Read ejagham Ane garasiya, echî 3 Bible Online

Ane garasiya, echî 3 - ejagham bible

Ane garasiya, echî 3

¹Ên ane Garasiya, énə́mé jen nâ é rî ên ka echî? A ri ichóe a? To á sə́re ên jáé ekpak á kúmi Jisos Krayis ka ego?

²Deê ḿ bə́p ên kpá. Á káre ên Obhasi Ebhare Ntʉgantʉ ka ó ki ên ebhín, kən ka o kíi ên ḿbə́ŋé?

³Ó nəma ên jen? O róghe ên ndə́p ekpin efê njí na ikom Obhasi Ebhare Ntʉgantʉ, nji ó woma ó jéghe ên nâ ifə́né ikom a ri jen?

⁴Ekpatə́m oseŋe mbi o yéne ên, a ri ka chichi a? Ń ka kéré bəre a ri ka chichi, echî é rî.

⁵Obhasi nnyo á kará ên Ebhare Ntʉgantʉ, a yimá ntûm okpógha-biji ka ekam ejə́né, á yimá nná ka ó kik ên ebhín kən a ri ka ḿbə́ŋé nnyi o kíi ên na otîp ogyebhá-ḿbə́ŋé obhê?

⁶Tit ên ekpak á séŋe á kpê na Abraham sê, “A kíi ḿbə́ŋé na Obhasi, nâ ńjə́ne Obhasi a kóe ekpin ejê sê é rî ka nnyen-i-mbá.”

⁷Məŋê ên mân sê mfoné-mfoné abhon Abraham a ri ane mba á kíi ḿbə́ŋé na Obhasi.

⁸Á seŋ ta éməné sê Obhasi tîk a kô ekpin ajéné Jus se é rî ka nnyen-i-mbá ka á kíi ḿbə́ŋé na yê. Nâ ńjə́ne á sə́re Abraham otîp ogyebhá-ḿbə́ŋé mbí kən kpe ebhú é sí sê, “A ri ka obhô obhâ nâ Obhasi a kí toŋe enare mbâ nték i ngun fép.”

⁹Nâ é fap sê ane mba á kíi ḿbə́ŋé na Obhasi, Obhasi a kí toŋe ábho enare noŋ a tóŋe Abraham, nnyo a kíi ḿbə́ŋé na yê.

¹⁰Ane chénchén mba á kîk ḿbə́ŋé na ebhín, á kágha áno biji a ri ka nchot. Echî aŋ? Á séŋe sê, “Deê é bhíp nne kpe nnyón nnyo á bhó top chénchén ebhín nji á séŋe ka nwet Obhasi.”

¹¹É rî jáé mfá-mfá sê ebhín asík é kí yim Obhasi a kó nne kpe yót se a fôn ekpin ka nnyen-i-mbá, ka á seŋ sê, “Nne nnyo Obhasi a kí ko se ekpin ejê é rî ka nnyen-i-mbá a ri nnyo a kíi ḿbə́ŋé na yê.”

¹²Ebhín é ká fon kpe ejûm é kpe na ḿbə́ŋé ekíím na Obhasi. Nan? Á séŋe sê, “Nne nnyo á yimá chénchén nji ebhín é wóme, á foná ekpin fə́ne ka ńjə́ne.”

¹³Jisos Krayis a yighî êt ka nchot nnyi ebhín é kághe êt. A kâk biji ibhê ka nchot nnyí ka obhô obhə́ré ka ekpak á séŋe sê, “Nne nnyo á kí tʉghi yê ka ósô étí, a kâk biji ka nchot.”

¹⁴Jisos Krayis a yighî êt ka nchot nnyí se enare nji Obhasi a chimî nná Abraham é jóe fə́ne é káre ane nték ajéné ka obhô obhê. Tîk e fôn fə́ne Obhasi Ebhare Ntʉgantʉ nnyo Obhasi yê ḿfoné a chimî, ka e kíi ḿbə́ŋé na yê.

