Read ejagham Ane korose, echî 1 Bible Online

Ane korose, echî 1 - ejagham bible

Ane korose, echî 1

¹Nwet nnyí a dʉ mbâ amé, Pol, nnyo Obhasi a sáŋe ka okot obhê se ń jóe ḿgbán i Jisos Krayis. A ri mme na ntem-mmon-i-nnyen owəré Timoti

²nâ e séŋe e tûm mbâ atem-abhon-í-nnyen ka Korose. Ó ka fon ên akôp, o kî ên ḿbə́ŋé na Jisos Krayis son-son. Deê Obhasi Ńsé owəré a tóŋé ên onobhá-eji, a karé ên fə́ne enare.

³É kubha Obhasi nnyo a ri Ńsé Ntûfâm owəré Jisos Krayis chénchén ebhú nji e kí goré yê ka echî ejə́né.

⁴Echî aŋ? É yuk ekpak ḿbə́ŋé nnyi o kíi ên na Jisos Krayis, na okot mbi o fonê ên na atem-ane Obhasi chénchén.

⁵O fiî ên ekpin njí ka ejûm nji o kíi ên ḿbə́ŋé sê tîk o fôn, Obhasi a kî ên ńjə́ne ka ósô. O yúghi ên nchot nnyí ka ebhú ndaŋa-mbá nji á sə́re ên mfoné otîp ogyebhá-ḿbə́ŋé obhê.

⁶Otîp ogyebhá-ḿbə́ŋé mbí ó bha na ekpatə́m ekəp. É róghé ta ka ofú o yúghi ên nchot o kpê ên na mfoné-mfoné onobhá-eji Obhasi, o mə́ŋe ên fə́ne ekpak ḿbə́ne ó rî ka etʉri. Otîp mbí ó kí jabhâ fə́ne ngun ó jak.

⁷A ri Epafras nâ a kpíi ên achot mmá ka eji ejə́ré. Yê a ri ntem i ḿbə́ŋé ka etûm nji Jisos Krayis a karê êt. Á bhó chaghé ache ka etûm ejê.

⁸A sə́re êt ekpak Obhasi Ebhare Ntʉgantʉ a yimî ên o mə́ŋe nchot okot na atem.

⁹Ka obhô mbí mân, é róghé ta ka ofú mbi e yúghi nchot nnyí, é kət e gorá Obhasi sê a yim ên ó tʉ́ri oməŋé ên nji a wóme. A yim ó fôn oməŋá-ejûm na aron ka achot amê.

¹⁰É joé ka ekpak njí, tîk o yîm ên ekpin nji é bhíghi na nne Ńtâ Jisos, ekpin nji é kí gyebhé yê nnyen egyebhém ka ḿbə́ŋé. Ekpin ejə́né tîk é tóŋe ka ntûm i nno etî-etî, é yimá ên fə́ne o kúá ên ka eməŋə́m Obhasi nono.

¹¹Deê Obhasi Ńsé na ekpatə́m í ikom ifê a karé ên ikom mfi o kí kəp ên ḿbə́ŋé kpe ka mbə́n oseŋe, o kík ên biji nyamḿ na ogyebhá-ḿbə́ŋé.

¹²Ka iyîm mbí chénchén, karê ên yê ekûp. Yê a yimî ên o bhîk ên nji o kí fon ên nkiri ka nji yê a kíi mbâ ane abhê ka otúi ebhát obhê.

¹³A yíghi êt ka óséré ikom ejírim, a jî kî êt ka otúi Mmon okot owe.

¹⁴A ri ka Mmon owe nnyó nâ Obhasi a kí yim êt é sém, a rî fə́ne nsôn a sû obhí obhə́ré.

¹⁵A ri Jisos Krayis ka Mmon nâ a jími noŋ yê ḿfoné Obhasi nnyo nne á bhó yen. Nâ ndaŋa-mbá nne nnyo a ri kpá kən kpe bhaghé énê na kpe bhaghé ejûm é kí top.

