Read ejagham 2 Ane korin, echî 13 Bible Online

2 Ane korin, echî 13 - ejagham bible

2 Ane korin, echî 13

¹Ńgyê osúí ntə̂m ésá nnyi n kə́ bha mbâ eyəné. Á séŋe ka nwet Obhasi sê, “Obhí-obhí mbi ntem a yimî ntem, deê atî-isê á jóe á sí kpe ábháe kpe ásá.”

²Ń daŋ mbá ń tʉ ane obhô ka otûŋ. Ń tʉ ane mba á raŋ mbá á yim obhí na chénchén mba ngá. Ebhú m báe ejen ka osúí ntə̂m ébháe, m kpô tʉ ábho obhô ka otûŋ. Mfá-mfá n kí kpo tʉ kpe noŋ n dô joé áno ágo. N kí səre ábho bəre ḿ kpo bha, n yûk, tîk ḿ bó ri ábho nsôn.

³Ó woma ên sê ta ó yén ên eriŋ kən ó kâm sê Jisos Krayis a ri na mme ebhú n kí chot. Yê éfébhé nne asík, kən a kí toŋâ ikom ifê ka ekam ejə́né.

⁴Echî aŋ? Noŋ nne á kûm yê ka ego, kən ka ikom Obhasi yê a ri mbít égyé. Noŋ ane fə́ne é chəm na Jisos Krayis, kən a ri ka ikom Obhasi mfi e fonê ka ekpin ejê nâ e kí joé na ên.

⁵Deê ó kép ên kpá biji ibhə́né, ó yén ên ájoé o ri ágo o fik ên ka ḿbə́ŋé nnyi o kíi ên na yê. Gaê kpá biji ibhə́né. Ó bhó yen ên tîk sê Jisos a ri na ên a? Áfo təm nâ ó gbo ên egaé áji.

⁶Kən ń kere bəre tîk o yên ên mân sê êt é ka gbo egaé áji.

⁷E kí goré Obhasi sê o kâ yîm ên ejûm ebhí. Cháŋ sê é woma é tóŋé sê êt é ka gbo, kən é woma sê o kâ gbô ên, kpe o kére ên sê êt é gbo.

⁸Echî aŋ? É ka fon ikom mfi é kí gbʉi nchot nnyi a ri ka echî. Kən é noghá sê ńnyə́ne a ji a ri ochî.

⁹É kí gyebhé êt ájoé é nok é ka yén echî, kən o yên ên. Nji é gorá Obhasi a ri sê o ji ên ochî na ekpin ejə́né na Jisos Krayis.

¹⁰Nâ echî nji ń seŋa achot mmá ń túm, kpe n dô joé ágo. Nji ḿ kpo bhá, echî é ro kpó joé nji n kí toŋe ikom mfi Ńtâ Jisos a karê ə̂m. A karê ə̂m se ń gyê ên ó kúí, á ka karé se ḿ bíbhí ên obhíbhí.

¹¹Atem-abhon-í-nnyen, kən ń jéghe, n kí kup ên bəre, “O kâ ên a?” Choŋ ên ochî na ekpin ejə́né na Jisos Krayis, yûk ên nchot amé. Kam ên na atem. Kumî ên ka ekone na atem. Tîk Obhasi, mfona okot na ekone, a jóe na ên.

¹²Kûp ên atem-abhon-í-nnyen ágo ka echî ka echî, o tamá ên ábho ngaŋ ka mbiŋ Obhasi.

¹³Chénchén ane Obhasi á kí kup ên.

¹⁴Deê onobhá-eji Ntûfâm owəré Jisos Krayis na okot Obhasi na ochəma-biji mbi Obhasi Ebhare Ntʉgantʉ á kará, í jóe na ên chénchén.