Read ejagham 2 Ane korin, echî 2 Bible Online

2 Ane korin, echî 2 - ejagham bible

2 Ane korin, echî 2

¹Echî aŋ? N kére ka ḿbə́ŋé bəre n kâ kpô karé ên nsae ka ḿbə́ŋé ḿ kpó bhá ejen mbâ eyəné.

²Ka ń karé ên nsae, énê nnyo a kpó ri ágo nnyo a kí karé ə̂m ogyebhá-ḿbə́ŋé é chíŋi ên mba n karê nsae?

³Nâ ńjə́ne n séŋe áno nwet ányi bəre ebhú ḿ ba, n kâ fôn nsae mbâ ane mba kə́n á kí karé ə̂m a ri ogyebhá-ḿbə́ŋé. Ka nan? N kamê ka etʉri bəre ogyebhá-ḿbə́ŋé obhámé a ri obhə́né chénchén.

⁴É rî sê, n séŋe nwet ányi na ekpatə́m íkíkéré ḿbə́ŋé na onoghá-ḿbə́ŋé, obhə́bhe ó təbhá bəre ń nôk ó mə́ŋe ên njok okot mbi m fonê na ên, n kâ káre ên a ri nsae.

⁵Kən ájoé nne owəné kpe yót a yîm ejûm nji é kə́ bha ntem na nsae, deê a məŋé se á ka yim ə̂m. A yimî ên, kpe é ró joé ên chénchén. Kən ń ka wóm ḿ bíbhí yê nchot kpe-eji.

⁶Ntʉ́ghi nne ányo, ên etî-etî, o kâ kpô kí ên yê amə̂t, ekpərə́m áji é bhik.

⁷Ntʉ́ghi ejûm njí é fap mân, ri yê nsôn gyíni obhí obhê, kak ên yê ḿbə́ŋé, a kâ bhâ ofon nsae a tí a chíŋ.

⁸Nâ n kí goré ên bəre deê ó yîm ên yê a məŋé se ó fon ên ekpatə́m okot na yê.

⁹Nâ echî é yími ə̂m n sêŋ bəre ń gáe ên ń yén ájoé o ri ágo o yimá ên chénchén ejûm ka ekpak í n sə́re ên.

¹⁰Nne nnyo ó ri ên nsôn o gyíni obhí obhê, nâ mme eróŋ ń yim áno. Nji ń di fə́ne nsôn n gyíni obhí nne, ájoé sê ń dî, n kí yim ka ochî Jisos Krayis ka obhô obhə́né.

¹¹Ń yimá áno bəre é gbʉ́í Satan a kâ bhâ ofon orʉrí ka nchot a fâp ka ekam ejə́ré, ka é məŋe ekpak nji yê á koná achot amê.

¹²Ebhú n jiî eték í Troyas bəre ń jí káre otîp ogyebhá-ḿbə́ŋé mbi ó kpê na Jisos Krayis, n yên bəre Ńtâ Obhasi yê ḿfoné ta a rə́bhe mbá ágo se etûm ejê é jên nono.

¹³Kən ḿbə́ŋé amé á ka na, ka ń ka yén ntem-mmon-i-nnyen omé Tayitus ágo. Ka obhô mbí, m mághe ábho, n jak nnyi Masedoniya.

¹⁴Kən deê ekûp é jóe é káre Obhasi nnyo ka obhô Jisos Krayis, érûm é kí joé ejə́ré chénchén ebhú. Ka obhô obhə́ré fə́ne nâ ngun ndə́m á kí yuk otîp obhê noŋ á yúgha énoê egyʉ.

¹⁵Echî aŋ? Êt nâ e ri noŋ ejûm í Jisos Krayis nji é fóne énoê egyʉ kən a kô a káre Obhasi. Ane á kí yuk egyʉ njí, etʉ̂ á sêm, etʉ̂ é bhíp ábho.

¹⁶Mbâ ane mba é kí bhip ábho, egyʉ njí a ri ekʉ̂. Mba é kí nop ábho, egyʉ njí a ri ekpin. Énê nnyo a bhighî eyimím ntʉ́ghi etûm njí?

¹⁷Êt é ka joé noŋ ane mba tat, mba á kôk otîp ogyebhá-ḿbə́ŋé Obhasi noŋ kpe ejûm egurúm nji é káre ábho orʉrí. Kən ebhú êt e kí karé otîp mbí, é kará na ḿbə́ŋé eyəré jáé ka ochî Obhasi noŋ ane mba a túmi ka mbiŋ i Jisos Krayis.