Read ejagham Ane efesus, echî 3 Bible Online

Ane efesus, echî 3 - ejagham bible

Ane efesus, echî 3

¹A ri ka obhô ejûm nji Obhasi a kí yim na ên, nâ mme, Pol, ń gorá yê. Ka echî ejə́né, ên ane nték ajéné, n di áno ka ókúmí noŋ ḿgbán i Jisos Krayis.

²Ń kere bəre ó məŋe ên sê Obhasi nâ a túmi ə̂m na otîp mbâ eyəné se yê a kô ə̂m a tóŋé ên onobhá-eji obhê.

³Otîp mbí a ri nchot mfê nnyi mbôp nnyí a kíi ka ebhə̂t kən Obhasi a bhâ tóŋe ə̂m. Ta ń seŋ mô mkpât m kpê na ńnyə́ne.

⁴Ó bhiŋ ên nji n séŋe, tîk o mə́ŋe ên mân sê mme ḿ məŋe nchot a kpê na Jisos Krayis nnyi mbôp nnyí a kíi ka ebhə̂t.

⁵Éməné Obhasi á ka sə́ré ane nchot ebhə̂t nnyí, kən mfá-mfá, ka ikom Ebhare Ntʉgantʉ owe, a tóŋe ágbán í Jisos na akará-otîp abhê, chénchén mba á ká fon akôp ka ochî obhê.

⁶Nchot ebhə̂t nnyí a ri ekpak ane nték ajéné á chəm na ane Jus ka obhô otîp ogyebhá-ḿbə́ŋé Obhasi, á kí fon enare nji Obhasi a chimî a káre ane abhê. Ane mbá á chəbhe ane bhát na ane Jus, á fon nkiri ka nji Obhasi a chimî ka mbiŋ i Jisos Krayis.

⁷Obhasi ka ikom ifê a tóŋe ə̂m onobhá-eji obhê noŋ ekəp. Ka onobhá-eji mbí, a yîm ə̂m nne-etûm owe, ń tibhi fə́ne otîp ogyebhá-ḿbə́ŋé obhê mbâ ane.

⁸Ka ane Obhasi chénchén, mme nâ ń ka fáp ofáp kpe ejûm. Kən kpe é rî áno, Obhasi a káre ə̂m ekpatə́m ekəp njí se ń sə́ré ane nték ajéné bəre onono mbi ó tíi ó chîŋ ochíŋ ó rî na Jisos Krayis.

⁹Se fə́ne ń yîm chénchén ane á mə́ŋe ekpak á kí yim na íkíkéré ifê mfí, mfi yê, nnyo a yimî iyîm chénchén, a kíi mbôp nnyí ka ebhə̂t.

¹⁰Kən égyé, Obhasi a tóŋe íkíkéré ifê mfí ka echəme ane abhê, se otúi na ikom kpe mfə́n ka ósô á yén oməŋá-ejûm obhê ekpak ó rî ka mkpak ka mkpak.

¹¹Nâ ekpak Obhasi a wóme se yê a yim kən ngun a bhá roghe. A ri ka obhô Jisos Krayis, Ntûfâm owəré, nâ íkíkéré mfí í fábhe jáé.

¹²Ka é chəm ên na Jisos Krayis, é yuŋ fə́ne ḿbə́ŋé é ki na yê, e kí fap ka ochî Obhasi, kpe mkpât efup é bhó fon.

¹³Ń gore ên mân bəre o kâ yíghi ên ḿbə́ŋé ka n kí yen oseŋe ka obhô obhə́né. Chénchén njí a ri ka onono obhə́né.

¹⁴Ka obhô mbí, ń təm achî-arúŋ ń kare Obhasi Ńsé.

¹⁵A ri mbâ eye nâ chénchén ejûm ka arə́p-ojû ka arə́p-ojû, kpe é rî ka ósô, kpe é rî ka nsi, é fóna mbiŋ.

¹⁶Bəre ka ekpatə́m ejík ejê, deê a yim Ebhare Ntʉgantʉ owe a karé ên ikom ka ḿbə́ŋé.

¹⁷N kí goré yê bəre a yim Jisos Krayis a joé ka ḿbə́ŋé eyəné, ka ó ki ên ḿbə́ŋé na yê. N kí goré fə́ne bəre deê ó kôt ên atem. Ó kot ên atem, o kí gyimi ên akát á sî nsi noŋ étí nji arʉk amê á gye ka nsi nnyen egyéém. O kí son ên noŋ njû nnyi ndéné a sonê oson.

¹⁸Ka ekpak njí, ên na chénchén ane Obhasi mba ngá, tîk o mə́ŋe ên mân ekpak nji Jisos a korê êt. Okot obhê ó faŋ ó chiŋ ochíŋ.

¹⁹N kí goré bəre ó nôk ó mə́ŋe ên okot obhê kpe noŋ tîk é bhó məŋé ên ḿbə́ne é jéghe. Ka ekpak njí, tîk ekpin Obhasi é súi ên ka biji.

²⁰Deê é kúp mân Obhasi. Yê a kí bhik oyim a karé êt é chíŋi nji êt é bhəbha yê, kpe íkíkéré fə́ne í bhó ji ágo. A kí yim áno na ikom ifê mfi í yíma etûm ka ḿbə́ŋé ejə́ré.

²¹Deê é káre yê ekûp na ejík ka obhô echəme atóbhá Jisos na ka obhô Jisos Krayis. Deê biyábhé-abhon fép á káre yê ekûp na ejík ka ótúm-ótúm. Áno.