Read ejagham Ane korose, echî 4 Bible Online

Ane korose, echî 4 - ejagham bible

Ane korose, echî 4

¹Ên ane mba o fonê ên asʉ́ŋ, fiî ên ábho nono, o kâ séŋe ên ábho, ka ó məŋe ên sê ó fon ên fə́ne Ńsé nnyo a ri ka ósô.

²Karê ên biji, gorê ên Obhasi. Nji ó gorá ên yê, kó ên ebhú, o kúbhá ên yê ka chénchén ejûm.

³Gorâ ên yê sê a rəbhé êt mbá, é jên é tíbhí ane achot ebhə̂t amê mma á kpée na Jisos Krayis. Ó məŋe ên sê a ri ka obhô otîp mbí nâ n di áno ka ókúmí égyé.

⁴Gorê ên fə́ne sê a kak ə̂m obhô, ń tʉ́ri osə́ré otîp mbí ekpak nji m fonê ka etíbhím ane á yúk, á gyʉ́rí.

⁵Deê ó tóŋe ên énoê erû na ane mba cháŋ ka echəme atóbhá Jisos. Deê kpe mô ebhú nnyo o fonê ên, ó kó ó sə́re ane otîp Obhasi.

⁶Deê nchot eya ka nnyo a tóŋé onobhá-eji, deê a kará ane ogyebhá-ḿbə́ŋé. Məŋê ên fə́ne ekpak o kí fe ên ebhə̂p í nne ka nnyen-i-mbá.

⁷Tichikus tîk a sə́re ên chénchén ejûm é kpê na mme. Yê a ri ntem i ḿbə́ŋé, á yimá etûm Obhasi, á bhó chaghé ache. É chəm na Ńtâ Jisos, é chəbhe atem-ayimá-etûm.

⁸N túmi yê mbâ eyəné bəre a yim ên ó mə́ŋe ekpak é rî ngá na êt, a kak ên fə́ne ḿbə́ŋé.

⁹Onesimus, ntem i ḿbə́ŋé etat, a kə́ bha na Tichikus. Onesimus a ri nne owəné nnyo á yimá fə́ne etûm Obhasi, á bhó chaghé ache. Ane mbá ábháe tîk á sə́re ên chénchén ekpak é chíŋa ngá.

¹⁰Aristakus, nnyo a ri ngá ka ókúmí na mme, se ń kúp ên. Mak, nnyo mmon-i-nnyen i Banabas, se ń kúp ên fə́ne. Ta ń seŋ ń səre ên bəre á bha ágo, fiî ên yê nono.

¹¹Josuwa, nnyo á bhíŋa fə́ne sê Justus, se ń kúp ên eróŋ. Təm ane mbá ásá nâ á rî ane Jus mba á chəbhe ane abhə́ré, á yíma etûm otúi Obhasi ngá na mme. Á kí nyaŋe ə̂m fə́ne kpe-eji.

¹²Epafras, nne ka echəme ejə́né eróŋ, a kí kup ên. Yê á yimá etûm í Jisos Krayis fə́ne. A kí gorâ Obhasi nnyen egoróm chénchén ebhú ka obhô obhə́né. A kí gorâ se ó gyímí ên akát á sí nsi ka chénchén nji Obhasi a wóme. Se ó kúi ên ka achot Obhasi, kpe efup ó ro kpó fon ên.

¹³Mme ḿfoné, ń yen na amə̂t amámé ekpak á yimá etûm na echî-echî se yê a nyáŋe ên na ane Layodisiya na Iyeraporis.

¹⁴Luk, nnyo a ri nne-njân, nnyo e korê kpe-eji, na Demas sê ń kúp ên.

¹⁵Kúp ên atem-abhon-í-nnyen mba Layodisiya á káre ə̂m. Kûp ên fə́ne Nimfa na atem-abhon-í-nnyen mba á chəmá ka njû eye.

¹⁶Á bhiŋ nwet amé nnyí á sə́re ên, nok ên fə́ne ka ekpak á kí bhiŋ á sə́ré ane echəme atóbhá Jisos ka Layodisiya. Bhiŋ ên fə́ne nwet nnyi a dʉ Layodisiya.

¹⁷Sə́re ên Achipus sê a jeghé etûm nji á káre yê sê a yim noŋ nyima-etûm i Ńtâ Jisos.

¹⁸Mme Pol, na obhô obhámé, mme ḿfoné, n kí jeghé nwet nnyí. Ka gyíni ên sê n di ngá ka ókúmí. Deê Obhasi a tóŋe ên onobhá-eji.