Read ejagham 2 Ane korin, echî 8 Bible Online

2 Ane korin, echî 8 - ejagham bible

2 Ane korin, echî 8

¹Atem-abhon-í-nnyen, deê ń sə́ré ên ejûm nji Obhasi a yimî a káre ane bichəme atóbhá Jisos ka Masedoniya ebhú a tóŋe ábho onobhá-eji obhê.

²Ane mbá, kpe noŋ á rî áno akpák, achot fə́ne á təm ábho, ogyebhá-ḿbə́ŋé ábho ó sui ó fuk, ó yim ábho á nyáŋe atem, ḿbə́ŋé á bhó bhəp.

³Ka nan? Kə́n n gyími ntî-isê bəre á kára ka ekpak obhô ábho ó síi. Ka okorá-ḿbə́ŋé ábho, á kí karâ fə́ne é chiŋa obhô ábho.

⁴Á gorá êt na ḿbə́ŋé-a-ḿbə́ŋé, nne a chóe ábho cháŋ, sê é sáŋ ábho á tóp ane Obhasi ka Judiya ka etûm.

⁵É ka məŋé sê kə́n ábho á yîm ka ekpak njí, kən ka ndaŋa-mbá ejûm, á káre biji ábho mbâ Ńtâ Jisos na mbâ eyəré ka ekpak nji Obhasi a wóme.

⁶Ka ekpak njí eróŋ, é səre Tayitus sê ka eji a róghe ndə́p, deê a jeghé ekpatə́m etûm onobhá-eji njí na ên.

⁷Ó gbo ên efaŋ ka chénchén nji ó fon ên. Iyîm ábhi a ri ḿbə́ŋé ekíím na Jisos Krayis, na nchot i nnyo eyəné, na oməŋá-ejûm, na ḿbə́ŋé nnyi o fonê ên sê ó nyáŋe atem, na okot mbi o fonê ên na êt. Gbo ên fə́ne efaŋ ka etûm onobhá-eji Obhasi.

⁸Nji ń chorá áno, ebhín asík. Kən ń noghá bəre noŋ atem á kágha áno biji, deê ên fə́ne ó tóŋé sê okot obhə́né a ri nnyen i ḿbə́ne.

⁹Ên ó məŋe ên onobhá-eji Ntûfâm owəré Jisos Krayis. Kpe noŋ a ri nne-efaŋ, a chə́bhe mkpák ka echî ejə́né se okpák mbí ó yîm ên ó gbô efaŋ.

¹⁰Deê ń káre obhámé otaá-etí ka nchot nnyí. Tîk é nôp é chîŋ mfá-mfá ó jéghe ên ejûm nji o róghe ên eya éməné ńgô. O ri ên araŋá-mbá ane ka eyimím ejûm njí. O ri ên fə́ne araŋá-mbá ane mba o yimî ên ka okorá-ḿbə́ŋé.

¹¹Deê ikom mfi ó kaghá ên í jóe noŋ okará-ḿbə́ŋé mbi o fonê ên, ó jéghe ên etûm njí. Yim ên na nji-nji o fonê ên mfá-mfá.

¹²Ájoé ó fon ên okorá-ḿbə́ŋé, Obhasi á bhó bhəp é chíŋi ka ekpak obhô obhâ ó síi.

¹³Ḿ bó nok bəre ane etat á jóe, biji í nak ábho, ibhə́né í fubha. Kən ka nchot ane á jóe ekan,

¹⁴deê nji o fonê ên áno mfá-mfá, é súi é fúk, ó káre ên atem mba á ká fon. Ebhú fə́ne ên ó joé ên ka eket, ábho á fôn é tî, tîk á nyáŋe ên.

¹⁵Nâ noŋ á séŋe sê, “Nne nnyo a bhúbhi é tî é chîŋ, a bhâ fôn é bhik yê obhik. Kpe nne nnyo a bhúbhi mkpât, a fôn é bhik.”

¹⁶Kən deê ekûp é jóe é káre Obhasi nnyo a yimî Tayitus a fôn ḿbə́ŋé ányi a nyáŋé ên.

¹⁷Cháŋ sê kpe echóóm ejə́ré ńjə́ne-njənê nâ é yími Tayitus a kâm a bhá mbâ eyəné, kən a ri okorá-ḿbə́ŋé obhê eróŋ. A kə́ bha na ekpatə́m ogyebhá-ḿbə́ŋé.

¹⁸E kí tum fə́ne ntem-mmon-i-nnyen nnyo tat a bhá na Tayitus. Ane bichəme atóbhá Jisos ka ngûm á jígha yê ka etûm nji á yimá ka esə́rə́m otîp ogyebhá-ḿbə́ŋé.

¹⁹Kpe nchot otîp ogyebhá-ḿbə́ŋé ńnyə́ne-nnyənê asík. A ri fə́ne ane echəme atóbhá Jisos nâ á sáŋe nne nnyó sê a jen na êt é yîm etûm onobhá-eji. É yimá etûm njí sê é káre ejík mbâ Ńtâ Jisos Krayis, é tóŋe fə́ne sê é timá onono.

²⁰Ḿbə́ŋé eyəré a ri se e kâ yîm ejûm nji nne a kí səre se é yim obhí ka ekpatə́m ekəp nji é yimá nná etûm.

²¹Amə̂t amə́ré á rî ka eyimím ejûm nji é rî nono ka ochî Ńtâ Jisos na atem-ane eróŋ.

²²E kí tum fə́ne ntem-mmon-i-nnyen owəré yót a kpe ábho. Yê nnyó mfá, é gae kpe bhaghé ebhú, é yen sê a fôn ḿbə́ŋé se yê a nyáŋé êt. Kən mfá-mfá a fôn ḿbə́ŋé enyáŋám ányi a chíŋi kpe ndaŋa-mbá, ka á ka kpó fon kpe mkpât efup na ên.

²³Ájoé mbâ Tayitus áfo, yê a ri ntem omé, nnyo é yimá etûm njí jə́t ka obhô obhə́né. Mba atem-abhon-í-nnyen mba á bhak na yê, ábho á rî noŋ ágbán echəme atóbhá Jisos nji é rî nâ ejík í Ńtâ Jisos Krayis.

²⁴Nâ tóŋe ên ábho okot, tîk ane echəme atóbhá Jisos á kâm ka etʉri á mə́ŋe fə́ne sê é ka sə́ré áfúbhí nji é sum obhô-ngaŋ ka obhô obhə́né.