Read ejagham 2 Ane korin, echî 6 Bible Online

2 Ane korin, echî 6 - ejagham bible

2 Ane korin, echî 6

¹Nji é chəm e kí yim etûm na Jisos Krayis, e kí goré ên sê deê o kâ kâm ên onobhá-eji Obhasi ó tán ka chichi.

²Echî aŋ? Yê a chorê se, “N yûk wâ ka ebhú n wóme ń gyím í njəm eya, n nyáŋe wâ ka ofú ń yimá ane á sema.” Yûk ên! Ńgyê ebhú nji Obhasi a wóme a gyímí njəm eyəné. Égyé a ri ofú Obhasi a kí yim ên ó sém.

³É ka wóm nne a yén obhí bhə́t a kpe na etûm ejə́ré nji é kí yim nne a taŋé Obhasi.

⁴Kən noŋ ayimá-etûm Obhasi, e kí toŋe kpe ka bhaghé ejûm é yimá sê êt a ri ayimá-etûm abhê. Kpe oseŋe ó rî nan, kpe é bhóbhe êt nan, kpe é táne êt nan, e kí kəp ḿbə́ŋé.

⁵Á təm êt, á kak êt ka ókúmí, onyʉk ó fâp ka eték, á fî êt. É yim etûm é chiŋi obhô, é ka mbít, é ka njaé.

⁶Kən ka etûm nji é yimá, akôp e kâ fôn, e yimá na aron, e kə́bhá ḿbə́ŋé, e tóŋá onobhá-eji, Obhasi Ebhare Ntʉgantʉ fə́ne a kaghá êt obhô. É yimá na mfoné okot obhə́né,

⁷na ikom mfi Obhasi a karê êt, áfúbhí é bhó səre. Ka etûm njí, ekpin ka nnyen-i-mbá nâ é rî noŋ ejûm enok ejə́ré, nji kpe é gbóe, e jak, kpe nne a yəmê êt enok, e gyími.

⁸Ka ejík na ísonê, atû na nkat, á kébha êt noŋ ane áfúbhí, ńga nji é chorá é rî ka echî.

⁹É rî noŋ ane mba ngun á ká məŋé, kən á məŋe êt nnyen eməŋə́m. E ri noŋ ane mba á kí kpo, kən yên êt mbít, á kí kpəré êt, kən eyúúm nâ á bhó yui.

¹⁰É kət nsae-ńsáe, kən ogyebhá-ḿbə́ŋé obhə́ré ó rî chénchén ebhú. Êt a ri akpák kən e kí yimâ ane etî-etî á gbok efaŋ. E ri noŋ kpe ejûm é ka fon, kən kpe jə́t nji e ri ka eket cháŋ.

¹¹Ên, ane Korin, é sə́re ên achot, kpe yə́t é ka bhə́t. Ḿbə́ŋé eyəré a ri jáé.

¹²Êt é toŋe ên ḿbə́ŋé eyəré chénchén, kən ên nâ ó bhó toŋe êt eyəné.

¹³Deê ń sə́ré noŋ kpe ń səra abhon abhámé bəre deê ên fə́ne ó rə́bhe ên ḿbə́ŋé eyəné ó tóŋé êt.

¹⁴Ka joê ên ejûm jə́t na ane mba á ká ki ḿbə́ŋé na Jisos Krayis. Ekpin efonóm ka nnyen-i-mbá na ekpin obhí á ká joé íríghí fə́t. Ebhát na ejírim í bhó chəm.

¹⁵Bhaghé ejûm nji Jisos Krayis na Satan á fóne chəm-chəm? Cháŋ! Bhaghé ejûm nâ nne nnyo a kíi ḿbə́ŋé na Jisos Krayis a fonê chəm-chəm na nne nnyo á ka kí? Cháŋ!

¹⁶Bhaghé ekubhi nâ ókʉ́rí achot Obhasi ó fóne na ajom? Á ka fon. Êt nâ e ri ókʉ́rí mfoné-mfoné Obhasi. Obhasi a chorê se, “N kí joé ábho ka biji, n jená ka ekam ábho. N kí joé Obhasi ábho. Ábho tîk á jóe ane abhámé.”

¹⁷Ńtâ Obhasi a kpô chot se, “Ka obhô mbí, maghê ên ane ntʉ́ghi mbá, gbût ên na ábho. Ka kə́me ên ejûm akôp kpe jə́t. Tîk n kô ên mân na ogyebhá-ḿbə́ŋé.

¹⁸Tîk n chə́bhe ńsé owəné. Ên o chə́bhe ên abhon abhámé mba ane-arûm na mba ane-akáé. A ri Ńtâ Obhasi ósô nâ a chorê áno.”