Read ejagham 2 Ane korin, echî 11 Bible Online

2 Ane korin, echî 11 - ejagham bible

2 Ane korin, echî 11

¹N kí wom ó kam ên kpá na énə́mé ejámé mfá. Kam ên kpá mfá sê ń nəme.

²Amə̂t mma n kíi ên a ri mma Obhasi. N gyée ên n káre Jisos Krayis bəre ń kó ên ḿ fáp ka ochî obhê noŋ nkáé mfê nnyo kpe obhí bhə́t á ka fon nji a kí ji mbâ ndûm.

³Kən efup é kí yim ə̂m bəre ka ekpak nji nnyô a kóe oka a ríri Ifa, tîk á yîm ên ó yíghi ḿbə́ŋé nnyi o kíi ên na Jisos Krayis. Ḿbə́ŋé nnyí o kíi ên, ache ó ka chaghé ên, akôp ó ka fon ên.

⁴Echî ń chorá áno a ri jen? Nne etat egyê tîk a bhâ chôt a kpê na Jisos etat egyê na nnyo êt e sə́re ên áno. Ebhú tat a káre ên ńtʉgântʉ etat egyê na Obhasi Ebhare Ntʉgantʉ nnyo ta ó fon ên. Ebhú tat o kâm ên otîp ogyebhá-ḿbə́ŋé mbi tat egyê na mbi êt e karê ên. Ebhú tat ên fə́ne o kí ko ên iyîm mbí chénchén ó bhó firi ên.

⁵Kən ń ka kéré bəre abhə́né akará-otîp mbá, mba ó kera ên sê á chiŋi obhô, á chiŋi ə̂m kpe ka ejûm jə́t.

⁶Ebhú tat nne á ka kpí ə̂m ka ekpak nji n kí chot nchot nono, kən n kí məŋé nji n kí chot. Kpe ka bhaghé ejûm, kpe ka bhaghé ebhú, é yim ên ó məŋe sê êt ánə́mé ane asík.

⁷N yimî obhí tîk nji n kíi biji ibhámé bəre kpe ejûm ń ka fáp, ń sə́ré ên otîp ogyebhá-ḿbə́ŋé Obhasi kpe áfu n kâ kô.

⁸Ebhú ń yimá etûm mbâ eyəné, ane bichəme atóbhá Jisos ka nték etat nâ á kára ə̂m ntí mmi ń woma. Nâ é rî noŋ n kí jʉ ejʉ̂ mbâ ane etat bəre ń nyáŋé ên.

⁹Ebhú nji n di ágo na ên, ń joé ka eket, ń ka karé kpe nne owəné yót oseŋe ka chénchén nji n wóme, atem-abhon-í-nnyen mba á dʉ̂ Masedoniya nâ á káre ə̂m. Ájoé kpe ényané ń ka karé ên oseŋe, kpe ójô ḿ bó karé.

¹⁰Nji mfoné nchot i Jisos Krayis a ri na mme, obhô-ngaŋ mbi ń suma nná, nne nnyo a kí nyeré ḿbə́ne cháŋ ka ebhat Akaya.

¹¹Nâ-ngá ń chorá ka ń ka kot ên a? Áno asík. Obhasi a mə́ŋe se ń kot ên.

¹²Ka obhô mbí, nji ń yim, ḿ bó maghé ńjə́ne eyimím, bəre n kâ yîm akará-otîp abhə́né mba ngá ábha á fôn echî nji á kí sum obhô-ngaŋ sê ábho á yíma etûm ka ekpak êt é yimá.

¹³Echî aŋ? Ntʉ́ghi ane mbá a ri akará-otîp áfúbhí, ayimá-etûm mba á ríra ane á gbô, á bhuá biji sê ábho a ri ágbán í Jisos Krayis.

¹⁴Nchâ ejûm, ka kpe Satan a bhuî biji se yê a ri énjel nnyo á bhak na ebhát.

¹⁵É ká kpo joé mân ejûm efê ájoé ane mbá á bhuí biji sê ábho a ri ágbán mba ekpin ábho é rî ka nnyen-i-mbá. Nji á yíma nâ nji á kí fon ka ntə́ma-njəm ebhú.

¹⁶N kí kpo chot bəre nne kpe yót a kâ kére se mme a ri énə́mé nne. Kən ájoé nne a kô ə̂m se mme a ri énə́mé nne, kam ên ka ekpak áji, mme ń súm fə́ne obhô-ngaŋ mkpât.

