Read ejagham Ane garasiya, echî 4 Bible Online

Ane garasiya, echî 4 - ejagham bible

Ane garasiya, echî 4

¹Kən məŋê ên sê mmon nnyo a kí ko eji ńsé owe, ka eji a nyə́ne mmonche, a ri áno noŋ nsʉ́ŋ kpe noŋ iyîm í ńsé chénchén í rî ibhê.

²Echî aŋ? A ri ka óséré ane mba á gyêk yê tata ofú ó sî mbi a kí fon iyîm mbí ka ekpak Ńsé a gaê a kî.

³Nâ noŋ é rî fə́ne na êt. Ebhú e nyə́ne abhonche ka achot Obhasi, e ri ka osʉ́ŋ ikom íkíkéré ngun nnyí.

⁴Kən nji ebhú é bhíghi, Obhasi a tûm Mmon owe nnyo nne-nkáé a jíi. Mmon nnyó fə́ne a joê ka óséré ebhín ane Jus.

⁵Obhasi a túmi Mmon nnyó se a yighí ane mba á rî ka óséré ebhín, a yim ábho á chə́bhe abhon abhê.

⁶Ka etóŋóm se ên a ri abhon Obhasi, a tûm ên Ntʉgantʉ Mmon owe ka ḿbə́ŋé eyəné a kúghá se, “Ńsé omé, Ńsé omé.”

⁷Nâ ka obhô Obhasi, ó ka kpó joé ên asʉ́ŋ, ó chəbhe ên abhon abhê. Ájoé ó chəbhe ên abhon abhê, nâ tîk a káre ên chénchén nji a kíi mbâ abhon abhê.

⁸Ofú ábhi nji ó ka məŋé ên Obhasi, o ri ên ka osʉ́ŋ ikom í ngun. Ó kebha ên ikom í ngun mfí sê Obhasi obhə́né, kən áfo a ri áfúbhí.

⁹Mfá-mfá njí ó məŋe ên Obhasi. Ên asík, a ri Obhasi nâ a məŋê ên. Jen nji o kí wom ên ó kpó top ên ikom íkíkéré ngun mfi í ká fon nnyen ikom, í rî éfébhé? Ó woma ó chə́bhe ên njəm jen ó kpó joé ên asʉ́ŋ ikom mfí?

¹⁰Ó kebha ên ḿbi ofú sê ofú oyúp, ńnyi nnyam-ósô sê nnyam-ósô nyúp, ńji ebhú sê ebhú eyúp, ńji eyâ sê eyâ eyúp.

¹¹Efup é kí yim ə̂m ka é rî ə̂m bəre ń yim etûm í chichi ka ekam ejə́né.

¹²Atem-abhon-í-nnyen, n kí goré ên bəre ó jóe ên noŋ mme, ka ofú ábhi mme n di noŋ ên. Ebhú n di ágo, ó ka yim ə̂m kpe obhí bhə́t.

¹³Tit ên sê n sə́re ên otîp ogyebhá-ḿbə́ŋé Obhasi ebhú ndaŋa-mbá, ka emaŋé nji m fonê é káre ə̂m mmon ebhú.

¹⁴Kpe noŋ emaŋé ejámé é káre ên ekpatə́m obhúrá-echî, ó ka jiŋ ə̂m ó mághe átíŋ. Ó ka gyiní ə̂m. Kən o kô ə̂m na ogyebhá-ḿbə́ŋé noŋ kpe o kóe ên énjel. Ka etʉri, o kóe ə̂m noŋ kpe ó kok ên Jisos Krayis yê ḿfoné.

¹⁵Ebhú áji o fonê ên ekpatə́m ogyebhá-ḿbə́ŋé ka obhô obhámé. Mfá-mfá, jen é kpô yim? Ka etʉri, ebhú áji kpe kə́n n sə́re ên bəre ó kpághe ên amə̂t amə́né ó káre ə̂m, kə́n o yîm ên.

