Read ejagham Ane garasiya, echî 1 Bible Online

Ane garasiya, echî 1 - ejagham bible

Ane garasiya, echî 1

¹Nwet nnyí a dʉ mbâ amé, Pol, nnyo ḿgbán i Jisos Krayis. É ká dʉ ka obhô nne kən n jóe ḿgbán i Jisos Krayis. Nne fə́ne asík a sáŋe ə̂m se ń jóe. Kən a ri Jisos Krayis yê ḿfoné na Obhasi Ńsé nnyo a yimî yê a nyəmé ka ekʉ̂ nâ á túmi ə̂m.

²Chénchén atem-abhon-í-nnyen mba á rî ngá na mme é kpê na mme ḿfoné, é seŋ é tum ágo mbâ bichəme atóbhá Jisos ka Garasiya.

³Deê Obhasi Ńsé owəré na Ńtâ Jisos Krayis á tóŋé ên onobhá-eji, á káre ên fə́ne enare.

⁴Kən a yim êt é sém ka ngun obhí nnyí, Jisos Krayis a kâm etûm Obhasi nnyo a ri Ńsé owəré, a kpô ekʉ̂ ka obhô obhí obhə́ré.

⁵Deê ejík é jóe é káre Obhasi Ńsé ka ótúm-ótúm. Áno.

⁶Efup é gye ə̂m na ên. Mfá-mfá njí ta o kí maghé ên yê nnyo a bhiŋî ên na onobhá-eji Jisos Krayis, o kí tobhâ ên a ri otîp etat egyê a?

⁷Ka etʉri, otîp ogyebhá-ḿbə́ŋé etat cháŋ kpe echáŋám, kən ane nâ á wóma á chóbhe ên echî, á yóŋé otîp ogyebhá-ḿbə́ŋé Krayis.

⁸Kən ájoé kpe êt, kpe a ri énjel ka ósô nâ á sə́ra ên otîp etat mbi ó ká jen ekan noŋ mbi e sə́re ên nná, deê é bhíp ntʉ́ghi nne ányo ka ótúm-ótúm.

⁹Ka ekpak nji é raŋ mbá é chot, n kí kpo chot mfá-mfá bəre nne nnyo á səre ên otîp ogyebhá-ḿbə́ŋé Krayis mbi ó ka jen ekan-ékân na mbi o yúghi ên, deê é bhíp nne ntʉ́ghi ányo ka ótúm-ótúm.

¹⁰Ń woma bəre nne a kot ə̂m a? Cháŋ. A ri Obhasi nâ ń woma. Ń yimá bəre ta é gyébhe nne ka ḿbə́ŋé a? Ájoé ń noghá bəre é gyébhe a ri nne ka ḿbə́ŋé, kə́n égyé ń ka joé ḿgbán i Jisos Krayis.

¹¹Atem-abhon-í-nnyen, n kí wom ên ó mə́ŋe sê otîp ogyebhá-ḿbə́ŋé Obhasi mbi n sə́re ên ó ka dʉ mbâ ntem-nne.

¹²Ń ka kó mbâ ntem-nne, á ká kpi ə̂m okpí, kən a ri Jisos Krayis nâ a tóŋe ə̂m.

¹³Nne owəné nnyo a rô yúk ekpin ejámé ebhú áji cháŋ. Nâ ebhú ń tobha Obhasi ka erû ejə́ré, êt ane Jus. O mə́ŋe ên ekpak nji ń kará echəme ane Obhasi ekpatə́m oseŋe, n noghá bəre ń chát ábho.

¹⁴Ochî mbi n jiî ka nchot Obhasi nnyí, ka erû ejə́ré ane Jus, atem ekan abhámé á ká ti mba á síi. Ń ka chaghé ache kpe ofú bhə́t ka erû ane-atəm abhə́ré.

¹⁵Kən Obhasi nnyo a sáŋe ə̂m kən á jí ə̂m, a bhîŋ ə̂m ka onobhá-eji obhê se ń yîm etûm ejê.

¹⁶Nji ebhú é bhíghi, a gyébhe ḿbə́ŋé a tóŋe ə̂m Mmon owe se ń jî mbâ ane nték ajéné ń jí sə́ré ábho achot í Mmon nnyó. Ka ebhú áji, ń ka bhə́p kpe ntem-nne bəre a kpí ə̂m.

¹⁷Ń ka ji fə́ne kpe ka Jerusarem bəre ń jí yén kpá ábho mba á ráŋe mbá á jóe ágbán í Jisos Krayis, kən mme ń jóe. M mághe n jak ngyím nnyi Arabiya, n chə́bhe njəm nnyi Damakus.

¹⁸Nji nyâ ésá a chíŋi, n jak nnyi Jerusarem bəre é jí mə́ŋe atem na Pita. N káe ágo agəm ábháe.

¹⁹Nji n jiî, ń ka yén ḿgbán i Jisos etat é ká chiŋi Jems, nnyo mmon-i-nnyen i Ńtâ Jisos.

²⁰Obhasi átíŋ a mə́ŋe se áfúbhí asík ń seŋa nná.

²¹M mághe mân áfo n jak ebhat í Siriya na Sirisiya.

²²Ka ebhú njí, echəme atóbhá Jisos ka Judiya á nyə́ne á ká yen ə̂m na amə̂t.

²³Á yúgha ə̂m oyúk ka ekpak ane á chóra sê, “Nne nnyo á kará êt nná oseŋe ebhú áji se yê a chát echəme ejə́ré, a chə́bhe a sə́rá ane nchot nchane.”

²⁴Á káre Obhasi nkat kpe-eji ka obhô obhámé.