Read ejagham 2 Ane korin, echî 4 Bible Online

2 Ane korin, echî 4 - ejagham bible

2 Ane korin, echî 4

¹É dʉ̂ mân áno a ri ka nsôn nnyi Obhasi a rî êt kən a káre êt etûm njí, nâ ńjə́ne e nyə́ne e nyoghá biji.

²É taŋe chénchén iyîm ísonê mbi ane á kí yim ka ebhə̂t. É taŋe sê êt é bhó yimâ oka, na kpe é sə́ré áfúbhí ka nchot Obhasi. Nji é kí yim é rî sê e kí səre mfoné nchot Obhasi jáé. Ka ekpak njí, e kí wom sê ka ochî Obhasi ane chénchén á bhə́p ḿbə́ŋé á kpée na êt.

³Kpe é rî nji sê otîp Obhasi mbi é kpik ó rî buí-buí, a ri mbâ ane mba é bhip ábho.

⁴Mbâ ábho áfo, ntûfâm obhí ka ngun nnyí á tane ábho ḿbə́ŋé. Ábho mba á ká ki ḿbə́ŋé na Jisos, á gbʉ́í ábho á kâ yên ebhát nji é rî ka otîp ogyebhá-ḿbə́ŋé. Otîp mbí ó tóŋe ejík í Jisos Krayis nnyo a ri ejímí Obhasi.

⁵Otîp obhə́ré ó ká joé ó kpê na êt áfoné, kən a ri na Jisos Krayis ka Ntûfâm nnyo, ka obhô obhê, é chəbhe ágbán abhə́né.

⁶A ri Obhasi nnyó nâ a chorê nná se, “Deê ebhát é gbô ka ejírim.” Obhasi nnyó nâ a kaghê êt ebhát ka ḿbə́ŋé se é jóe ebhát oməŋá-ejûm nji é kí toŋe êt ekpak ejík ejê é rúna ka ekpin í Jisos Krayis.

⁷Kən kpe noŋ e ri áno noŋ abhóné, ejûm é ka fáp, Obhasi a karê êt ekpatə́m etûm ejê njí. Ńji é kí toŋe se ekpatə́m ikom mfi í rî ka otîp mbí, ifə́ré asík, kən a ri mfi Obhasi.

⁸Á kí karâ êt oseŋe kpe ka bhaghé ejûm kən á nyə́ne á ká ko érûm. E kí fonâ ofiná-ḿbə́ŋé, kən e kí nyoghâ biji.

⁹Á kí kaghâ êt ka esup, kən é bhó kət, nnyáŋá êt cháŋ. Á kí yuŋâ êt á tubha ka nsi, kən á bhó yui êt.

¹⁰E kí kənâ ekʉ̂ Jisos Krayis ka biji ibhə́ré sê ekpin ejê fə́ne é tóŋe ka biji ibhə́ré.

¹¹Ka nji e nyə́ne mbít, á kí noghâ êt eyúúm chénchén ebhú ka obhô Jisos Krayis. Ńji é yim ekpin í Jisos Krayis é jóe êt ka biji mbi í ka í kpô.

¹²Nâ é fap sê, ekʉ̂ é rî êt ka biji, kən ekpin é rî ên ka biji.

¹³Ka eji e fonê ńtʉgântʉ ḿbə́ŋé ekíím yə́t na yê nnyo a séŋe se, “N chorê, ka n kî ḿbə́ŋé na Obhasi,” êt fə́ne é ki ḿbə́ŋé, nâ ńjə́ne fə́ne e kí chot.

¹⁴É chorá áno e məŋá sê yê nnyo a yimî Ńtâ Jisos Krayis a nyə́me ka ekʉ̂, tîk a yîm êt fə́ne e nyə́me noŋ Jisos, a kô êt na ên a bhák ka ochî obhê.

¹⁵Chénchén njí a ri ka obhô obhə́né sê onobhá-eji Obhasi ó sí ó kpúghí ane etî-etî, ó yîm ane etî-etî á káre ekûp na ejík mbâ Obhasi.

¹⁶Ka obhô mbí, é bhó yighí ḿbə́ŋé. Kpe noŋ e ri áno ane e kí manâ e jak, ka ḿbə́ŋé eyəré, e kí chəbhâ ane afê kpe bhaghé ofú.

¹⁷Echî aŋ? Mô mkpât oseŋe nnyo é yena nná ka ekîm ebhú njí, tîk ó bhak êt na ekpatə́m ejík ka ótúm-ótúm. Ejík nji é kí faŋ nji e kí bhuí oseŋe mbí obhuí.

¹⁸Êt mân é ka yuŋ amə̂t e kî ka iyîm mbi nne a kí yen, kən e kíi a ri ka iyîm mbi ó bhó yen. Echî aŋ? Iyîm mbi o kí yen, í kí kət í bhîp, kən mbi ó bhó yen í kə́ra ka ótúm-ótúm.