Read ejagham Ane garasiya, echî 2 Bible Online

Ane garasiya, echî 2 - ejagham bible

Ane garasiya, echî 2

¹Nyâ a chíŋi ófó na énî kən m kpô ji Jerusarem ka ejen. N jiî na Banabas na Tayitus.

²N jiî, ka Obhasi nâ a sə́re ə̂m ka efóŋé ndem se ń jî ágo. Ebhú n jiî, e kúmi na ane-echî echəme atóbhá Jisos ka ebhə̂t n sə́re ábho jə́t na jə́t é kpê na otîp ogyebhá-ḿbə́ŋé Obhasi mbi ń jená m kpík mbâ ane nték ajéné. Ń ka wóm bəre etûm nji ń daŋ mbá ń yim na nji ń yimá nná, é tán ka chichi.

³Kən Tayitus nnyo a ri na mme, kpe a ri nne Grik, á ká fi yê ka ikom sê ta a kîm nkîm.

⁴Á chóre achot mmá ka obhô ane etat mba á ríra ane sê ábho a ri atem-abhon-í-nnyen. Ane mbá á gyée echəme ejə́ré, nne nnyo a məŋê cháŋ. Á nóne á gyê na íkíkéré sê á yén ekpak êt e yimî kən e chə̂m na Jisos Krayis, e sêm ka osʉ́ŋ ebhín í Jus. Á məŋé, á kí wom mân mbá á fî êt ka osʉ́ŋ mbí.

⁵Kən é ka karé ábho obhô kpe ka ofú bhə́t, ka é wom sê mfoné nchot Obhasi a sí ên ka ekpak a dʉ mbâ Obhasi.

⁶Nji m kpíi achot mmá mbâ ane mba á rî noŋ ane-echî, ane mbá á ká kpo fon kpe ejûm etat nji choróm. Ebhú n jiî mbâ ábho, ń ka kó ábho bəre á chiŋi ochíŋ, ka ebhú Obhasi a kí taŋ nne, á bhó kep yê ka ochî.

⁷Ane-echî á ká firi, á chə́bhe njəm á kâm sê Obhasi a káre ə̂m otîp obhê ń sə́ré ane. Á yên sê a tûm ə̂m ń jí kpí otîp mbí mbâ ajéné Jus ekan-ékân noŋ a karé fə́ne Pita se a kpí ane Jus.

⁸Echî aŋ? Yê yót nnyo a karê Pita etûm se a kpí ane Jus nâ a karê ə̂m fə́ne se ḿ kpí ajéné.

⁹Jems na Pita na Jon mba atem-abhon-í-nnyen á kébha sê nâ ane-echî, á yên sê Obhasi a karê ə̂m etûm njí, á kô ə̂m na Banabas noŋ atem-abhon-í-nnyen eróŋ. E káre atem obhô noŋ eriŋ ochəma-biji. E kúbhi sê êt é jî na okpígha-ejûm í Jisos Krayis mbâ ajéné Jus, ábho á jî mbâ ane Jus.

¹⁰Kən é mághe, á sə́re êt a ri sê e kâ gyíni enyáŋám akpák. Nâ ejûm fə́ne nji m fonê ka ḿbə́ŋé bəre tîk n yimá.

¹¹Ebhú Pita a bháe nnyi Antiyok, n gyími n sə́re yê ka ochî obhê bəre a gbô, ka ekpin nji á yimá é toŋe jáé sê a gbô.

¹²A gboê ka nan? Nji Pita a jiî Antiyok a róghe edíím édî na ajéné Jus. Kən ebhú etʉ̂ ane Jus mba Jems a túmi á jí kpúghí yê ka eték áji, Pita a yóŋe a chə́bhe a taŋá édî edíím na ane mbá. Echî aŋ? A kí fup ane Jus ka erû ábho é fíi sê ta nne a kîm nkîm kən o chə̂m édî na yê.

¹³Nji Pita a yimî ekpin áfúbhí njí, atem-abhon-í-nnyen mba ngá fə́ne mba á rî ane Jus á tôp ekát ejê. Kpe Banabas eróŋ, a tôp ábho ka ekpin áfúbhí njí.

¹⁴Nji m kpô yén bəre ekpin njí é ká jen ka mbá otîp ogyebhá-ḿbə́ŋé Obhasi, n dúi ngyím ka ochî ane chénchén n sə́re Pita bəre, “Ájoé we ka nne Jus o kí yim ekpin noŋ ajéné, é kí yim nan ó sə́ré ajéné se á tóp erû ane Jus?”

¹⁵Ka etʉri, á jíi êt ane Jus, êt ajéné asík mba Jus á bhíŋa sê ane abhí.

¹⁶Kən kpe é rî áno, é məŋe sê ekíím ebhín asík nâ é kí yim Obhasi a kô ekpin í nne se é rî ka nnyen-i-mbá. Kən Obhasi a kó ekpin í nne se é rî ka nnyen-i-mbá, a ri a kí ḿbə́ŋé na Jisos Krayis. Êt eróŋ é ki ḿbə́ŋé na yê sê Obhasi a kó ekpin ejə́ré se é rî ka nnyen-i-mbá. Ebhín asík efiím, ka ebhín efiím é bhó yim Obhasi a kó ekpin í nne kpe yót se é rî ka nnyen-i-mbá.

¹⁷É kó sê, nji e kí nok sê é chə̂m na Krayis, ekpin ejə́ré é jóe ka nnyen-i-mbá kən é bhá fôn obhí, nâ-ngá kə́n e sə́re mân sê Krayis a kí yim êt e yimá obhí a? Áfúbhí! Krayis á bhó yim nne a yim obhí.

¹⁸Ń taŋe ebhín ane Jus, kən é kpo kumí n chə́bhe njəm n kí fi ebhín njí bəre nâ ekpatə́m ejûm, áfo nâ ḿ gbo.

¹⁹Mbâ amé, ó chot o kpê na ebhín, ḿ kpo. Ebhín njí nâ é yúi ə̂m. M kpóe bəre ḿ fôn ekpin ń káre Obhasi.

²⁰A ri noŋ m kpóe na Jisos Krayis ka ego. Nâ mfá-mfá, ekpin nji m fonê, ejámé asík, kən a ri nji Krayis nnyo a ri ə̂m ka biji. Ḿ foná ekpin njí mfá-mfá ka ń ki ḿbə́ŋé na Mmon Obhasi nnyo a korê ə̂m, a káre ekpin ejê se ń sém.

²¹Ḿ bó ko onobhá-eji Obhasi noŋ ejûm í chichi. Ájoé a ri ebhín efiím nâ é kí yim Obhasi a kó ekpin í nne se é rî ka nnyen-i-mbá, echî mân nji Krayis a kpóe ekʉ̂ a ri jen? Echî cháŋ.