Read ejagham Ane garasiya, echî 5 Bible Online

Ane garasiya, echî 5 - ejagham bible

Ane garasiya, echî 5

¹Atem-abhon-í-nnyen, êt mfá-mfá é sem. Krayis a yîm êt é sem. Nâ gyími ên akát á sí nsi. Ka kpó kam ên ó gbô ên ka osʉ́ŋ.

²Yûk ên nono! Mme Pol, n kí səre ên bəre ó kere ên sê ta ó kîm ên nkîm, nâ nji Krayis a yimî a káre ên é ká kpo fap kpe ejûm.

³Deê ń yîm ên ó mə́ŋe sê nne á ki ḿbə́ŋé se ta á kîm yê nkîm, nâ a ri a tóp chénchén ebhín ane Jus, kpe jə́t á bhó maghé.

⁴Ên mba ó kera ên sê Obhasi a kó ekpin ejə́né se é rî ka nnyen-i-mbá ka ó ki ên ebhín, məŋê ên sê ó ka kpó joé ên na Krayis. Onobhá-eji Obhasi ó ro kpó nyaŋe ên.

⁵Kən êt, é ki ḿbə́ŋé sê Obhasi Ebhare Ntʉgantʉ nâ a kí yim Obhasi a kó ekpin ejə́ré se é rî ka nnyen-i-mbá. Ka nan? É yuŋ ḿbə́ŋé é ki na Jisos Krayis,

⁶ka na Jisos Krayis kpe ó kím nkîm, kpe o kâ kîm, áji asík é rî ejûm. Mfoné ejûm a ri ḿbə́ŋé ekíím nnyi a tóŋe ka okot mbi e fonê na atem-ane.

⁷Mbôp nnyí o kí yimâ ên nono. Énê mân a rirî ên kən ó ro top ên mfoné otîp Obhasi?

⁸Obhasi asík a rirî ên. Yê a bhiŋî ên se ó jóe ên ane abhê.

⁹Á sə́re sê, “Mô nchot i mbí a kí bhibhi ekam ane.”

¹⁰Na Ńtâ Jisos Krayis, ń ka fon efup, ḿ məŋe bəre íkíkéré ifə́ré í kí joé fə́t. Nne ányo nnyo á woma a yóŋé ên ḿbə́ŋé, kpe a ri énê, Obhasi tîk a kpə́re yê.

¹¹Atem-abhon-í-nnyen, ájoé n nyə́ne n sə́rá ane bəre ta á kîm nkîm kən á jóe ane Obhasi, jen mân nji ane Jus á nyə́ne á kará ə̂m oseŋe? Ájoé n nyə́ne n sə́rá ane ka ekpak njí, nâ nji ḿ kpik áno ane nchot ekʉ̂ Jisos ka ego, é bhó bha na onyʉk.

¹²Deê ane mba á kára ên áno oseŋe nchot i nkîm, á jî ochî á fâ biji ábho!

¹³Atem-abhon-í-nnyen, Obhasi a bhiŋî ên se ó sém ên. N kí goré ên bəre o kâ kô ên esémém njí sê o ri ên ka biji ibhə́né o yimá ên nji é bhíghi ên ka ḿbə́ŋé. Kən deê okot ó yîm ên ó nyáŋé ên atem.

¹⁴Echî aŋ? Chénchén ebhín Obhasi é rî ka nchot nnyí yə́t nnyi sê, “Kot ntem-nne ka ekpak nji o korê biji ibhâ.”

¹⁵Kən ájoé o kí chəbhé ên onyam etə́m mbi ó kaghá ên atem bifú, kó ên ebhú, ka ó ro məŋé ên, o kí yui ên atem.

¹⁶N kí səre ên mân bəre ó káre ên biji mbâ Obhasi, Ebhare Ntʉgantʉ a tʉ ên mbá, é ka joé ka ekpak é bhíghi ên ka ḿbə́ŋé.

¹⁷Echî aŋ? Íkíkéré ḿbə́ŋé na mfi Obhasi Ebhare Ntʉgantʉ cháŋ ka ekone. Ḿbə́ŋé na Ebhare Ntʉgantʉ á bhó kam na ntem. Ka obhô mbí, kpe o wóme ên ó yîm ên ono, ó bhó yim ên.

¹⁸Nne nnyo Ebhare Ntʉgantʉ á tʉk yê mbá, ebhín é ká fon obhô na yê.

¹⁹Achot í íkíkéré ḿbə́ŋé á rî jáé: ekun egboóm, na ndibhí, na ekpin ísonê;

²⁰achot ajom na ojê, atem ebhanám, okpóŋe, okíghá-atem-amə̂t-abhí, oyámá-ḿbə́ŋé, ofî na achât.

²¹Mma tat a ri obhí ḿbə́ŋé, aməm egboóm, echâk ekpin edíím na chénchén iyîm ibhí. N kí tʉ ên obhô ka otûŋ ka ekpak nji ta ń daŋ mbá ń səre ên. N kí kpo səre ên bəre ane mba á yíma achot ntʉ́ghi mmá á bhó yen otúi Obhasi.

²²Kən ejímí Obhasi Ebhare Ntʉgantʉ a ri okot, ogyebhá-ḿbə́ŋé, ekone, okə́bhá-ḿbə́ŋé, onobhá-eji, ono etóŋóm, biji ejíghím,

²³oyuŋá-biji asík, a ri biji efiím. Kpe ebhín jə́t nji é sə́re sê nne a kâ yîm iyîm mbí cháŋ.

²⁴Ntóbhá Jisos Krayis ta a mághe chénchén achot íkíkéré ḿbə́ŋé mmá mma á kóra yê kpe-eji. A kô ḿmáne chénchén a kûm ka ego na Jisos.

²⁵Obhasi Ebhare Ntʉgantʉ nâ á kará êt ekpin. Deê é mághe mân yê a tʉ êt mbá.

²⁶E kâ yûŋ ên biji. E kâ yîm ên ntem a yám ḿbə́ŋé. E kâ kî ên fə́ne atem amə̂t abhí.