Read ejagham Ane efesus, echî 6 Bible Online

Ane efesus, echî 6 - ejagham bible

Ane efesus, echî 6

¹Ên abhon, yûk ên ásé abhə́né ka ekpin ejə́né na Ńtâ Jisos. Nâ nji é nóbhe eyimím.

²Ebhín Obhasi é chóre sê, “Jíghi ńsé owa na nnyen.” Ḿfa nâ ndaŋa-mbá ebhín nji Obhasi a chimî ejûm a kpê.

³Obhasi a chimî se, “Ó jighi ńsé owa na nnyen, tîk é nôp é káre wâ. Ekpin ejâ tîk é râp ka nsi nnyí.”

⁴Ên fə́ne ka ásé, ka yîm ên ejûm nji é kí yamâ abhon abhə́né ka ḿbə́ŋé. Gye ên ábho, o kpík ên ábho ekpin nji Ńtâ Jisos a wóme.

⁵Deê asʉ́ŋ á yúk ásé ábho ka nsi nnyí. Jíghi ên ábho na ḿbə́ŋé-a-ḿbə́ŋé. Deê é jóe noŋ kpe ó yimá ên mbâ Jisos Krayis.

⁶Ka yimâ ên ka ó yen ên ásé abhə́né, ka ó woma ên é gyébhe ábho ka ḿbə́ŋé. Kən yim ên fə́ne noŋ kpe ágbán í Jisos Krayis mba á yíma a ri ejûm nji Obhasi a wóme na ḿbə́ŋé-a-ḿbə́ŋé.

⁷Yim ên etûm na okorá-ḿbə́ŋé noŋ kpe ó yimá ên mbâ Ńtâ Jisos, mbâ ntem-nne asík.

⁸Yim ên o məŋá ên sê ono mbi-mbi nne a yimî, a kí fon ekpak í ḿbə́ne bhə́t mbâ Jisos Krayis, kpe o ri nsʉ́ŋ, kpe o ri mfone.

⁹Ên ásé eróŋ mba o fonê ên asʉ́ŋ, yimâ ên ekpak njí jə́t na asʉ́ŋ abhə́né. Ka kpó kaghâ ên ábho efup. Yimâ ên o məŋá sê yê nnyo a ri Ńsé owəné na ábho a ri ka ósô. Yê á bhó yimâ ejûm a kébhá nne ka ochî kpe o ri jen.

¹⁰Ka ejeghé nchot, n kí səre ên bəre ó chə̂m ên biji na Ńtâ Jisos. Joê ên son-son na ikom ifê, ka ikom ifê nâ í fáŋe í chîŋ ochíŋ.

¹¹Tʉrî ên biji enok nono ka ekpak Obhasi a karê ên, ó bhîk ên egyímím enok na oka Satan.

¹²Enok njí é ka joé na ntem-nne, kən é rî a ri na otúi kpe mbə́n na ikom eték kpe mfə́n na ikom ejírim ka ngun na ikom atʉ́ ka ósô.

¹³Ka obhô mbí, tʉrî ên biji enok ibhə́né na iyîm mbi Obhasi a karê ên. Ebhú mfín obhí ányi á bha, tîk akát á sôn ên ka nsi o nôk ên ta o sî ntə̂m.

¹⁴Nâ tʉrî ên mân biji. Deê ḿbə́ŋé eyəné jáé a joé noŋ ekandá nji o kí bhop ên ka ebhûn. Deê ekpin ka nnyen-i-mbá é jóe noŋ nkʉ̂ enok nnyi nne a bhúi ka ngaŋ.

¹⁵Tíbha ên ane otîp ogyebhá-ḿbə́ŋé Obhasi mbi ó kára ekone. Deê ó jóe noŋ iyîm akát enok ibhə́né.

¹⁶Fiî ên ka ḿbə́ŋé nnyi o kíi ên na Jisos Krayis noŋ kpe ejûm enok nji é kí gbʉi chénchén árôp mma Satan a kí tup, á bhó si wâ. Kpe árôp mmá á bhâk na ngûn ń duk, ejûm njí é kí gbʉi.

¹⁷Kam ên esémém nji Obhasi a yimî ên o sêm noŋ itam enok. Kô ên nchot eye noŋ akparanja mma Ntʉgantʉ owe á kará.

¹⁸Yimâ ên chénchén iyîm mbí o gorá ên sê Obhasi a kaghá ên obhô. Deê Ebhare Ntʉgantʉ owe a tʉk ên mbá o gorá ên Obhasi chénchén ebhú. Ka obhô mbí, joé ên ngyím-ńgyîm, ka yíghi ên ḿbə́ŋé. Gorâ ên Obhasi o kará ên ane abhê chénchén.

¹⁹Gorâ ên fə́ne Obhasi sê a karé ə̂m nji n kí chot ebhú n kí səre ane nchot ebhə̂t nnyi a ri ka otîp ogyebhá-ḿbə́ŋé obhê. Gorâ ên yê sê a yimá ə̂m n chorá, efup n kâ fôn.

²⁰Ka obhô otîp ogyebhá-ḿbə́ŋé mbí nâ á kóe ə̂m noŋ ḿgbán, n tíbhá ḿbə́ne kpe n di áno ka ókúmí. Gorê ên se Obhasi a karé ə̂m ikom n tíbhá ḿbə́ne ka ekpak nji m fonê ka etíbhím, efup n kâ fôn.

²¹Ntem i ḿbə́ŋé, Tichikus, nnyo á yimá etûm í Ńtâ Jisos Krayis á bhó chaghé ache, tîk a sə́re ên ekpak nji mme n di, ó məŋe ên chénchén nji mme ń yimá.

²²Nâ ńjə́ne ń tuma yê mbâ eyəné bəre ó mə́ŋe ên ekpak é rî ngá na êt, yê fə́ne a kak ên ikom.

²³Deê Ńsé owəné Obhasi na Ńtâ Jisos á káre enare na okot mbâ chénchén atem-abhon-í-nnyen mba á rî ágo na ên. Deê á yîm ó kí ên ḿbə́ŋé na ábho.

²⁴Deê Obhasi a tóŋé onobhá-eji chénchén ebhú mbâ ane chénchén mba okot ábho na Jisos Krayis ó bhó man ka ótúm-ótúm.