¹⁷Ńtâ Obhasi asík a karê ə̂m ikom ń súm obhô-ngaŋ mbí, kən ń suma noŋ énə́mé nne.

¹⁸Nji ane etî-etî á kí sum obhô-ngaŋ ka iyîm í ngun, deê fə́ne kpá mme ń súm.

¹⁹Echî aŋ? Sê ó məŋe ên ejûm na echî o kí kam ên na ánə́mé ane na ogyebhá-ḿbə́ŋé.

²⁰O kí kamâ ên ájoé nne a kí yim ên noŋ asʉ́ŋ, na kpe a kí di ên njəm yə́t, na kpe a kí moé ên ka ó ka məŋé ên, na kpe a kí kep ên se kpe ejûm ó ka fáp ên, na kpe a sûm ên ka ochî.

²¹Ń kam bəre n nə́me kpe-eji nji m bée nsôn, êt é ka yim ên achot ntʉ́ghi mmá. Kən kpe jen nji nne a kí sum obhô-ngaŋ, mme fə́ne kə́n n sûm. Ń chorá áno noŋ énə́mé nne.

²²Ane mba á súma nná obhô-ngaŋ, a ri ane Ibru a? Mme fə́ne a ri nne Ibru. A ri ane Isrel a? A ri biyábhé-abhon Abraham a? Mme fə́ne a ri mmon Abraham. Mme fə́ne a ri nne Isrel.

²³A ri ágbán í Jisos Krayis a? Mme ń chiŋi ábho mân ka ngyím nnyí. Ń chorá áno mfá-mfá noŋ ekí nâ é rî ə̂m ka echî, ka ń yîm etûm ń chiŋi ábho. N gyê ókúmí ka obhô Jisos Krayis ntə̂m a tî a chíŋi nnyi ábho. Á tə̂m ə̂m é tî é chíŋi nji á tə́me ábho. Ń sem ekʉ̂ ntə̂m a tî a chíŋi nnyi ábho.

²⁴Achî ane Jus á sum ə̂m mkpá esam njəm ekû na énî ntə̂m-ntə̂m érôn ka biji.

²⁵Ntə̂m ésá nnyi ane Rom á tə́me ə̂m na esené. Ntə̂m yə́t nnyi á tûp ə̂m na atáé. Ntə̂m ésá nnyi ńsughîkaŋ a fúghi ə̂m ka aya, aya á kəna ə̂m á tubha ńgô, á tubha ngá ka atʉ́ mát, na ofú bhə́t.

²⁶Ka ejen ejámé nji ń jená kpe bhaghé ebhú, n kí semâ ekʉ̂ ka aya, ka obhô anyághá-ajʉ̂, ka obhô ane abhámé na ajéné, ka nték na etə́m, ka aya na ka obhô ane mba á sə́re áfúbhí sê ábho atem-abhon-í-nnyen.

²⁷N kí yimâ etûm, biji ḿ bó yoé na ekpatə́m oseŋe atʉ́ na efín, eyô ḿ bó yae ka njaé na ka ekot ayép. Ntə̂m etî-etî ḿ bó fonâ édî, n kí kərâ biji mbít m kpók egyʉk.

²⁸Kpe na achot mmá chénchén, n kí fonâ ekpatə́m í ḿbə́ŋé, ń nyáŋé echəme atóbhá Jisos ka ngûm.

²⁹Nne Obhasi kpe nnyón á joá áno bəre kpe á ka fon ikom, mme fə́ne ń kera áno bəre kpe ikom cháŋ. Á choe nne a yîm obhí, n sôn á yimá ə̂m áno kpe-eji.

³⁰Ájoé n kí sum obhô-ngaŋ, n kí sum ka iyîm mbi í kágha ə̂m ka oseŋe, ane á yoá ə̂m.

³¹Obhasi nnyo a ri Ńsé Ntûfâm owəré Jisos Krayis a mə́ŋe se mme nne áfúbhí asík. Deê mbiŋ eye a fon ejík ka ótúm-ótúm.

³²Ka eték í Damakus, ntûfâm nnyo a ri ka óséré ntûfâm eyúp nnyo á kamá se Aretas, a kaghê nná ane a fáre eték se á fî ə̂m.

³³Kən á kâk ə̂m ka ekáé á bhî ka wíndo ta ka ósô enyóŋ, ḿ bé ntûfâm nnyó.