Read ejagham Ane efesus, echî 1 Bible Online

Ane efesus, echî 1 - ejagham bible

Ane efesus, echî 1

¹Nwet nnyí a dʉ mbâ amé, Pol, nnyo Obhasi a sáŋe ka okot obhê se ń jóe ḿgbán i Jisos Krayis. N séŋe n tûm mbâ ane Obhasi ka Efesus. Ên nâ ó ki ên ḿbə́ŋé na Jisos Krayis son-son.

²Deê Obhasi Ńsé owəré na Ńtâ Jisos Krayis á tóŋé ên onobhá-eji, á káre ên fə́ne enare.

³Deê ejík é jóe é káre Obhasi nnyo a ri Ńsé Ntûfâm owəré Jisos Krayis. Obhasi a káre êt chénchén enare nji é rî ka ósô, ka é chəm na Jisos Krayis.

⁴Noŋ nan? Kən ngun a bhá roghe ta a sâŋ êt. A sáŋe êt ka ochəma-biji obhə́ré na Jisos Krayis se e kâ fôn kpe akôp, nne a kâ bhíbhi êt fə́ne ka ochî obhê. Ka obhô okot obhê,

⁵a tʉ́ri êt a kî se é chə́bhe abhon abhê ka obhô Jisos Krayis. Nâ ejûm nji a gaê a kî na ogyebhá-ḿbə́ŋé.

⁶A yimî áno se é káre yê ekûp ka ekpatə́m onobhá-eji mbi kpe ejûm á ka bhə́p, ka é chəm biji na Mmon okot owe.

⁷Ka obhô agyʉ́ŋ í Mmon nnyó, a yîm êt é sem, a rî nsôn a sû obhí obhə́ré ka ekpatə́m onobhá-eji

⁸mbi a tóŋe êt ó ti otí. A tóŋe êt ka oməŋá-ejûm obhê na aron mma á məŋá echî nchot.

⁹A yîm êt é məŋe nji yê a korê Jisos a yim, kən mbôp nnyí a kíi ka ebhə̂t.

¹⁰Ejûm í nchane é rî sê ebhú é bhik, a kí chəmé chénchén iyîm ka ósô na ka nsi, a kî Jisos Krayis noŋ Ntûfâm nnyo a fonê chénchén.

¹¹Kpe jen nji Obhasi a kére, a kí yim ńjə́ne ka ekpak a gaê a kî. Nâ esaŋám nji ta a sâŋ êt nná, é dʉ̂ ka okorá-ḿbə́ŋé obhê, se é jóe é káre yê, ka é chəm biji na Jisos Krayis. Nâ ekpak a gaê a kî ta ka eróghá-ndə́p.

¹²A sáŋe êt mân mba é raŋ mbá é ki ḿbə́ŋé na Jisos Krayis se é káre yê nkat na ejík.

¹³Ên fə́ne mba ó yuk ên mfoné nchot eye, ó yuk ên otîp ogyebhá-ḿbə́ŋé obhê mbi ó yími ên o sêm, ó chəbhe ên ane abhê. Ó ki ên ḿbə́ŋé na yê, a káre ên Obhasi Ebhare Ntʉgantʉ nnyo a chimî nná noŋ eriŋ nji é toŋe sê yê nâ a fonê ên.

¹⁴Ntʉgantʉ nnyó nâ a kí yim êt é mə́ŋe sê tîk e fôn ejûm nji Obhasi a chimî ane abhê. E kí fon ejûm áji ebhú nji Obhasi a kí yim ane abhê á sém. Deê é káre yê nkat na ejík!

¹⁵Ń yuk ḿbə́ŋé nnyi ó ki ên na Ńtâ Jisos Krayis. Ń yuk fə́ne okot mbi ó toŋa ên na chénchén ane Obhasi. Ka obhô mbí,

¹⁶kpe ebhú cháŋ nji ḿ bó karé Obhasi ekûp ka echî ejə́né. N kí tirâ ên chénchén ebhú nji ń gorá Obhasi.

¹⁷Ń gorá bəre deê Obhasi nnyo Ntûfâm owəré Jisos Krayis, Ńsé nnyo a fonê ejík, a káre ên Obhasi Ebhare Ntʉgantʉ. Ntʉgantʉ nnyó a kí karé ên oməŋá-ejûm a yîm ên ó mə́ŋe ên Obhasi.

¹⁸N kí goré bəre deê a rəbhé ên amə̂t. Tîk o mə́ŋe ên mân nji yê a bhiŋî ên se ó bhá fôn ên, o mə́ŋe fə́ne ekpatə́m efaŋ nji é rî ka enare nji yê a chimî ane abhê.

¹⁹O kí məŋé ên fə́ne ekpak ikom ifê í yíma ekpatə́m etûm ka biji ibhə́ré mba e kíi ḿbə́ŋé na yê. Ikom ifê mfí ka biji ibhə́ré í rî ekan-ékân noŋ mfi

²⁰a kóe nná kən a yîm Jisos Krayis a nyə́me ka ekʉ̂. A káre yê ekumi ejík mkpe obhô-orûm obhê ka ósô.

²¹Eji ekumi njí é chiŋi chénchén otúi na ikom eték kpe mfə́n na ikom chénchén na otúi kpe mbə́n na chénchén obhiŋ mbi ane á kára ka mfá-mfá na ka ngun nnyi a kə́ bha mba-ochî.

²²Obhasi a kî chénchén iyîm ka óséré Jisos Krayis, a yîm yê nne-echî ka achot chénchén ka echəme ane abhê.

²³Echəme njí nâ é rî biji Jisos Krayis yê ḿfoné. Ńjə́ne nâ é jéghe otóŋé yê mbâ ane a mân oman, yê nnyo nâ á jeghá chénchén ejûm.