Read ejagham Ane korose, echî 2 Bible Online

Ane korose, echî 2 - ejagham bible

Ane korose, echî 2

¹Ên ane Korose na Layodisiya na chénchén ane fə́ne mba á ka nok oyén ə̂m, n kí wom ó mə́ŋe ên ekpatə́m enoghóm nji ń noghá mbâ eyəné.

²Echî ń noghá a ri jen? Bəre ń kâk ên ḿbə́ŋé, ó chə̂m ên biji ka okot, ó fôn ên efaŋ ka ḿbə́ŋé. Tîk o mə́ŋe ên mân chénchén achot ebhə̂t mma Obhasi. Achot ebhə̂t mmá a ri Jisos Krayis.

³A ri mbâ eye nâ e kí yen chénchén oməŋá-ejûm na aron Obhasi mbi í rî efaŋ ejê.

⁴Ń chorá áno iyîm mbí chénchén bəre kpe nne yót a kâ kô áfúbhí na ogyebhá-eyum, a rirí ên ó tán mbá.

⁵Kpe noŋ n di áno mbá a râp na ên, ḿbə́ŋé amé a ri ágo na ên. N kí fonâ ekpatə́m ogyebhá-ḿbə́ŋé nji ń yugha sê o kí fighâ ên biji ibhə́né ka nnyen-i-mbá, sê ḿbə́ŋé eyəné nnyi o kíi ên na Jisos Krayis a sôn kpe-eji.

⁶Nâ mân ka ekpak nji o kóe ên Jisos Krayis sê nâ Ntûfâm owəné, choŋ ên ochî, yimâ ên ekpin nji é kí toŋe sê ó chəm ên na yê.

⁷A ri mbâ eye nâ o kí fon ên ikom, ekpin ejə́né na yê é kua é jak ochî. Gyími ên mân son-son ka ḿbə́ŋé nnyi o kíi ên na yê ka ekpak nji e kpíi ên. Karâ ên yê fə́ne ekûp ka chénchén iyîm.

⁸Kó ên ebhú, nne a kâ kə̂n aron í ngun nnyí mma á ká fap kpe ejûm, a rirí ên ó tán ên mbá. Ntʉ́ghi aron áma á dʉ̂ ka okpígha-ejûm ane na ikom íkíkéré ngun nnyí, mbâ Jisos Krayis asík.

⁹A ri ka Jisos Krayis nnyo á jíi noŋ nne, nâ nne a kí yen chénchén ejímí Obhasi, kpe ejûm jə́t é bhó kət.

¹⁰A ri yê nâ a ri Nne-Echî a chíŋi ikom kpe mfə́n kpe mfə́n na ikom eték chénchén. Nji o chəmê ên na yê, Obhasi a káre ên mfoné-mfoné ekpin.

¹¹É dʉ̂ fə́ne ka echəmə́m nji o chəmê ên na Jisos Krayis nâ Obhasi a kaghê ên eriŋ nji é kí toŋe sê ên a ri ane abhê. Eriŋ njí, nji ebhú éməné yê a karé ane Jus, a ri nkîm. Kən nkîm nnyi Jisos Krayis a ri egyê na nnyi ane. Eye a yîm obhí ó ká kpo fon ikom ka ekpin ejə́ré.

¹²Ebhú á fúghi ên ayép, é rî bəre kpe á kən ên na Jisos Krayis. É rî fə́ne noŋ kpe Obhasi a yîm ên ó nyəme ên ka ekʉ̂, ó fon ên ekpin efê. É dʉ̂ ka ekamám nji o kamê ên na ikom mfi Obhasi a fonê ta a yîm Jisos Krayis a nyəmê ka ekʉ̂.

¹³Ka ndaŋa-mbá ebhú, o ri ên bəre kpe o kpóe ên okpó, ka ó yim ên obhí. Ên fə́ne a ri ane nték ajéné, ebhín ane Jus ó bhó top ên. Kən mfá-mfá Obhasi a káre ên ekpin efê, ka ó chəm ên biji na Jisos Krayis. A rî nsôn a sû obhí obhə́ré.

¹⁴Ndaŋa-mbá ebhú, e fî Obhasi arə́m, ka e gboê ebhín ejê. Kən mfá-mfá, a rî êt nsôn a chóbhe chénchén arə́m mma á séŋe nná. É rî noŋ kpe a kûm ḿmáne ka ego na Jisos Krayis.

¹⁵Ebhú Jisos Krayis a kpóe ka ego, a fôn érûm ka enok ejê na ikom kpe mfə́n kpe mfə́n na ikom eték chénchén. A tóŋe ngun ndə́m se yê a chíŋi iyîm mbí.

¹⁶Nâ ka kâm ên mân kpe nne yót a táŋ ên ka édî nji o kí di ên, na kpe nji o kí gwo ên. O kâ kâm ên fə́ne á tâŋ ên ka erom Obhasi nji o kí di ên, kpe é rî nji nnyam-ósô mfê, kpe nji efîn Obhasi.

¹⁷Iyîm mbí chénchén a ri efóŋé, í tóŋa a ri nji é kə́ bha mbá-ochî. Mfoné ńjə́ne mân a ri Jisos Krayis.

¹⁸Nâ o kâ kâm ên fə́ne kpe nne yót a yim ên ó yíghi ḿbə́ŋé na Obhasi, ekəp ejê é chiŋ ên. Ane mbá á sə́ra sê ábho á bhó yuŋ biji kən áfo a ri áfúbhí. Sê ábho á jígha fə́ne baénjel. Á kí səre jə́t na jə́t nji sê á yéne noŋ kpe ndem. Íkíkéré ngun í yim ábho á toŋa biji sê á məŋe ejûm, kən áfo a ri chichi.

¹⁹Á maghe ḿbə́ŋé ekíím na Jisos Krayis, nnyo a ri nâ echî ejə́ré. Yê nâ a fiî echəme atóbhá abhê nji é rî noŋ biji nne yót mbi í rî biji ibhê. Na Jisos Krayis ka echî, e kí chəm ka akôn ka akôn noŋ biji nne yót, a fik êt noŋ ejûm jə́t, e kúá fə́ne ka ekpak Obhasi a wóme.

²⁰Ó kpo ên na Jisos Krayis, ikom íkíkéré ngun nnyí í ká kpo fon kpe ejûm í kpê na ên. Jen mân o nyə́ne ên o yimá ekpin noŋ ane ngun? O kí yim nan o kamá ên na achot mma ane á kí səre sê,

²¹“Nne a kâ fî njí ejûm ka obhô! Nne a kâ yúŋi ńjî ejûm ka nnyo! Nne a kâ kə́me ńjî ejûm!”

²²Chénchén bibhín mbí í kpée a ri na iyîm í ngun mbi í ka, í bhîp. Bibhín í nchane a ri íkíkéré na okpígha-ejûm mbi ane ngun.

²³Ndaŋa-mbá, ane á kéra sê bibhín mbí í kára ane nnyen íkíkéré, ka í kí yim ane á jigha baénjel, á yimá noŋ kpe á bhó yuŋ biji, á kamá oseŋe ka biji ábho. Kən ka etʉri, bibhín mbí í ká fap kpe ejûm, ka í bhó yim nne a fi biji a kâ tôp obhí ḿbə́ŋé obhê.