Read ejagham 2 Ane korin, echî 5 Bible Online

2 Ane korin, echî 5 - ejagham bible

2 Ane korin, echî 5

¹É məŋe sê njû otop eyəré nnyi sê biji, kpe a gboê ogbo, Obhasi a tʉrî nnyi tat nnyi a kí kət ka ótúm-ótúm, a kî êt ka ósô, nne asík a tʉrî.

²É kət e sómá osómé ka ekpin ejə́ré ka nsi, ka ḿbə́ŋé eyəré a ri sê Obhasi a yim êt é gyé njû nnyi ka ósô.

³Echî aŋ? É gye, é ro joé noŋ ane mba á ká fon biji.

⁴Nji e nyə́ne nná ka ekpin í nsi nnyí, é kət e sómá ka oseŋe mbi é yena. É bhó some ka sê é woma é mághe ńjə́ne, kən é woma sê ekpin ósô nji é bhó man oman, é yóŋé ekpin njí, nji é ka é man.

⁵Yê nnyo a tʉrî êt a kî sê é fôn ejûm njí, a ri Obhasi yê ḿfoné. A káre êt Obhasi Ebhare Ntʉgantʉ se é mə́ŋe sê yê a fî ejûm a kî êt.

⁶Ka obhô mbí, e kí fon osoná-ḿbə́ŋé chénchén ebhú. É məŋé sê nji e kí joé ka biji ibhə́ré mbí, é rî áno ńgô nyáŋé na Ńtâ Jisos Krayis.

⁷Ka nan? Ka ekpin ejə́ré ka nsi nnyí é bhó kere sê ta e yên kən e ri é yûŋ ḿbə́ŋé é kí na Jisos Krayis.

⁸É fon osoná-ḿbə́ŋé nono. Ka obhô mbí, é nóbhe sê é mághe achot í biji ibhə́ré mbí, é jóe noŋ kpe e ri ka ojû obhə́ré na Ńtâ Jisos Krayis.

⁹Nâ mân kpe e ri ka biji ibhə́ré mbí na kpe e rô joé, deê é fôn ka ḿbə́ŋé sê é yîm ejûm nji é kí gyebhé Obhasi ka ḿbə́ŋé.

¹⁰Echî aŋ? Êt chénchén e ri é fap ka ochî esup í Jisos Krayis, eji kpe énê a kí fon kpe ono, kpe obhí, ka nji yê a yimî ka biji ibhê.

¹¹Nji e məŋê echî é nóbhe sê ane á jíghí Ńtâ Jisos, e kí nok ane á jíghí yê. Obhasi a mə́ŋe êt na ndə́p-a-ndə́p. Ń kere bəre ka ḿbə́ŋé eyəné ó məŋe ên êt.

¹²É ká joé sê é noghá é kpó toŋe ên sê êt a ri ane ano, kən é noghá áno sê o súmá ên obhô-ngaŋ ka obhô obhə́ré. Ńji tîk é yîm ên o gyími ên o táme ane mba á jígha a ri ngyím ane, á bhó kep ekpin í nne.

¹³Kpe e ri á gbeghá ekí, a ri ka obhô Obhasi. Kən ájoé e ri na ḿbə́ŋé, a ri ka obhô obhə́né.

¹⁴Ka nan? Okot í Jisos Krayis nâ ó tʉ̂k êt mbá, ka é kâm sê nji yê a kpóe áno mbâ ane chénchén, nâ ane chénchén fə́ne á kpo.

¹⁵Yê a kpóe ka obhô ane chénchén, se ane mba á fon ekpin, á kâ fôn ka obhô ábho, kən á fôn ka obhô obhê nnyo a kpóe ka echî ane, Obhasi a yîm yê a nyə́me ka ekʉ̂.

¹⁶É róghé mân ka mfá-mfá, e kâ kpô sə́ré sê ńnyo nne a ri nná, ka ekpak ekpin í ngun nnyí. Kpe noŋ é raŋ áno mbá é kep Jisos Krayis ka ekpak ekpin í ngun, mfá-mfá é ro kép yê áno.

¹⁷Nâ mân kpe énê nnyo a chə̂m na Jisos Krayis, a chə́bhe ejûm efê, nji təm é chiŋ, nji fê é bha.

¹⁸Chénchén achot mmá á dʉ̂ mbâ Obhasi nnyo ka obhô Jisos Krayis a yîm êt é man ane oyírí abhê é chəbhe ane ekone. A káre êt fə́ne etûm se é yîm ane etat a chə́bhe ane ekone abhê noŋ êt.

¹⁹É fap mân sê ka obhô Jisos Krayis, Obhasi a kí chəbhé njəm a kók ane ngun ka ekone, á bhó kere obhí mbi ngun á yími yê. A sə́re êt se é tíbhí ekpak á kok ane ka ekone.

²⁰Nâ êt mân é chəbhe ane mba á kóe eji Jisos Krayis. Obhasi a kí bhiŋ ên ka otîp mbi é kará ên nná. E kí goré ên ka mbiŋ i Jisos Krayis sê ó fôn ên ekone na Obhasi.

²¹Ka echî ejə́né, Obhasi a yîm yê Jisos Krayis nnyo obhí á ka məŋé, a chə́bhe nyima-obhí. Echî aŋ? Se ka obhô Jisos Krayis, yê a kó ekpin ejə́ré se é rî ka nnyen-i-mbá.