Read ejagham Ane firipi, echî 3 Bible Online

Ane firipi, echî 3 - ejagham bible

Ane firipi, echî 3

¹Atem-abhon-í-nnyen, kən ń jéghe nwet amé nnyí, deê ó fôn ên ekpatə́m ogyebhá-ḿbə́ŋé ka ekpin ejə́né na Ńtâ Jisos. Ájoé ḿ kpo seŋ ên achot mma ń daŋ mbá ń seŋ, é bhó karé ə̂m oseŋe. Kən tîk á nyáŋe ên ó bhábhé ên biji.

²Deê ó kó ên ebhú na ane abhí mba á rî noŋ onyam. Á chôt sê ta á kô ekem á kîm wâ nkîm kən o tôp Obhasi.

³Êt nâ e kími mfoné nkîm ka e kí jighi Obhasi ka ikom Ebhare Ntʉgantʉ owe. E kí fon fə́ne ogyebhá-ḿbə́ŋé ka ekpin ejə́ré na Jisos Krayis. É ka fon ebhú na birû mbi ngun á fíi sê nâ ejûm. Kən ájoé sê ḿbə́ne nâ í fáŋe, mme nâ kə́n n kâk biji n chîŋ ochíŋ.

⁴Ájoé nne á fon íkíkéré se birû ábhi nâ í rî ejûm, mme nâ kə́n n kí sum obhô-ngaŋ bəre ń chiŋ ochíŋ.

⁵Ka erû ejə́ré, á jíi ə̂m á kâ ogəm bhə́t á kîm ə̂m nkîm. Mme a ri nne eték Isrel. N dʉ ka ndə́p-i-njû Benjamen, mfoné-mfoné mmon i nsi Ibru. Ka nchot ebhín, n di ka echəme ane Farasi.

⁶M fiî erû ejə́ré ane Jus n chîŋ ochíŋ nji ta n jená n wúbhá ane mba á mághe erû njí á tóp Jisos Krayis. É chot nnyi sê nne a fi ebhín, a yim ka ekpak ebhín é wóme, ń ka fon kpe akôp.

⁷Kən chénchén achot mmá, ń kera bəre ekəp é rî ka etím, toŋ-fan á kí fap chichi ejûm ka obhô Jisos Krayis.

⁸É ká joé sê kpe iyîm mbí átíŋ nâ í táne ə̂m. Chénchén iyîm a ri ntáne, é ká chiŋi ejûm jə́t nji é fáŋe é chîŋ ochíŋ. Ejûm áji é rî sê ḿ mə́ŋe Ntûfâm omé Jisos Krayis. Ka echî ejê, ḿ maghe achot áma fép mbá-njəm bəre a ri achâk, ń jen ń si yê,

⁹ń yak na yê. Nji n di áno na Jisos Krayis mfá-mfá, ń do kpó nok ka biji ibhámé bəre ngun á yúk ə̂m sê, “A ri áno, a fôn ekpin ka nnyen-i-mbá ka ebhín ekíím.” Ejámé ekpin ka nnyen-i-mbá é dʉ̂ ka ḿbə́ŋé nnyi n kíi na Jisos Krayis. A ri Obhasi nâ á kok se ekpin í nne é rî ka nnyen-i-mbá ka ḿbə́ŋé nnyi nne a kíi na yê.

¹⁰Ejûm jə́t nji ń woma a ri eməŋə́m Jisos Krayis, ḿ mə́ŋe fə́ne ikom mfi í rî ka enyəmə́m nji yê a nyəmê ka ekʉ̂. Ń woma ń chə̂m na yê ń yén oseŋe obhê, ń chə́bhe noŋ yê ka ekʉ̂ nji a kpóe.

¹¹Kən tîk m fôn ejámé eji ekumi ebhú-ebhú nji Obhasi á sʉk ane abhê fép mba á kpóe.

¹²Ń ka sə́ré bəre mme ta ń yen echî, obhí ń do yim. Áno asík. N nyə́ne n dáŋá bəre tata ń yén echî ka ebhiŋím nji Jisos Krayis a bhiŋî ə̂m.

¹³Atem-abhon-í-nnyen, n nyə́ne ń ka kép kpá biji ibhámé bəre ta mme ń yen echî ka enoghóm njí, kən ejûm jə́t nji ń yimá é rî sê n kí gyini achot fép mma á chiŋi ə̂m mbá-njəm, ń kébha mma ochî na ḿbə́ŋé-a-ḿbə́ŋé.

¹⁴Nâ ńjə́ne n di ágo n noghá na ikom-ikom bəre ń yen echî, ḿ fôn orʉrí mbi ó rî nâ ekpin ótúm-ótúm nji Obhasi a bhiŋî ə̂m ka mbiŋ i Jisos Krayis.

¹⁵Êt fép mba é kui ka achot Obhasi, deê é fôn ntʉ́ghi ekpin njí. Kən ájoé etʉ̂ ejə́né o ri mba o fonê ên ekpin egyê, Obhasi tîk a tóŋe ên mbá.

¹⁶Kən kpe ekpak-ekpak é rî, deê êt é jî ochî na ńgyímí nnyi e róghe etóbhóm ta é si égyé.

¹⁷Atem-abhon-í-nnyen, deê o gyebhá ên ekpin ejámé noŋ ane etat. É toŋe ên noŋ egaé ekpak erû nji o kí top ên. Kî ên mân amə̂t o gyebhá ên ane mba á yíma noŋ e tóŋe ên.

¹⁸Echî aŋ? Ń səre ên ofú ábhi ntə̂m etî-etî, kən n kí kpo səre ên mfá-mfá, amə̂t ayép-ayép. Ane á rî etî-etî mba á bhó yubhi Jisos Krayis na ekʉ̂ nji a kpóe ka ego.

¹⁹Ane ntʉ́ghi mbá, emana-nchot ábho a ri Obhasi nâ a kí bhibhi ábho. Nji ábho á yubhi á chîŋ ochíŋ a ri efaŋ í ngun. Á kí ko ejûm ísonê á yimá nkat. Á ká fon íkíkéré á kpê na ejûm etat é chíŋí iyîm í ngun.

²⁰Kən eyəré ńgyímí a ri egyê. Êt a ri ane Obhasi nnyo a ri ka ósô. Amə̂t amə́ré á rî ka mbá e chighá sê Ntûfâm owəré Jisos Krayis nnyo á yimá êt e sémá, a maghé ósô a bhá.

²¹Ebhú á bha, tîk a kô ikom ifê mfi á yimá áno iyîm fép í yubha yê, a yóŋe êt e jóe ka ekpak nji yê a ri ágo ka ósô na ejík ejê.