Read ejagham Ane garasiya, echî 6 Bible Online

Ane garasiya, echî 6 - ejagham bible

Ane garasiya, echî 6

¹Atem-abhon-í-nnyen, ó yen ên nne kpe yót a kí yim obhí, ên mba Obhasi Ebhare Ntʉgantʉ á tʉk ên mbá, nyáŋé ên nne ntʉ́ghi nnyó a maghé obhí mbí eyimím. Kən deê é jóe ka tebhe. Fiî ên biji, ên afoné, o kâ gyê ên fə́ne ka egaé.

²Deê o kamá ên oseŋe ka obhô atem, ó yîm ên ka ekpak ebhín í Jisos Krayis é fíi.

³Nne nnyo á kere se yê a chîŋ ochíŋ nji kpe ejûm á ka fáp, á rirá a ri biji ibhê.

⁴Deê kpe énê a kép ekpak iyîm mbi yê á yimá. Ájoé á kere se á yimá nono, deê é kə̂t na yê, a kâ kêp ntem.

⁵Echî aŋ? Kpe nnyón nne á yimá a ri ejê etûm nji Obhasi a karê yê se a yim.

⁶Nne nnyo á kí kpi yê achot Obhasi, deê a kirí ekəp nji é kí top na nne nnyo á kpik yê.

⁷Nne a kâ ríri biji. Nne nnyo a kí rirí fə́ne Obhasi cháŋ. Nji nne a bheê, nâ nji á fʉk.

⁸Nne nnyo á karé ḿbə́ŋé ka achot í ngun, nji a kí fon a ri iyîm i ngun mbi í bhó ka. Kən nne nnyo a karê ḿbə́ŋé ka achot Obhasi, nji a kí fon ka ikom Obhasi Ebhare Ntʉgantʉ, a ri ekpin ótúm-ótúm.

⁹Deê e kâ kêt onono eyimím. É kəp ḿbə́ŋé, e kí fon ekəp ejə́ré ka nsígha-njəm ebhú.

¹⁰Nâ mân nji é fon ên ebhú, deê é yîm ên onono mbâ ane chénchén, títí na ane mba e chəmê ndə́p-i-njû ka ḿbə́ŋé nnyi e kíi na Jisos Krayis.

¹¹Kêp ên ekpatə́m osêŋ mbí. Mme ḿfoné nâ ń seŋa na obhámé obhô.

¹²Təm ane mba á noghá sê ngun á yén ábho, nâ á sə́ra ên áno se ta nne a kîm nkîm kən a jóe nne Obhasi. Echî é rî sê, á ká wom ngun á séŋe ábho ka obhô esə́re nji sê Jisos Krayis a kpô ka ego.

¹³Kpe ábho mba á kíma áno nkîm, á bhó ki kpe ebhín í nchane. Kən á kí wom ên sê ó kím ên nkîm, ábho á yûŋ biji sê á yim ên ó kim nkîm.

¹⁴Kən mbâ amé, n kâ yûŋ biji kpák təm áfo nchot ekʉ̂ nji Jisos Krayis a kpóe ka ego. Nâ ńjə́ne ń ka kpó fon obhô na ngun, ngun fə́ne á ká kpo fon obhô na mme.

¹⁵Na ó kím nkîm, na o kâ kîm, áji ejûm asík. Nji é rî ejûm a ri sê Obhasi a yîm êt é chəbhe ane afê.

¹⁶Deê enare na onobhá-eji í jóe na ane mba á kí top ekpin efê njí. Deê í jóe fə́ne na ane Isrel mba Obhasi a fonê.

¹⁷É róghé ka égyé, nne kpe yót a kâ kpô karé ə̂m obhúrá-echî, ka ḿ fon énáŋé Jisos Krayis ka ibhámé biji.

¹⁸Atem-abhon-í-nnyen, deê onobhá-eji Ntûfâm owəré Jisos Krayis ó jóe na ên. Áno.