Read ejagham Ane korose, echî 3 Bible Online

Ane korose, echî 3 - ejagham bible

Ane korose, echî 3

¹Obhasi a yîm ên ó nyəme ka ekʉ̂ ka ekpin ejə́né na Jisos Krayis. Nâ deê ḿbə́ŋé eyəné a joé a ri ka iyîm mbi í rî ka ósô. A ri ka ósô nâ Jisos Krayis a kun ka ekumi ejík, mkpe obhô-orûm Obhasi.

²Deê ḿbə́ŋé eyəné a joé a ri ka iyîm ósô, a kâ jóe ka mbi ngun.

³Echî aŋ? Ekpin ejə́né nji ebhú áji é kpo. Nji mfá-mfá á ki na Jisos Krayis mbâ Obhasi.

⁴Jisos Krayis nâ a ri mfoné-mfoné ekpin ejə́né. Ebhú á chəbhé njəm a bhák, ên fə́ne o kí fap ên na yê ka ekpatə́m ejík ejê.

⁵Nâ mân deê ó mághe ên kpe bhaghé ekpin í ngun nji o fonê ên ebhú áji. Iyîm ábhi noŋ achot enuŋ akôp, ekpin akôp-ákôp, ekpatə́m ekot iyîm, íkíkéré ibhí, na okorá-ntí mbi ó rî noŋ ajom etóbhóm.

⁶A ri ka obhô achot abhí ntʉ́ghi mmá nâ Obhasi a kí toŋe oyámá-ḿbə́ŋé obhê.

⁷Nâ ekpak ekpin nji ebhú áji o fonê ên, ka achot mmá chénchén nâ á fíi ekpin ejə́né ndə́m.

⁸Kən mfá-mfá, maghê ên ntʉ́ghi achot mmá. Maghê ên oyámá-ḿbə́ŋé, íkíkéré ibhí, oyírí na atem, mbiŋ i ntem ebhíbhím na énə́mé achot echoróm ka nnyo.

⁹Ka eji ó maghe ên ekpin ejə́né nji ebhú áji, ó ko ên nji fê, deê nne mân a kâ sə́re áfúbhí na ntem. Ekpin nji fê é rî ágo é kua na oməŋá-ejûm Obhasi ka ekpak fə́ne nji ejímí Obhasi nnyo a yimî ngun.

¹¹Ka ekpin efê nji o kpô fon ên nná, kpe nne nnyo a kpô chíŋí ntem cháŋ. Ane Jus, á ká chiŋi ajéné, akímá-nkîm á ká chiŋi mba á bhó kim nkîm. Ane mba á kpíi nwet, á ká chiŋi mba á ká kpi, abhon-í-nsi á ká chiŋi asʉ́ŋ. Echî aŋ? Jisos Krayis a ri chénchén ejûm, a ri fə́ne kpe ka jen.

¹²Ên a ri ane Obhasi. A korê ên okot kən a sâŋ se ane abhê. Nâ ri ên atem nsôn, tóŋâ ên onobhá-eji, ka yúŋa ên biji, kô ên ekpin ka tebhe, kə́bhâ ên ḿbə́ŋé.

¹³O kâ fúbhá ên ḿbə́ŋé. Nne á yim ên obhí, ri ên nsôn, gyinî ên ḿbə́ne. Ńtâ Jisos a rî nsôn a sû obhí obhə́né, nâ yim ên fə́ne ka ekpak njí jə́t na atem.

¹⁴Nji é fáŋe é chîŋ ochíŋ a ri okot. Okot ó chúi chénchén iyîm mbi ngá í chəbhe ejûm jə́t.

¹⁵Deê ḿbə́ŋé enaám nnyi a dʉk mbâ Jisos Krayis a tʉ ên mbá, ka Obhasi a bhîŋ ên se ó bhá chə́me ên eji jə́t ka ntʉ́ghi ḿbə́ŋé enaám nnyí. Kúbhâ ên fə́ne Obhasi kpe ka bhaghé ejûm.

¹⁶Deê nchot i Jisos Krayis na chénchén efaŋ nji é rî ka ńnyə́ne a joé ka ekpin ejə́né. Kpî ên atem, o sə́rá ên atem achot na chénchén oməŋá-ejûm. Kôn ên nkon i Debhit na nnyi ane etat á kóne, na chénchén nkôn Obhasi. Kôn ên nkôn nnyí mbâ Obhasi na ekûp ka ḿbə́ŋé eyəné.

¹⁷Kpe jen mân nji o kí yim ên ka echoróm ka nnyo na ka eyimím ka obhô, yîm ên ńjə́ne ka mbiŋ i Ńtâ Jisos Krayis, o kará ên ekûp mbâ Obhasi Ńsé ka mbiŋ i Jisos nnyí.

¹⁸Ên ane-akáé mba o ri ên na arûm, kî ên biji ibhə́né ka oséré arûm abhə́né. Nâ ekpak o fonê ka ejoóm ka ó chəm ên na Ńtâ Jisos.

¹⁹Ên ane-arûm mba o ri ên na akáé, deê ó kôt ên akáé abhə́né, o kâ chúbhi ên na ábho.

²⁰Ên abhon, jígha ên ásé abhə́né ka chénchén ejûm, ka nâ ejûm nji é gyébha Ńtâ Jisos.

²¹Ên ásé, ka yímâ ên ejûm nji é kí yam abhon abhə́né. Ó yimá ên, tîk ó bhó kaghâ ên ábho ḿbə́ŋé.

²²Ên asʉ́ŋ, jíghâ ên ásé abhə́né ka chénchén ejûm. Yim ên etûm ejə́né na ḿbə́ŋé eyəné jáé o tóŋá ên ejík mbâ Ńtâ Jisos. É kâ jóe sê ta ásé abhə́né á yén ên, á gyébhe ḿbə́ŋé na ên.

²³Kpe bhaghé etûm nji á káre ên, yim ên ńjə́ne na ḿbə́ŋé eyəné chénchén, o məŋá ên sê ó yimá ên áno etûm í Ńtâ Jisos, nji ntem-nne asík.

²⁴O məŋá ên fə́ne sê tîk o fôn ên ekəp nji Ńtâ Jisos a kíi mbâ ane abhê. A ri Ńtâ Jisos nâ ó tʉgha ên áno.

²⁵É kí joé ka ekpak njí, ka nyima-obhí a ri a fon orʉrí obhê mbi ó bhíghi obhik, ka Obhasi a kí taŋ ngun á bhó kep nne kpe yót ka ochî.