Read ejagham Ane efesus, echî 2 Bible Online

Ane efesus, echî 2 - ejagham bible

Ane efesus, echî 2

¹Deê é chôt é kpê na ên. Ofú ábhi, o ri ên noŋ o kpóe ên okpó ka achot Obhasi. É dʉ̂ ka osoná-echî obhə́né na obhí.

²Ka ebhú áji, o tóbhe ên a ri achot abhí ngun nnyí, o yúghi ên fə́ne ntûfâm ikom ejírim ka ngurobhú, nâ ńtʉgântʉ mbí nnyi á yimá áno etûm ka ḿbə́ŋé ane mba á bhó yuk Obhasi.

³Êt chénchén, ka ebhú etat e fonê ekpin noŋ ábho. Íkíkéré ibhí nâ í rî êt ka ḿbə́ŋé, e yimá nji é bhíghi êt noŋ aron amə́ré á sə́re êt. Ka obhô mbí, Obhasi a ri a tóŋé êt fə́ne oyámá-ḿbə́ŋé obhê noŋ ane mba ngá chénchén.

⁴Kən Obhasi a kôt êt kpe-eji, a tóŋe êt ekpatə́m onobhá-eji obhê. Nâ ńjə́ne,

⁵kpe noŋ é kpo áno ka osoná-echî obhə́ré, a yîm êt é kpó fon ekpin na Jisos Krayis. A ri onobhá-eji Obhasi nâ ó yími ên o sêm.

⁶Nji e chəmê biji na Jisos Krayis, a yîm êt fə́ne é nyə́me ka ekʉ̂ na yê se é kúmi ka otúi na yê ka ósô.

⁷A yimî ka ekpak njí se ngun ochî á yén ekpatə́m onobhá-eji obhê. A tóŋe ḿbə́ne ka okot mbi a fonê na êt ka obhô Jisos Krayis.

⁸É dʉ̂ áno ka obhô onobhá-eji obhê nâ a yîm ên o sêm nji o kíi ên ḿbə́ŋé na Jisos Krayis. Ên áfoné asík o yimî ên sê ó sém, a ri ekəp Obhasi.

⁹Á ka karé ka obhô sê nne a yîm énoê ntûm, é kâ jóe áfo ejûm nji nne á yuŋá biji.

¹⁰Echî aŋ? Obhasi nâ a yimî êt ka ekpak e ri. A yimî êt se ka ochəma-biji obhə́ré na Jisos Krayis, deê é yîm ono mbí a yimî a kî êt se é yîm.

¹¹Ên ane nték ajéné, tit ên mân ekpak ane mba o ri ên ebhú áji. Mbâ ojî, ên ane Jus asík. Ane Jus á sə́ra sê ábho á kîm nkîm, á bhiŋá ên sê “ó ka kím ên nkîm.” A ri nkîm nnyi biji nnyí.

¹²Məŋê ên sê ebhú áji ó ka joé ên na Jisos Krayis. Ên a ri ane nték ajéné, ane Isrel asík. Ó ka fon kpe nji yimím na ejûm nji Obhasi a chimî ane Jus. Ó ka fon ên ḿbə́ŋé sê onono tîk ó tôp ên. Obhasi fə́ne á ka joé ka ekpin ejə́né.

¹³Ebhú áji ó ka fon ên íkíkéré na ekpin Obhasi. Mfá-mfá, ó chəme ên biji na Jisos Krayis, ó chəbhe kpít na Obhasi ka obhô agyʉ́ŋ í Jisos Krayis.

¹⁴Yê nâ a bháe na ekone nji é yim êt chénchén é chəbhe ejûm jə́t. Yê a bhák na ekone nji é joghe ébhághé-njû nji é kiri êt nná na erû ofubhá-ḿbə́ŋé.

¹⁵É dʉ̂ ka nji a yimî ebhín ane Jus é ká kpo fon ikom, ebhín sê ó yîm njí ó yîm ńjî. Ka ekpak njí, a yîm ane Jus na ane nték ajéné mba á rî mbôp nnyí mkpak ébháe, a chə́bhe nne mfê yót ka ekone nji á chə́me na yê.

¹⁶A yîm mkpak ane nnyí ébháe á fon ekone na Obhasi noŋ nne yót. É dʉ̂ ka ekʉ̂ nji a kpóe ka ego, oyírí na atem ó man.

¹⁷A bháe a bhâ sə́re otîp ekone mbâ ane Jus na ên, ane nték ajéné. Ane Jus a fonê ebhín Obhasi, kən ên, ane nték ajéné, ó ka məŋé ekpin ejê.

¹⁸Ka obhô obhê, ńgyímí ane nnyí ébháe ka mbiŋ Obhasi Ebhare Ntʉgantʉ yót, á fon mbá nnyi á kí fap ka ochî Obhasi.

¹⁹Ka obhô mbí, ó ka kpó joé ên ane nték ajéné, ó ka kpó joé ane mba á ká məŋé ekpin ejê. Ó chəbhe ên afoná-nsi noŋ ane Obhasi mba ngá chénchén. Ó chəbhe ên fə́ne ndə́p-i-njû yə́t nnyi Obhasi.

²⁰Ó chəm ên ka ndə́p-i-njû nnyi ágbán í Jisos na akará-otîp Obhasi á réne ndə́p. Jisos Krayis yê ḿfoné nâ a ri isôk mfi í fíi njû.

²¹A ri na yê nâ ndə́p-i-njû nnyí chénchén a chəmê, a kúá a chəbhá ókʉ́rí Ńtâ Obhasi mbi ó ká fon akôp.

²²Ên fə́ne o ri ên áfo na yê. A gbê ên noŋ eji nji Obhasi a kí kumí, a joá na êt ka ikom Ebhare Ntʉgantʉ owe.