Read ejagham Ane firipi, echî 2 Bible Online

Ane firipi, echî 2 - ejagham bible

Ane firipi, echî 2

¹Nâ-ngá é kó sê ekpin ejə́né na Jisos Krayis é kak ên ḿbə́ŋé a? É kó sê okot obhê ó yim ên o rô karé ên onyʉghá-ḿbə́ŋé a? É kó sê é chəm ên biji na Obhasi Ebhare Ntʉgantʉ a? É kó sê o ri ên ágo o foná ên nsôn na onobhá-eji na ntem a?

²N kí səre ên mân bəre deê ó fôn ên ḿbə́ŋé yə́t na atem, okot obhə́né ó jóe bhə́t, íkíkéré fə́ne na ńtʉgântʉ eyəné a joé ejûm jə́t. Tîk m fôn ekpatə́m ogyebhá-ḿbə́ŋé nji ó yim ên ka ekpak njí.

³Deê nne owəné a kâ yîm ejûm a kérá se ekəp é jóe é káre yê átíŋ na kpe ebhú etat a yîm ka obhô a tóŋé biji. Kən deê ntem a jíghá ntem, nne a kó biji se yê á ka fáp kpe ejûm.

⁴Deê nne a kâ kére biji ibhê átíŋ, nne a kérá ntem-nne fə́ne.

⁵Deê íkíkéré ḿbə́ŋé eyəné í jóe ekân-ekân noŋ mfi Jisos Krayis.

⁶Yê ka ekpin ejê a ri Obhasi, kən á ka kó ńgyímí eye noŋ Obhasi se yê a yim nkat.

⁷A kóe biji se yê kpe ejûm á ka fáp, a kô ekpin í nsʉ́ŋ, a chə́bhe nne.

⁸Ka amə̂t í ngun Jisos a ri nne, kən á ka yuŋ biji, a kâm na Obhasi ta a kpô ekʉ̂ ísonê ka ego.

⁹Ka obhô mbí, Obhasi a kî yê ka eji eyúp nji é chíŋi obhô. A káre yê fə́ne mbiŋ nnyi a faŋê a chíŋi chénchén obhiŋ.

¹⁰Nâ ńjə́ne é yími sê ka ebhiŋím mbiŋ i Jisos, kpe bhaghé ejûm ka ósô na ka nsi, kpe ka eték akə́bha-nsi, é rî é tə́m arúŋ.

¹¹Kpe bhaghé ejûm fə́ne é rî é sə́ré ka nnyo se Jisos Krayis nâ a ri Ntûfâm, kən ejík é jóe é káre Obhasi Ńsé.

¹²Atem í ḿbə́ŋé, nâ deê ó yúk ên ə̂m. Ó yuk ên ə̂m ka ebhú n di na ên. Mfá-mfá nji mme cháŋ ágo é nóbhe sê ó yúk ên ə̂m é chíŋ. Deê ó kak ên ikom ó jéghe ên oyim ekpin ejə́né na atem é jóe noŋ Obhasi a wóme. O kí yim ên, karê ên biji ibhə́né na ejík mbâ Obhasi,

¹³ka yê a ri ágo a yimá se ó fôn ên ḿbə́ŋé na ikom mfi o kí yim ên nji yê a wóme.

¹⁴Deê ó yîm ên kpe bhaghé ejûm, otóbhá-ndə́p ó kâ jóe, áfírí á kâ jóe.

¹⁵Echî aŋ? Tîk ó bhó fon ên akôp kpe ka ejûm jə́t, nne nnyo a kí sə́re se ó mom ên cháŋ. Nâ noŋ abhon Obhasi mba á jéna ka nnyen-i-mbá á fóna ekpin ka ngun obhí nnyí. O ri ó jóe ên ebhát mbâ ane abhí ngun nnyí noŋ ńdʉnândʉ mmi ń kára ebhát ka ósô ngurobhú.

¹⁶Ka mbá nnyí, o kí tʉ ên ane á mə́ŋe otîp Obhasi mbi ó kára ekpin. Ebhú ó yim ên nná, tîk n kô ên n yîm nkat ka ofú mbi Jisos a kə́ bha. Echî aŋ? Tîk é tóŋe sê enoghóm nji n noghê na etûm ejámé, é ká tan ka chichi.

¹⁷Kən ebhú tat agyʉ́ŋ amámé nâ á kí gbo ka nsi ka ḿbə́ŋé nnyi o kíi ên na Obhasi noŋ agyʉ́ŋ í nnyam efin. É joé áno, tîk é gyébhe ə̂m, m fôn ogyebhá-ḿbə́ŋé mbí na ên chénchén.

¹⁸Ên fə́ne deê é gyébhe ên, ó fôn fə́ne ogyebhá-ḿbə́ŋé na mme.

¹⁹Ájoé Ńtâ Jisos Krayis a kâm, tîk n tûm Timoti mbâ eyəné mkpât ebhú, a bhá ə̂m na otîp mbi ó kí kak ə̂m ḿbə́ŋé.

²⁰Ń ka fon nne etat a bhighî noŋ yê. Ekpin ejə́né nâ é rî ekpatə́m ejûm mbâ eye.

²¹Ane mba tat á kéra áno a ri mma ábho achot, á ká fon ebhú na etûm í Jisos Krayis.

²²Kən ên áfoné, ó məŋe ên ekpak nji Timoti a tóŋe se yê a bhîk ka etûm Obhasi. Ó məŋe ên ekpak nji mme na yê e yimî etûm ka obhô otîp ogyebhá-ḿbə́ŋé mbi ó kpée na Jisos Krayis, noŋ ńsé na mmon.

²³Ka obhô mbí, tîk n tûm yê mbâ eyəné ebhú nji m məŋê ekpak nji tîk é jóe na mme.

²⁴Ń kam ka etʉri na Ńtâ Jisos bəre kpe mme ḿfoné tîk m bák mbâ eyəné ka mkpât ebhú.

²⁵Kən ń kere bəre tîk é nôp n tûm ntem-mmon-i-nnyen owəré Epafrodayitus a chəbhé njəm ágo mbâ eyəné. Epafrodayitus a yim etûm í Jisos Krayis na mme. A chə̂m na mme ka enok achot Obhasi mma é dáŋa sê á jí ochî. A yîm etûm ejê noŋ ḿgbán nnyo o túmi ên a bhá kak ə̂m obhô.

²⁶N kí tum yê ka a kôt ka biji ibhê se yê a yén ên. É rî a ri ejûm okíma-aya mbâ eyəné nji o yúghi ên sê yê a fôn emaŋé.

²⁷A fôn emaŋé ka etʉri, ta a kə̂t kpít na ekpóóm, kən Obhasi a fôn nsôn na yê. Á ka fon nsôn na yê átíŋ, a fôn na mme eróŋ a yíghi ə̂m ka ekpatə́m nsae nnyi kə́n m fonê ebhú sê yê a kpóe.

²⁸Nâ echî fə́ne nji n toê bəre tîk é nôp é chîŋ ń túm yê a bhá, ḿbə́ŋé a gyebhé ên ka etím nji ó kpo yén ên yê, mme fə́ne amé nsae a man.

²⁹Tabhê ên yê mân na ekpatə́m ogyebhá-ḿbə́ŋé noŋ ntem-mmon-i-nnyen. Deê ó káre ên ejík mbâ chénchén ane mba á rî noŋ Epafrodayitus.

³⁰Echî aŋ? Yê a káre ekpin ejê, kpe ekʉ̂ kə́n a kpô ka obhô etûm í Jisos Krayis, se yê a kak ə̂m obhô mbi ên ó ka bhik ên ekaghám.