Read ejagham 2 Ane korin, echî 10 Bible Online

2 Ane korin, echî 10 - ejagham bible

2 Ane korin, echî 10

¹Mme, Pol, n kí goré ên ka mbiŋ i Jisos Krayis nnyo a fonê ekpin í nyamḿ, biji á bhó yuŋ. Mme Pol, nnyo ane á chóra sê ḿ kpughi ên, ń kik biji noŋ kpe ejûm ń ka fap, kən ḿ maghé ên, ń chorá, efup ḿ bó fon.

²N kí goré ên bəre o kâ yîm ên kpe ejûm nji é kí yim ə̂m ń chôt na ên ochu-óchû. Kə́n ń chorá áno, efup ḿ bó fon, na etʉ̂ ane mba á sə́ra sê êt é yimá ekpin ka íkíkéré ngun.

³Kpe noŋ êt e ri áno ka ngun nnyí, enok ejə́ré enok í ngun asík.

⁴Echî aŋ? Iyîm enok ibhə́ré í ká joé noŋ mbi ane ngun, kən í fóne ikom Obhasi mfi í kí bhik ebhíbhím eji kpe é sóne é kêt.

⁵Na iyîm enok ibhə́ré, e kí bhighí áfírí kpe mmán, na kpe njə́n ejûm enyaŋe nji é kí gbʉi nne a kâ mə́ŋe nchot Obhasi. E kí yim íkíkéré kpe mfə́n, í gbô osʉ́ŋ í káre Jisos Krayis.

⁶Ebhú ó yuk ên fə́ne yê kpe ka jen, e ri ngyím ka ekpərə́m kpe bhaghé nne nnyo á yaghá atûŋ á bhó yuk yê.

⁷Ó kebha ên iyîm ósô-ósô, nji é rî ka etím, ó bhó məŋé ên. Nne nnyo á kam ka etʉri se yê a ri ntem-nne Jisos Krayis, deê a tirá biji ibhê sê ka ekpak nji yê a ri áno ntem-nne Jisos Krayis, êt eróŋ a ri atem-ane Jisos Krayis.

⁸Echî aŋ? Kpe n toê ń yûŋ mô biji ka ikom mfi Ńtâ Jisos a karê êt, yê ḿfoné, kpe nne a kí yoé ə̂m amə̂ŋ, ejûm cháŋ. A káre êt ikom mfí se é gyê ên ó kúi ên okúí, e kâ bhíbhi ên obhíbhí.

⁹Ń ka wóm ń kâk ên efup na onwet mbi ń seŋa.

¹⁰Etʉ̂ ane á chóra sê, “Onwet í Pol mbí á seŋa êt ó kí chubhí, ó soná, kən ó yen yê ḿfoné, á bhó joé yúp-yúp, nchot eye á bhó gyebhé ka otûŋ.”

¹¹Kən deê ane ntʉ́ghi mbá á mə́ŋe sê ekpak e séŋe ka nwet, kpe é jóe ágo, kpe é ka joé, a ri ejûm jə́t.

¹²É bhó chot nnyi sê é kí biji ibhə́ré noŋ ane mba á kera sê ábho á chiŋi obhô, na kpe é gáa biji na ábho. Áfo a ri énə́mé, ka ntʉ́ghi ane mbá á yim nnyi ábho ńgyímí nnyi á gáa biji. Á fôn nnyí ábho ńgyímí nnyi á tóŋa biji.

¹³Kən êt, é bhó sum obhô-ngaŋ é chíŋi ńgyímí eyəré. E kí sum a ri ka ńgyímí nnyi Obhasi yê ḿfoné a karê êt se é súm, kpe ka etûm nji é yími mbâ eyəné.

¹⁴Ka nji ên o ri ka ńgyímí nnyí, nnyi Obhasi a karê êt, é ka ji é chíŋi ńnyə́ne ebhú é kóe otîp ogyebhá-ḿbə́ŋé mbi ó kpée na Jisos Krayis, e bhák mbâ eyəné.

¹⁵É bhó sum obhô-ngaŋ é chíŋi ńgyímí eyəré ka etûm ane etat nji á yími, kən íkíkéré ifə́ré í rî sê nji ḿbə́ŋé nnyi o kíi ên na Jisos Krayis a kí kui a jak, etûm ejə́ré é jábhe ka ekam ejə́né nono.

¹⁶Nâ ńjə́ne e sə́re otîp ogyebhá-ḿbə́ŋé Obhasi ka nték etat, e kâ kə̂t e súmá obhô-ngaŋ ka ntûm nnyi ane etat á yími ka ebhat ábho.

¹⁷Á séŋe sê, “Deê nne nnyo a kí sum obhô-ngaŋ, a súm ka obhô Ńtâ Jisos.”

¹⁸Echî aŋ? Nne asík a kí səre se yê a yim nono, kən a kâm. A ri Ńtâ Jisos nâ a kí səre.