Read ejagham Ane efesus, echî 4 Bible Online

Ane efesus, echî 4 - ejagham bible

Ane efesus, echî 4

¹Mme nnyo ń chəbhe nne-ókúmí ka obhô Ńtâ Jisos, n kí choe ên mân bəre ó fôn ên ekpin nji é bhíghi ka esáŋám nji Obhasi a sáŋe ên.

²Ka yûŋ ên biji bhúghí-bhúghí, fon ên ekpin í nyamḿ, nne a kâ kô ejûm ka echoghe, kə́bhâ ên ḿbə́ŋé na atem ka okot.

³Deê ó nôk ên nnyen enoghóm ka efiím ochəma-biji mbi Obhasi Ebhare Ntʉgantʉ a karê ên na atem.

⁴Biji í rî bhə́t, Ebhare Ntʉgantʉ a ri yót, ekamám é rî fə́ne jə́t sê Obhasi nâ a fonê ên.

⁵Ńtâ Jisos Krayis a ri yót, nchot Obhasi yə́t, ofúgha-ayép fə́ne bhə́t.

⁶Obhasi a ri yót. Yê nâ a ri Ńsé ane chénchén. Yê nâ a chíŋi kpe bhaghé ejûm. A ri kpe ka bhaghé eji, a ri fə́ne kpe ka bhaghé ejûm.

⁷Kən a tóŋe êt onobhá-eji ka ńgyímí, ka ńgyímí, ka ekpak ekəp nji Jisos Krayis a karê êt.

⁸Nâ ńjə́ne á séŋe sê, “Ebhú a gyʉ́ri a jak ka ósô, a fî ane ka ngun etî-etî a jak na ábho. A kíri bikəp a káre ane abhê.”

⁹É chot sê a gyʉ̂t ka ósô, nná e ri é mə́ŋe sê a bhə̂t a sî etím í nsi.

¹⁰Yê yót nnyo a bhərê a sî etím í nsi nâ a gyʉ́ri fə́ne ta a yáŋe ósô, a súi ósô na nsi.

¹¹Yê nâ a karê bikəp mbâ ane. A karê etʉ̂ ane se á jóe ágbán abhê, etʉ̂ á kará otîp Obhasi, etʉ̂ se á jená ka ngûm á səra ane otîp ogyebhá-ḿbə́ŋé, etʉ̂ se á bhabha ane Obhasi, etʉ̂ fə́ne se á kpik ábho ekpin ejê.

¹²A karê ane bikəp mbí egyê-egyê se yê a kâk ane Obhasi obhô, á yîm etûm Obhasi ábho. Á yîm etûm Obhasi sê echəme atóbhá Jisos nji é rî nâ biji Jisos Krayis, é sôn nnyen esonóm.

¹³Á yîm fə́ne ta echəme njí é kí son ka ḿbə́ŋé nnyi e kí ki na Jisos Krayis, Mmon Obhasi, é mə́ŋe fə́ne yê. E kí kui mân ta e sî mfoné-mfoné ńgyímí erû Jisos Krayis.

¹⁴Ka ebhú njí, é ro kpó joé noŋ abhonche mba á júbha, á jak ngá, á jak ńgô. É ro kpó top ane mbá na okpígha-ejûm áfúbhí ábho, na oka ábho, na achot áfúbhí ábho.

¹⁵Kən e kí chot nchot ka echî na okot. Nâ ńjə́ne e kí kui ka achot Obhasi ta e chə́bhe noŋ yê ḿfoné, Jisos Krayis, nnyo a ri echî ejə́ré.

¹⁶A ri ka yê noŋ echî nâ ayô chénchén á kóne sê á jóe ka biji bhə́t. Na biji mbí bhə́t, ka nne yót, ebhú kpe njə́n eyô é kí yim ejê etûm ka ekpak é fóne ka eyimím, biji í kí kui fə́ne nono. Nâ noŋ fə́ne é rî na echəme atóbhá Jisos. Ebhú atóbhá á kot atem, echəme njí é kí kui nono.

¹⁷Nâ ka mbiŋ i Ntûfâm owəré Jisos Krayis, n kí tʉ ên obhô ka otûŋ bəre o kâ kpô yim ên ekpin noŋ ane mba á ká məŋé Obhasi, á kóra iyîm mbi í ká fap ofáp kpe ejûm.

¹⁸Á ká məŋé nji é rî ka echî na nji cháŋ. Á ká fon ekpin nji Obhasi á kará ane, ka osoná-echî ó yim ábho á ká məŋé.

¹⁹Echî é bhó yup ábho kpák. Á kare ḿbə́ŋé ábho ka obhí eyimím ta á gye eyimím achot oyúbhá-echî ta é fubha ábho ofúp.

²⁰Kən ên, ó ka kpí ên nchot i Jisos Krayis ka ekpak njí.

²¹É kó sê ó yuk ên esə́re ejê, á kpí ên fə́ne achot amê sê yê nâ a ri mfoné nchot Obhasi.

²²Á kpî ên fə́ne sê ó mághe ên etə́m ekpin ebhí ejə́né áji. Ekpin njí nâ é yími ên nná o châ ên o mân oman ka ḿbə́ŋé ka íkíkéré ibhí mfi ó kera ên. Íkíkéré mfí nâ í ríri ên o gbô.

²³Á kpî ên fə́ne sê ó chə́bhe ên ane afê ka ńtʉgântʉ na ka ḿbə́ŋé.

²⁴Sê ó tóp ên ekpin efê nji é rî nâ ekpin Obhasi ka nnyen-i-mbá, ekpin akôp é kâ fôn.

²⁵Nâ mân nne kpe nnyón, deê a maghé achot áfúbhí. Sə́re ên atem nchot nnyi a ri ka echî, ka êt chénchén é chəm, é chəbhe ejûm jə́t.

²⁶Nne a yámá ḿbə́ŋé, kən deê oyámá-ḿbə́ŋé mbí ó kâ chóe nne a yim obhí. Deê nne a kâ yâm ḿbə́ŋé ebhú é râp nji ta egu é kí si a nyə́ne áfo a yámá ḿbə́ŋé.

²⁷Ka kâm ên Satan a gyé ka ekpin ejə́né.

²⁸Nne owəné nnyo á jʉk ejʉ̂, deê a maghé ejʉ̂, a yim nnyen etûm na abhô amê yê ḿfoné, a fon nji a kí karé mbâ akpák.

²⁹Deê nchot i mbí kpe yə́t a kâ fâp ên ka nnyo. Chot ên a ri achot mma á kí yim atem á kua ka achot Obhasi. Chorâ ên achot mma á bhíghi obhik, nne á yuk, á nyáŋe yê.

³⁰O kâ yíma Obhasi Ebhare Ntʉgantʉ a kə́rá nsae-ńsáe. Ebhare Ntʉgantʉ nnyó, Obhasi a káre ên se ó sém ên ka ofú mbi Jisos Krayis a kə́ bha.

³¹Maghê ên oyámá-ḿbə́ŋé na atem, maghê ên fə́ne ntit i mbí. Nne a kâ kâk obhí ntem ka ḿbə́ŋé. Maghê ên okpóŋe na atem, ntem a kâ tû ntem, deê oyírí ó mân.

³²Deê ó tóŋe ên onobhá-eji mbâ atem, o rík ên nsôn o gyiná ên obhí mbi atem á yíma ên. Nâ ekpak nji Obhasi á rik fə́ne nsôn a suk obhí obhə́né ka obhô Jisos Krayis.