¹⁵Atem-abhon-í-nnyen, é kó ên kpá egaé ka ekpin í ngun. Ájoé ane ábháe á kumí á kam sê á yîm ejûm, á nyére indəré, nne nnyo a kí kpo yoŋe ngyím ábho cháŋ. Nne fə́ne nnyo a kí kpe ejûm etat ka etím cháŋ.

¹⁶Obhasi a chími a káre Abraham na eyábhé-mmon owe. Obhasi á ka chimí se, “Mbâ biyábhé-abhon abhê,” nâ é fáp sê á ti otí. A sə́re nná se mbâ eyábhé-mmon. Nâ se é ká chiŋi yót. Eyábhé-mmon nnyó yót a ri Jisos Krayis.

¹⁷Ejûm nji ń woma bəre ó kâk ên mfá ka echî a ri se, Obhasi ta a chími ejûm njí é ka kpe nyâ ntem-esam njəm nyâ esam na ófó (430) kən ebhín é bhá. É toŋe sê ebhín njí é ká taŋe nji Obhasi a chimî. Nji Obhasi a chimî é nyə́ne noŋ é rî.

¹⁸Ka nan? Ájoé Abraham á foná ekəp njí ka a kíi ebhín, ekəp njí é ká kpo joé ejûm nji Obhasi a chimî. Kən Obhasi a karê Abraham ekəp njí, ka a chími ka onobhá-eji obhê se yê a kí karé yê.

¹⁹Echî ebhín mân a ri jen? Á kpée ebhín á tóŋé nne ejûm nji á bhíŋa sê obhí eyimím. Sê é jóe tata Eyábhé-mmon Abraham nnyo Obhasi a chimî nná a bhák. A ri baénjel nâ á kóe ebhín njí á káre Mosis nnyo a gyím ka étíŋanti a kók mbâ Obhasi a kará mbâ ane.

²⁰Ájoé ngyíma ka étíŋanti a ri, nâ njəm a ri ébháe. Kən Obhasi a ri yót, á bhó wom ngyíma ka étíŋanti.

²¹Nâ é fap mân sê ebhín é ká kam na ejûm nji Obhasi a chimî Abraham a? Áno asík. Ájoé sê ebhín kpe jə́t é rî nji kə́n é káre nne ekpin, ntʉ́ghi ebhín njí é bhíghi fə́ne eyimím ekpin í nne é jóe ka nnyen-i-mbá ka ochî Obhasi. Kən ntʉ́ghi ebhín njí cháŋ.

²²Á séŋe sê kpe jen ka ngun nnyí é rî ka óséré obhí. Nâ é fap sê ekpin nji Obhasi a chimî, é kí joé é káre a ri ane mba á kíi ḿbə́ŋé na yê. A chimî a káre ḿbə́ŋé ekíím nnyí sê ane á kí na Jisos Krayis.

²³Kən nchot i ḿbə́ŋé ekíím nnyi a bhá, ebhín nâ é bhóbhe êt na ikom noŋ á kúmi êt ka ókúmí ta Obhasi a tóŋe nchot i ḿbə́ŋé ekíím.

²⁴Ebhín nâ é bhábhe êt tata Jisos Krayis a bhák, se ka ḿbə́ŋé ekíím na yê, Obhasi a kó ekpin ejə́ré se é rî ka nnyen-i-mbá.

²⁵Nji nchot i ḿbə́ŋé ekíím nnyí a bháe áno, ebhín asík é kpôk obhábhé êt.

²⁶Nji o kíi ên ḿbə́ŋé na Jisos Krayis, ó chəbhe ên abhon Obhasi chénchén.

²⁷Ka nan? Á fuk ên ayép, ó chəm ên na Jisos Krayis, ó ko ên fə́ne ekpin ejê.

²⁸Nne nnyo á kí saŋ cháŋ, kpe o ri nne Jus, kpe o ri njéné, kpe nsʉ́ŋ, kpe mmon, kpe nne-nkáé, kpe nne-ndûm. Ên chénchén a ri ejûm jə́t na Jisos Krayis.

²⁹Ájoé mân ên na Jisos Krayis a ri ejûm jə́t, nâ ên a ri biyábhé-abhon Abraham. O kí fon ên fə́ne ekpin nji Obhasi a chimî yê.