Read ejagham 2 Ane korin, echî 7 Bible Online

2 Ane korin, echî 7 - ejagham bible

2 Ane korin, echî 7

¹Atem í ḿbə́ŋé, ka eji Obhasi a chími onono mbí a káre êt, deê é sû ên akôp chénchén é yíghi êt ka ḿbə́ŋé na ńtʉgântʉ eyəré. Deê é kúmi, kpe ekpin akôp e kâ fôn bhúghí-bhúghí, e kará Obhasi ejík.

²Deê ḿbə́ŋé eyəné a joé jáé na êt. Êt kpe obhí na nne yót é ka yim, é ka yim nne kpe yót a gbo, é ka karé oseŋe mbâ nne kpe yót é wóm orʉrí.

³Ḿ bó chot achot mmá chénchén bəre ḿ bíbhí ên, ka ta ń daŋ mbá ń chot bəre ên o ri êt ka ḿbə́ŋé. Kpe ekʉ̂, e kpô na ên. Kpe ekpin, e fôn na ên.

⁴Ń ka fon efup na ên bhúghí-bhúghí. Ên nâ ó yimá ə̂m n súmá obhô-ngaŋ, o kí kak ə̂m ikom kpe-eji. Kpe na oseŋe obhámé, ḿbə́ŋé nnyi á gyebhá ə̂m, a fâŋ a chîŋ.

⁵Ka nan? Kpe ebhú e bháe nnyi Masedoniya, é ka fon oyoá-biji, ka achot á tî á chîŋ mba kpóŋóm na atem á kpoŋa, e foná efup ka ḿbə́ŋé.

⁶Kən Obhasi nnyo á kará ane mba á rî ka oseŋe ḿbə́ŋé, a kâk êt ḿbə́ŋé ányi ka ebháám nji Tayitus a bháe.

⁷Ebháám ejê ńjə́ne-njənê asík nâ é kághe êt ḿbə́ŋé, kən a ri fə́ne ḿbə́ŋé nnyi o kaghê ên yê. A sə́re ə̂m ekpak o wómá ên kpe-eji ó yén ə̂m, ekpak í nsôn á yimá ên na oseŋe mbi n yéne ka obhô obhə́né, na ekpak ó noghá ên sê ó gyímí ên na mme kpe ka jen. Ka obhô mbí, ḿbə́ŋé a gyébhe ə̂m mfá-mfá a chîŋ obhô.

⁸Kpe é rî sê nwet amé nnyi n séŋe ên a kâk ên nsae, ń ka fon nsôn mfá-mfá, ebhú áji m fôn. Echî aŋ? Ń yen mfá-mfá bəre nwet amé ányi á ka karé ên nsae ebhú é râp.

⁹É ká joé sê ń gyebhá ḿbə́ŋé ka ó fon ên nsae. Áno asík. Kən m fonê ogyebhá-ḿbə́ŋé ka nji nsae eyəné a chóe ên o fôn ên nsôn, o mághe ên obhí. Nsae nnyi o fonê ên a ri nnyi Obhasi. Nâ é ká kpo tan ên ka obhô obhə́ré.

¹⁰Ka nan? Nsae á joé nnyi Obhasi, nne a fon nsôn a mághe obhí. Ńji é kí yim yê a sém, á bhó səre se, “A tok ə̂m ee.” Kən ó fon nsae sê nnyi ngun nnyí, ányi á bhak na ekʉ̂.

¹¹Ó ka yén ên noŋ mfá-mfá ka obhô nsae nnyi o fonê ên áno, Obhasi a yîm ên ó chə́bhe o wómá ên na ḿbə́ŋé-a-ḿbə́ŋé ó tóŋé ên sê ó ka mom ên a? Obhí ó ka kpó kot ên bhúghí-bhúghí. Efup é chəbhe é yimá ên na obhí. O wómá ên kpe-eji sê ó yén ên ə̂m. Ó chəbhe ên fə́ne o kaghá ikom ka etûm Obhasi nono. O ri ên fə́ne ngyím ka ekpərə́m kpe énê nnyo á yim obhí kpe ka bhaghé ejûm. Ó toŋe ên kpe ka jen sê ó ka mom ên.

¹²Eséŋém nji n séŋe áno, n séŋe bəre ntûfâm a tóŋé ekpak ên ó kera êt ka ḿbə́ŋé eyəné. Nâ mfoné-mfoné ejûm nji é fáŋe ə̂m ka ḿbə́ŋé kən n sêŋ. É ká garé ojoé nchot i nne nnyo a yimî obhí, na kpe é jóe nnyo á yími yê obhí.

¹³Nâ ejûm mân nji é kághe êt ḿbə́ŋé. Na okaghá-ḿbə́ŋé mbí, ogyebhá-ḿbə́ŋé ó kpo ti ó chiŋ nji Tayitus a sə́re êt ekpak nji o fiî ên yê nono, o yîm ên ḿbə́ŋé eye a nâ.

¹⁴N sə́re yê ta n súmá obhô-ngaŋ bəre nâ ekpin ejə́né. Ên fə́ne ó ka karé ên ə̂m atû. Ńgyê mfá-mfá obhô-ngaŋ obhámé mbi n súmi ka ochî Tayitus ó fap fə́ne ka echî noŋ achot mma é səra ên.

¹⁵Okot mbi Tayitus a fonê na ên ó kí nyighí onyíghí nji á tirá ekpak o kíi ên biji nyamḿ, o yûk ên okpígha-ejûm obhê ka okorá-ḿbə́ŋé obhə́né. Ekpak o fiî ên yê na ejík, ache ó ka chaghé ên.

¹⁶Mfá-mfá ḿ fon ekpatə́m ogyebhá-ḿbə́ŋé, ka ń ka fon efup na ên bhúghí-bhúghí.