Read ejagham 2 Ane korin, echî 3 Bible Online

2 Ane korin, echî 3 - ejagham bible

2 Ane korin, echî 3

¹Ó kere ên tîk sê e kí kpo kat biji ibhə́ré? Áno asík. É bhó wom nwet mbâ eyəné nnyi o kí səre ên sê e kí yim noŋ ane etat á yíma. É bhó wom fə́ne nwet mbâ ane etat nnyi á kí səre sê êt e kí yim.

²Ên áfoné nâ o ri ên nwet eyəré nnyi á séŋe ka ḿbə́ŋé eyəré sê kpe nne a yén a bhiŋ.

³É rî jáé sê Jisos Krayis yê ḿfoné nâ a séŋe nwet nnyí kən a tûm na êt. Á ka séŋ na ayép í nwet, kən á séŋe na Ntʉgantʉ mfoné-mfoné Obhasi. Á ka séŋ ka atáé mma á séŋa nwet, kən a ri ka ḿbə́ŋé eyəné.

⁴Ḿfa nâ ḿbə́ŋé nnyi e fonê, efup é bhó fon na Obhasi ka obhô Jisos Krayis.

⁵É ká joé sê ka biji ibhə́ré, é bhik ka esə́rə́m sê kpe bhaghé ejûm é dʉ̂ a ri ka obhô obhə́ré. E kí bhik, é dʉ̂ a ri mbâ Obhasi.

⁶A ri Obhasi nnyo a yimî êt e bhîk ejoóm ayimá-etûm ka ńgyímí mfê eye na ane ngun. Á ka yim êt é bhîk ka nchot ebhín nji sê á séŋe oséŋ, kən a ri ka Ntʉgantʉ owe. Echî aŋ? Ebhín nji á séŋe oséŋ, é bhâk na ekʉ̂, kən Ntʉgantʉ owe, á bhak na ekpin.

⁷Á séŋe ebhín Obhasi ka ntáé kən ebhú Obhasi a karê ńjə́ne, ejík ejê é fâp. Kpe noŋ ebhát nji é rî ka ochî Mosis nji a bháe na ebhín njí é kpô ayép, ebhú a bháe obhá ebhát njí é sóne kpe-eji nji ane Isrel á ká məŋé yê okép ka ochî. Ájoé mân ebhín nji é bháe na ekʉ̂ é bhak na ejík,

⁸ejík Obhasi Ebhare Ntʉgantʉ é bhó chiŋi mân obhô a?

⁹Ájoé ebhín nji é kí bhibhi nne esup é bhak na ejík, kən ejík Obhasi Ebhare Ntʉgantʉ nnyo a kí yim ane á sém, é bhó chiŋ obhô a?

¹⁰Ka íkíkéré mfí, ejûm nji ndaŋa-mbá é fóne ebhát Obhasi, kən é ká kpo fon mfá-mfá, ka ebhát nji é chiŋi ńjə́ne é bha.

¹¹Echî é rî sê ájoé ejûm nji é kí kpo ayép, é bha na ejík Obhasi, ejûm nji é bhó kpo ayép, é kí fon ejík nji é chíŋi ochíŋ.

¹²Ka eji mân é məŋe sê ejík Obhasi nji é rî mfá-mfá é bhó kpo ayép, é ro kpó fon efup ka esə́rə́m ane otîp obhê.

¹³É ka joé noŋ Mosis nnyo a kí bhuí ochî obhê ane Isrel á kâ yên noŋ ejík Obhasi é kpôk ayép.

¹⁴Kən ane Isrel mbá, ḿbə́ŋé ábho a ri noŋ ntáé. Ta na égyé, á bhiŋ achot mma á rî ka ńgyímí éməné nnyi Obhasi a fonê na ane, é kí joé noŋ ejûm nji é bhúi nná Mosis ka ochî kən é nyə́ne é bhuá ábho. Echî aŋ? Təm Jisos Krayis nâ a kí yighí ejûm njí.

¹⁵Ka etʉri, ta na égyé kpe bhaghé ebhú á bhíŋi ebhín í Mosis, ḿbə́ŋé ábho a kí joé noŋ á bhúi na ejûm.

¹⁶Kən nne á kpighi a tôp Ńtâ Jisos, nâ á yíghi ejûm nji é bhúi nná ḿbə́ŋé eye.

¹⁷Ntûfâm nnyó a ri Ntʉgantʉ Obhasi. Eji nji Ntʉgantʉ Ńtâ Obhasi á joé, esémém fə́ne é rî áfo.

¹⁸Êt mân fép, na ochî obhə́ré, nji é bhúi cháŋ, amə̂t amə́ré á kébha ejík í Ńtâ Jisos. Ejík njí é kí yoŋâ êt e fóŋá yê ka ejík, ka ngyím na ngyím. É dʉ̂ mbâ Ntûfâm nnyo a ri Ntʉgantʉ Obhasi.