Read ejagham Ane efesus, echî 5 Bible Online

Ane efesus, echî 5 - ejagham bible

Ane efesus, echî 5

¹Nâ gyebhâ ên mân ekpin Obhasi noŋ abhon okot abhê.

²Joâ ên ka okot noŋ Jisos Krayis a korê êt ta a káre ekpin ejê noŋ énoê ejûm efin mbâ Obhasi.

³Deê ka ekam ejə́né o kâ kâm ên sê ane á yúk kpe mô nchot á kpê na achot enuŋ akôp, na kpe mfə́n íkíkéré ibhí, na okorá-ntí. Iyîm mbí fép í ká bhik na mfoné-mfoné ane Obhasi.

⁴Maghê ên achâk achot echoróm, maghê ên achot énə́mé na mma á bhó gyebhé ka otûŋ. Iyîm mbí é bhó nobhâ. Nji é nóbhe é rî sê o karâ ên ekûp mbâ Obhasi.

⁵Məŋê ên sê ane mba á tóbha achot enuŋ akôp na íkíkéré ibhí na okorá-ntí, kpe yót ábho nnyo a kí fon nkiri ka otúi Obhasi na Jisos Krayis cháŋ. Nne nnyo á tobha okorá-ntí a ri noŋ ntóbha-ajom.

⁶O kâ kâm ên ane á ríri ên na achot í chichi. Ntʉ́ghi achot abhí mmá nâ á yíma Obhasi a yámá ḿbə́ŋé na ane mba á bhó yuk yê.

⁷Nâ ka chə̂m ên biji na ntʉ́ghi ane mbá.

⁸Echî aŋ? Ebhú áji ó ri ên ka ejírim, kən mfá-mfá nji ó chəm ên na Ńtâ Jisos, ó chəbhe ên ka ebhát. Nâ yimâ ên mân ekpin noŋ abhon mba á rî ka ebhát.

⁹Ń chorá áno ḿbi chénchén, ka a ri ka ebhát nâ nne a kí yen chénchén nji no, na chénchén iyîm mbi í rî ka nnyen-i-mbá, na mbi í rî ka echî.

¹⁰Deê ó nôk ên ekpak o kí məŋé ên iyîm mbi í gyébha Ńtâ Jisos ka ḿbə́ŋé.

¹¹Ka kâk ên biji ibhə́né ka achâk achot ejírim mma ane á yíma, kən túbha ên ḿmáne jáé ane á yena.

¹²Echî aŋ? Ntʉ́ghi iyîm ebhə̂t mbí, kpe o yúghi oyúk á chorá, í yúbha echî kpe-eji.

¹³Nji é kí tup iyîm ntʉ́ghi mbí kpújáé ka éré, e kí məŋé mân ekpak í ḿbə́ne í rî ka etʉri.

¹⁴Echî é rî se a ri ebhát nâ é kí tup kpe njə́n ejûm jáé. Nâ ńjə́ne á chóre sê, “We nnyo o kí yae eyô, duî ngyím. Nyəmê ka ekʉ̂, tîk Jisos Krayis a kâk ebhát ka ekpin ejâ.”

¹⁵Nâ nne a məŋé mân ekpak nji á yimá iyîm ibhê. Ka yíma ên iyîm noŋ ánə́mé ane, yimâ ên noŋ aməŋá-ejûm.

¹⁶Deê kpe mô ebhú nnyo nne a fonê, a yim ono, ka mfín nnyí a tî obhí a chîŋ.

¹⁷Nâ deê nne a kâ nə́me onə́mé, məŋê ên ejûm nji Ńtâ Jisos a wóme.

¹⁸Deê nne a kâ gwógha aməm kpe-eji a gbok ka áfo á bhibha áno ekpin ejê. Kən deê a ri Obhasi Ebhare Ntʉgantʉ a súí ên ka biji.

¹⁹Chorâ ên na atem ka nyum i nkôn Obhasi nnyi Debhit na ane etat á séŋe, na nnyi Obhasi Ebhare Ntʉgantʉ á kpik ane. Kóna ên nkôn mbâ Ńtâ Jisos, o kará ên yê ejík na ḿbə́ŋé eyəné chénchén.

²⁰Ka mbiŋ i Ntûfâm owəré Jisos Krayis, karâ ên ekûp mbâ Ńsé owəré Obhasi ka chénchén ejûm.

²¹Gbo ên osʉ́ŋ karê ên atem ka ó jigha ên Jisos Krayis.

²²Ên akáé, joê ên ka óséré arûm abhə́né noŋ o ri ên mbâ Ńtâ Jisos Krayis.

²³Echî aŋ? Ndûm nâ a ri echî nkáé ekpak nji Jisos Krayis a ri echî echəme atóbhá abhê. Echəme njí a ri biji ibhê. Yê fə́ne nâ á yimá ńjə́ne é sema.

²⁴Ka ekpak njí, echəme atóbhá Jisos é rî ka óséré obhê, deê fə́ne akáé á kí biji ábho ka óséré arûm ábho kpe ka jen.

²⁵Mbâ ên arûm, kot ên akáé abhə́né ka ekpak nji Jisos Krayis a korê echəme atóbhá abhê ta a káre biji ibhê ka echî ńjə́ne.

²⁶Se yê a yim atóbhá echəme ejê, á kâ fôn ekpin akôp ka ochî Obhasi nji a kóe eyum í nnyo ejê a sû ábho á bhât na ayép.

²⁷Se yê a yim atóbhá abhê á fáp ka ochî obhê na ejík, á jóe nono, ekpin akôp á kâ fôn, á kâ fôn kpe obhí, á kâ gbô fə́ne kpe ka ejûm jə́t.

²⁸Nâ noŋ fə́ne é kí joé na arûm. Deê á kôt akáé ábho noŋ biji ábho. Nne nnyo á kot nkáé, a kôt biji ibhê yê ḿfoné,

²⁹ka nne nnyo a nôk oyírí biji ibhê cháŋ. Kpe énê á kebha áno biji ibhê, a gyek ḿbə́ne noŋ Jisos Krayis á yimá na echəme atóbhá abhê.

³⁰Jisos Krayis á yimá áno, ka êt a ri biji ibhê.

³¹Á séŋe sê, “Nâ ńjə́ne nne-ndûm a kí maghé ńsé owe na nnyen owe, a chə̂m na nkáé, ane mbá ábháe á chəbhe nne yót.”

³²Nchot nnyí a kí toŋe êt ekpatə́m ejûm ebhə̂t nji é rî ka etím. N kí səre bəre a ri a kpê na Jisos Krayis na echəme atóbhá abhê.

³³Kən a ri fə́ne a kpê na ên. Deê kpe nnyón ndûm a kot nkáé owe noŋ a korê biji ibhê. Deê fə́ne nkáé a nok ekpak nji a kí jighi ndûm owe.