¹⁶Átíŋ mfá-mfá ń chəbhe nne-ebhan ka ń səra ên nji é rî ka echî?

¹⁷Ane mbá mba á jéna nná á rirá ên sê á kot ên, n kí səre ên bəre íkíkéré ḿbə́ŋé ábho cháŋ nono. Á nógha áno se mme na ên é chát, ó tóŋé ên ábho okot.

¹⁸Ejûm ebhí asík nji atem á kí toŋe okot na atem ájoé á fon nnyen íkíkéré. Nâ noŋ ń woma o tóŋá ên okot chénchén ebhú, é ká joé sê tata n jóe.

¹⁹Abhon abhámé, nsae nnyi a nyə́ne ə̂m ka obhô obhə́né, a kí nok ə̂m noŋ ojî ó nógha nne-nkáé. Ń woma bəre ta ó fôn ên ekpin í Krayis.

²⁰Á kó ə̂m sê n di ágo na ên mfá-mfá, kə́n m mə́ŋe ńgyímí nnyi n kí ko na ên. Ekpin ejə́né é kí yim ə̂m efup kpe-eji.

²¹Ên ane mba sê ó tobha ên ebhín, ó bhó yuk ên tîk ejûm nji ebhín é chóra?

²²Á séŋe sê éməné Abraham a fonê abhon-arûm ábháe. A jíi mmon yót na nkáé owe nnyo nsʉ́ŋ a kamá Aga. Nnyo ngá a jíi na Sara. Sara nsʉ́ŋ asík.

²³Mmon nnyo nsʉ́ŋ, a jíi yê ka ekpak á jîk nne. Kən mmon nnyo ngá á jíi yê ka Obhasi nâ a chimî a káre Abraham se tîk a fôn mmon nnyó.

²⁴Ḿfa e kóe áno noŋ egaé. Ane-akáé mbá ábháe á rî ka ńgyímí ébháe nnyi Obhasi a fonê na ane. Aga, ka nne-nkáé nsʉ́ŋ, a ri ka ńgyímí nnyi Obhasi a kóe na Mosis ebhú áji ka egúí nji á bhíŋa sê Sinayi. Məŋê ên sê á jíi mmon í nsʉ́ŋ nnyó ka osʉ́ŋ.

²⁵Aga nnyó a ri egúí Sinayi ka ebhat Arabiya. Yê nâ eték í Jerusarem nji é rî na êt égyé. Eték í Jerusarem na ane abhê á rî fə́ne áno ka osʉ́ŋ ebhín ane Jus.

²⁶Kən mfoné-mfoné eték Obhasi nji é rî nâ Jerusarem ka ósô, cháŋ ka osʉ́ŋ. Nâ mfoné-mfoné nnyen nnyo a jíi êt.

²⁷Echî aŋ? Á séŋe sê, “Ngum i nne-nkáé, gyebhê ḿbə́ŋé. Ên mba o nyə́ne ó ka yén ên oseŋe ojî, kûk ên na ogyebhá-ḿbə́ŋé. Ka jen? Nne-nkáé nnyo ndûm a maghê yê, a kí fon abhon a chíŋi nnyo a ri na ndûm.”

²⁸Atem-abhon-í-nnyen, ên a ri abhon mba Obhasi a chimî noŋ a chimî Isak mbâ Abraham.

²⁹Ka ebhú áji mmon nnyo á ká ji ka ikom Obhasi Ebhare Ntʉgantʉ, a kí karé oseŋe mbâ mmon nnyo á jíi ka ikom Obhasi Ebhare Ntʉgantʉ. É rî ekan kpe égyé.

³⁰Kən á séŋe sê jen? To á séŋe sê, “Bhîm nsʉ́ŋ na mmon owe, ka mmon i nsʉ́ŋ á bhó kirí iyîm i ńsé na mfoné mmon.”

³¹Atem-abhon-í-nnyen, nâ êt mân abhon í nne-nkáé nsʉ́ŋ asík. Êt a ri abhon í nne-nkáé nnyo á ka joé ka osʉ́ŋ.