kí bhene egaé-ábhiî, kən nne yót nâ a kí fon érûm. Nâ nok ên ó fôn nnyen ekpin Obhasi noŋ mbéna-ábhiî nnyo á noghá yê a fon érûm.

²⁵Kpe énê nnyo se yê á jak egaé-ábhiî, á fik biji nono, á yimá yê fə́ne á fôn érûm. Érûm nji a kí fon kpe é káe nan é kí bhip. Kən ejə́ré é bhó bhip bhúghí-bhúghí.

²⁶Nâ mân ka ibhámé biji, ń jak áno ochî koŋ, ta n sî ntə̂m. Ḿ bó bhibhi ikom ifámé noŋ ntəbha-agba nnyo á ka məŋé nji á yimá.

²⁷Ń kam chénchén oseŋe bəre ḿ fî biji ibhámé. Ń ka wóm bəre ebhú ḿ man ka esə́rə́m ane otîp ogyebhá-ḿbə́ŋé, ekəp Obhasi é bhá chíŋ ə̂m.