Read ejagham Ane firipi, echî 1 Bible Online

Ane firipi, echî 1 - ejagham bible

Ane firipi, echî 1

¹Nwet nnyí a dʉ mbâ êt, Pol na Timoti, ane-etûm í Jisos Krayis. E séŋe e tûm mbâ chénchén ane Obhasi ka Firipi mba o chəmê ên na Jisos Krayis. E séŋe e tûm fə́ne ane-echî echəme atóbhá Jisos na ane mba á nyáŋa ábho.

²Deê Obhasi Ńsé owəré na Ńtâ Jisos Krayis á tóŋé ên onobhá-eji, á káre ên fə́ne enare.

³Kpe bhaghé ebhú nji ń tirá ên, n kí karé Obhasi ekûp.

⁴Chénchén ebhú nji ń gorá Obhasi mbâ eyəré chénchén, ń gorá na ekpatə́m ogyebhá-ḿbə́ŋé.

⁵Echî aŋ? É róghé ka ofú mbi n sə́re ên otîp ogyebhá-ḿbə́ŋé Obhasi ta é si égyé, ó chəm ên na mme ó nyaŋe ə̂m ka esə́rə́m otîp mbí.

⁶Ḿ məŋe bəre Obhasi nnyo a róghe énoê etûm njí ka ḿbə́ŋé eyəné, tîk a yîm ńjə́ne é jak ochî tata é sî ntə̂m ka ofú mbi Ńtâ Jisos Krayis a kə́ bha.

⁷É rî nono ka efonóm ekpak í íkíkéé mfí na ên, ka o ri ên ka ḿbə́ŋé amé. Ên chénchén ó chəm ên na mme é fon nkiri ka onobhá-eji mbi Obhasi a karê ə̂m, kpe n di ka ókúmí, kpe n jená n gyímá ntî-isê otîp obhê bəre ó fôn arʉk.

⁸Obhasi yê ḿfoné a ríŋi se okot mbi m fonê na ên ó dʉ̂ mbâ Ńtâ Jisos Krayis.

⁹N kí goré Obhasi bəre deê yê a yim okot mbi o fonê ên na atem ó kúí ó jî ochî. Deê a yim okot mbí ó chə̂m na oməŋá-ejûm na mfoné otáŋá-nchot.

¹⁰Tîk o mə́ŋe ên mân ekpak o kí top ên ono, o kâ yîm ên kpe akôp mát nne a bhá taŋ ên ka ofú mbi Jisos Krayis a kə́ bha.

¹¹Tîk o fôn ên ekpin nji é rî ka nnyen-i-mbá nji é dʉ̂ mbâ Jisos Krayis, kən ejík na nkat í jóe í káre mbâ Obhasi.

¹²Atem-abhon-í-nnyen, deê ó mə́ŋe ên sê achot mma á tə́me ə̂m nná á yoŋe á yim nchot Obhasi a kí ji ochî.

¹³Ka obhô nchot nnyí, chénchén ane mba á rî ngá é kpê na abhábhá-ókʉ́rí Ntûfâm i Rom á məŋe sê á kúmi ə̂m ka n di ḿgbán i Jisos Krayis.

¹⁴Ókúmí obhámé ó kak etî-etî atem-abhon-í-nnyen osoná-ḿbə́ŋé nji ta á kí kpi ane otîp ogyebhá-ḿbə́ŋé Obhasi, efup á ro kpó fon.

¹⁵É rî ka etʉri sê etʉ̂ ane á kí səre ane achot í Jisos Krayis ka obhô á kîk ə̂m amə̂t abhí, á gaá echî na mme. Kən mba tat á sə́ra na íkíkéré mfi no.

¹⁶Mba íkíkéré ino á sə́ra na okot, ka á məŋe sê Obhasi a sâŋ ə̂m noŋ ntî-isê otîp obhê.

¹⁷Kən mba ngá, á bhó kpi achot mmá na nnyen i ḿbə́ŋé ábho, á kéra a ri biji ábho. Á kí kere sê nji n di nná ka ókúmí mfá-mfá, achot á gbo ə̂m mma nná.

¹⁸Kən ejûm etat cháŋ, kpe nne a sə́re otîp Obhasi na íkíkéré ibhí, na kpe a sə́re na íkíkéré ino, á səra áno a ri otîp mbí bhə́t. Nâ echî ejûm nji n kí fon ogyebhá-ḿbə́ŋé. Ka etʉri, tîk ḿ bó maghé ḿbə́ŋé egyebhém.

¹⁹Echî aŋ? Ḿ məŋe bəre Obhasi egoróm obhə́né na ikom í ńtʉgântʉ Jisos Krayis tîk í yîm ə̂m m fábhá ka oseŋe mbí.

²⁰Mfoné-mfoné íkíkéré mfi í fáŋe í chiŋ ka ḿbə́ŋé amé a ri se, n kâ kô eré ka etûm ejámé. Deê ḿ fôn osoná-ḿbə́ŋé mfá-mfá títí, tîk ane á yúbhi mân Jisos Krayis kpe ḿ kpó okpó kpe n kâ kpô.

²¹Ka ifámé íkíkéré, ekpin a ri Krayis. Ḿ kpo ka obhô Krayis, ekəp ejámé a ri ekpin nji é chíŋi obhô.

²²Kən é joé sê ḿ fôn ekpin ń jî ochî, tîk n yîm énoê etûm n káre Krayis, kə́n ḿ bó məŋé nji n kí saŋ.

²³N di nə́mé-nə́mé ka ḿbə́ŋé. Ekʉ̂ é nôp é chîŋ, m mághe ngun nnyí, ń jóe na Jisos Krayis.

²⁴Kən ka obhô obhə́né, ḿ fon ekpin, tîk é nôp é káre ên.

²⁵Nji m məŋê ka etʉri bəre tîk é nôp é káre ên, tîk n kúmi na ên n kaghá ên obhô ka nchot Obhasi nnyi o kamê ên, bəre é kúí é jî ochî, ogyebhá-ḿbə́ŋé ó jóe.

²⁶É kó mân sê ebhú ḿ kpo joé na ên, ogyebhá-ḿbə́ŋé mbi o fonê ên ka ekpin ejə́né na Jisos Krayis, tîk ó súi ó fûk ka obhô obhámé.

²⁷Kpe bhaghé ejûm é fábhe, deê ekpin ejə́né é jóe ka ekpak esə́re Jisos Krayis é kpíi ên. Kpe ń jóe ágo na ên, kpe ń ka joé, tîk n yúghá sê o ri ên ḿbə́ŋé eyəné yə́t, sê o ri ágo o noghá ên fə́ne noŋ nne yót sê otîp ogyebhá-ḿbə́ŋé Obhasi ó jî ochî.

²⁸Tîk n yúghá sê efup é bhó yim ên na ane mba sê á bhan ên. Ńji tîk é tóŋe ábho sê erûm a ri ejə́né, éká a ri nji ábho. Ka érûm njí, a ri Obhasi nâ a karê.

²⁹Ka nan? Obhasi a kâm se é jóe ên ágbán í Jisos Krayis, cháŋ sê ka ḿbə́ŋé ekíím átíŋ, é rî fə́ne ka oseŋe eyéném ka obhô Jisos Krayis.

³⁰Mfá-mfá ó chəm ên na mme ka enok otîp Obhasi etíbhím. A ri enok í nchane jə́t nji o yéne ên ə̂m n noghá ebhú áji. Ńjə́ne fə́ne nâ ó yugha ên áno sê n nyə́ne n noghá ngá.