¹⁶Ka nan? É chíŋi ka obhô Mmon nnyó kən Obhasi a kí yim chénchén ejûm ka ósô na ka nsi: iyîm mbi nne a kí yen oyén, na mbi nne á bhó yen, na ekumi otúi kpe njə́n na ikom kpe mfə́n na otúi kpe mbə́n na ikom eték. Chénchén mbí í chíŋi ka Mmon nnyó kən Obhasi a yîm. A yimî fə́ne a káre yê.

¹⁷Mmon nnyó nâ a gyím ochî kpe ka jen. Chénchén iyîm í fon mbi ábho ńgyímí ka obhô obhê.

¹⁸Yê nâ a ri echî ka echəme atóbhá abhê nji é rî nâ biji ibhê. Yê nâ a ri eróghá-ndə́p, Mmon i ndaŋa-mbá nnyo a raŋê mbá fə́ne a nyə́me ka ekʉ̂ se kpe ka jen yê a joé ka ochî.

¹⁹Echî aŋ? Obhasi nâ a korê se chénchén ekpin ejê é jóe na Mmon owe.

²⁰Ka obhô Mmon owe, a kôt fə́ne a chə́bhe njəm a tʉ kpe bhaghé ejûm ka ósô na nsi, a kak ka biji. Ka obhô agyʉ́ŋ í Mmon nnyo a kpóe ka ego, a chə́bhe njəm a bhâ na ekone.

²¹Ebhú áji ó ka chəm ên na Obhasi, o ri ên ka ebhan na yê ka ó yimá ên obhí.

²²Kən mfá-mfá, Obhasi Ńsé a tʉ̂ ên a kâk ka biji. É dʉ̂ ka ekʉ̂ nji Mmon owe a kpóe. Echî é rî sê, a kó ên ó fáp ên ka ochî obhê, akôp o kâ fôn ên, ogbo kpe bhə́t o kâ fôn ên, á kâ tóŋe fə́ne indəré sê ó yim ên njí, ó yim ên ńjî.

²³É kí joé ka ekpak njí ájoé ó ka maghé ên ḿbə́ŋé ekíím na yê, o rî ên son-son, ache ó ka chághé ên ka achot amê. Tîk é jóe fə́ne ka ekpak njí, ájoé ó ka tʉ ên biji ó yíghi ka ejûm nji a kpíi ên na ekpak á sə́re ka otîp ogyebhá-ḿbə́ŋé obhê. Otîp mbí mbi á sə́re nná mbâ ane chénchén ka ngun, nâ mme, Pol, n chə́bhe áno n sə́rá.

²⁴Ḿbə́ŋé a kí gyebhâ ə̂m ka oseŋe obhámé ka obhô obhə́né. Echî aŋ? N kí nok bəre ń jéghe oseŋe obhámé ka obhô echəme atóbhá Jisos Krayis. Echəme njí é rî nâ biji ibhê. Jisos Krayis yê ḿfoné a yên oseŋe eróŋ ka obhô biji mbí.

²⁵A ri Obhasi nâ a sáŋe ə̂m se ń jóe nyima-etûm nnyo echəme ejê. Etûm nji a karê ə̂m a ri se ń sə́ré ên otîp obhê na chénchén iyîm mbi í rî ka etím.

²⁶Mbôp nnyí otîp mbí ó rî ka ebhə̂t, ane á ká məŋé, kən mfá-mfá Obhasi a tûp ḿbə́ne jáé ane abhê á yén.

²⁷Obhasi nâ a korê se yê a yim ngun a mə́ŋe sê otîp obhê mbi ó jóe nná ka ebhə̂t a ri mfoné-mfoné ekpatə́m ejûm. Otîp mbí ó rî sê Jisos Krayis a ri ên ka ḿbə́ŋé. Nâ é fap sê tîk o kúmi ên na yê ka eji ejík.

²⁸Nâ ńjə́ne e kí səre ane nchot i Jisos Krayis, e tʉk ábho obhô ka otûŋ, e kók nnyen aron e kpík ane achot mmá sê é yîm kpe énê nnyo a chə̂m na Jisos Krayis a joé ka ekpak nji Obhasi á woma yê a joé.

²⁹Nâ ńjə́ne ń kok ekpatə́m ikom mfi Jisos á kará ə̂m bəre ń kâk ikom ḿ mân etûm nji yê a karê ə̂m se ń yîm.