Read ejagham Ane firipi, echî 4 Bible Online

Ane firipi, echî 4 - ejagham bible

Ane firipi, echî 4

¹Atem-abhon-í-nnyen, yûk ên mân. Ń kot ên. Ń wom na ḿbə́ŋé-a-ḿbə́ŋé bəre ń yén ên. Ên nâ o ri ên ogyebhá-ḿbə́ŋé obhámé, o ri ên fə́ne itam otúi ifámé. Atem í ḿbə́ŋé, ka ekpak nji n séŋe nná, gyími ên akát á sí ên nsi ka ekpin ejə́né na Ńtâ Jisos Krayis.

²Ane-akáé mbá ábháe, Eyodiya na Sintiki, n kí goré ên bəre ó yúk ên atem noŋ atem-abhon-í-nnyen mba Ńtâ Jisos.

³We fə́ne, ntem omé nnyo ó yim etûm na mme, n kí goré wâ bəre ó nyáŋé ane-akáé mbá, ka á yim etûm na mme kpe-eji, e jená e kpík ane otîp Obhasi. Á yími etûm chəm-chəm na Kremen na chénchén ane-etûm abhámé mba tat. Obhasi a kâk obhiŋ ábho fép ka nwet ekpin.

⁴Deê ó fôn ên ogyebhá-ḿbə́ŋé kpe bhaghé ebhú ka ekpin ejə́né na Ńtâ Jisos. Ḿ kpo chot bəre fon ên ogyebhá-ḿbə́ŋé.

⁵Deê ntem a kó ekpin ka tebhee na ntem. Ńtâ Jisos a kə́ bha mkpât ebhú.

⁶Nne a kâ chóghe ḿbə́ŋé ka ejûm kpe jə́t. Kən nji o kí goré Obhasi, deê nne a bhə́p Obhasi a karé yê ejûm nji a wóme. Nne a kí bhəp, deê a bhə́p na ekpatə́m ekûp.

⁷Ebhú ó fi ên ka ekpin njí, Obhasi tîk a káre ên ḿbə́ŋé enaám nnyi a faŋê a chíŋi chénchén íkíkéré nne. Ḿbə́ŋé enaám nnyí a kí yim kpe ejûm é bhó yoŋe íkíkéré ifə́né na ḿbə́ŋé eyəné ka ekpin ejə́né na Jisos Krayis.

⁸Atem-abhon-í-nnyen abhámé, kən ń jéghe nwet amé nnyí, n kí səre ên bəre deê o kérá ên iyîm mbi í rî ka mbá nnyi tə́níní na mbi í kí karé nne ejík na mbi í rî ka nnyen-i-mbá. Deê o kérá ên iyîm mbi í ká fon akôp, na iyîm mbi ane á kí fon okot, na iyîm mbi í rî ka nnyen erû. Deê o kérá ên fə́ne iyîm mbi í nóbhe í chiŋ ochíŋ, na iyîm mbi ane á kí kat.

⁹Deê ó yîm ên ekpin ka ekpak nji m kpíi ên, ekpak nji n sə́re ên ka eyum í nnyo na eyimím ejámé ka abhô. Ó yim ên nná, Obhasi nnyo á kará enare tîk a jóe na ên.

¹⁰Ogyebhá-ḿbə́ŋé nan mbi m fonê ka ekpin ejámé na Ńtâ Jisos, nji ó kpo tóŋé ên ə̂m okot. Ń ka sə́ré bəre ó maghe ên ə̂m ekoróm, kən ó ka fon ên a ri ebhə̂k nji o kí toŋe ên okot mbí.

¹¹Ń ka sə́ré fə́ne iyîm mbi ka obhô n di ka eket. Áno asík. Ḿ kpi erû nji bəre deê ń tábhe na abhô ábháe nji-nji é gbóe é káre ə̂m.

¹²Kpe nji n dô məŋé ka etím cháŋ, ka ekpin efaŋ na ekpin eket. Ka kpe ń dî, oya ó súí, kpe n kâ dî, kpe ḿ fôn ofon, kpe ń ka fon, ḿ kpi erû nji bəre kpe bhaghé ebhú, kpe fan kpe fan, deê ń jóe ka ogyebhá-ḿbə́ŋé.

¹³Na ikom mfi Ńtâ Jisos a karê ə̂m, n kí bhik egyímím akát á sí ə̂m nsi, kpe ngun a kpíghi na mme nan.

¹⁴Kən é nop nji ó nyaŋe ên ə̂m ka achot amámé.

¹⁵Ên ane Firipi, ó tʉri ên oməŋé sê ebhú nji m maghê Masedoniya ka mfín ochî ányi nnyi á kpîk ên otîp Obhasi, ên átíŋ nâ o ri ên ane echəme atóbhá Jisos mba o nyáŋe ên ə̂m. Ên átíŋ nâ o gyími na mme, o kará ên ə̂m nji-nji n náne.

¹⁶Kpe ntə̂m yə́t asík nji n di ka eték í Tesaronika, nji-nji mme n wóme ó ka re ên ńjə́ne etúmúm.

¹⁷Ń ka chot ka obhô n wóme ekəp mbâ eyəné, kən ń chorá bəre ekəp é jóe é káre ên ka ekpin ejə́né.

¹⁸Ejûm nji o yimî ên áfo o káre ên ə̂m, é chiŋi obhô, kpe ndem ń ka yén bəre tîk o tûm ên ə̂m ekpatə́m ekəp njí. Ka ntʉ́ghi bikəp mbi Epafrodayitus a kóe a bhák, í yim ə̂m kpe ejûm nji n kí wom cháŋ. Bikəp mbí í rî noŋ kpe énoê akʉ́ egyʉ mma ó ko o káre Obhasi, ḿbə́ŋé a gyébhe yê.

¹⁹Ka obhô chénchén nji Obhasi omé a fonê ka ósô na Jisos Krayis, tîk a káre ên chénchén nji o ri ên ka eket.

²⁰Deê ejík é jóe é káre Obhasi nnyo Ńsé owəré ka ótúm-ótúm. Áno.

²¹Kúp ên chénchén ane Obhasi mba Jisos Krayis a fonê. Atem-abhon-í-nnyen mba á rî ngá na mme á kí kup ên fə́ne chénchén.

²²Chénchén ane Obhasi ngá á tum fə́ne ekûp, títí mba á rî ka ókʉ́rí Ntûfâm i Rom.

²³Deê onobhá-eji mbi Ńtâ Jisos Krayis ó jóe na ên chénchén. Áno.