Read ejagham 1 Ane tesaronika, echî 2 Bible Online

1 Ane tesaronika, echî 2 - ejagham bible

1 Ane tesaronika, echî 2

¹Atem-abhon-í-nnyen, ên áfoné ó məŋe ên sê ejen ejə́ré nji e bháe ágo é ká joé ka chichi.

²Ó məŋe ên sê kən é bhá ágo nnyi eték ejə́né, ane á kare êt onyʉk, á tu êt ka eték í Firipi kpe-eji, ka echî nchot Obhasi. Kən Obhasi owəré a káre êt osoná-ḿbə́ŋé se é sə́ré ên otîp ogyebhá-ḿbə́ŋé obhê kpe noŋ ane etî-etî á ká wom áno sê á yén êt na amə̂t.

³Egoróm nji é gorá ên sê ó kâm ên na esə́re Obhasi, é ka tán mbá, é ka fon kpe íkíkéré ibhí fə́t. É ka wóm fə́ne sê é ríri ên.

⁴Kən é səra ên ka ekpak nji Obhasi a wóme, ka yê a gáe êt a yên se é bhik. A káre mân otîp ogyebhá-ḿbə́ŋé obhê ka obhô obhə́ré. É bhó yim etûm sê tata ngun á gyébhe ḿbə́ŋé na êt, é kebha Obhasi ka ochî. Echî aŋ? Yê nâ a kí kep ekpak íkíkéré mfi e fonê.

⁵Ó məŋe ên, ên áfoné, sê ebhú e bháe é ka sə́ré na ogyebhá-eyum sê é ríri ên. É ka sə́ré ên fə́ne sê é fôn kpe ekəp etat ka etím. Obhasi nâ a ri ntî-isê owəré.

⁶É ka sə́ré ên fə́ne, sê kpe ên, kpe ane etat, á kât êt. Noŋ ágbán í Jisos, kə́n é fon ikom mfi e kí to ên ó kó kpe bhaghé ejûm nji e wóme ó bhá, kən êt é ka yim áno.

⁷E kóe ekpin ka tebhe na ên, noŋ nne-nkáé mmon á gyek mmon owe.

⁸Ka ekpak okot mbi e fonê na ên, e chími sê otîp ogyebhá-ḿbə́ŋé ḿbə́ne-mbənê asík e kí səre ên, kən kpe ekʉ̂ e kí kpo ka echî ejə́né. Okot obhə́ré na ên ó faŋ ó chiŋi kpe bhaghé ejûm í ngun.

⁹Atem-abhon-í-nnyen, é kam sê o nyə́ne o tirá ên ekpak e yimî etûm na ḿbə́ŋé-a-ḿbə́ŋé ka ebhú e ri ágo na ên. E yimî etûm atʉ́ na efín sê é fôn imə́ré ntí édî êt áfoné, e kâ káre ên oseŋe nji é səra ên otîp ogyebhá-ḿbə́ŋé Obhasi.

¹⁰Ên a ri atî-isê abhə́ré na Obhasi yê ḿfoné. Ó məŋe ên ekpak ekpin nji e fiî ka ekam ejə́né mba o kíi ên ḿbə́ŋé na Jisos. E yimî ekpin ka nnyen-i-mbá, akôp é ka fon nji nne etat kə́n a sə́re se é gbo.

¹¹Nan? Ó məŋe ên ekpak nji e fiî ên chénchén noŋ ńsé abhon a fiî abhon abhê.

¹²E kâk ên ḿbə́ŋé, e kâk ên ikom, e tʉ́ŋá ên fə́ne sê ó yîm ên ekpin nji é kí gyebhé Obhasi ka ḿbə́ŋé, Obhasi nnyo a bhiŋî ên se ó fôn ên eji ka otúi obhê na ejík ejê.

¹³E kí kup Obhasi chénchén ebhú fə́ne. Echî aŋ? Nji e kóe otîp obhê e bhák mbâ eyəné, o yûk ên, o kâm ên na ḿbə́ne. O tábhe ên ka a ri eyum Obhasi ka etʉri, ó ka kéré ên se a ri nji ane ngun. A ri eyum Obhasi njí nâ é yimá etûm ka ḿbə́ŋé, ên mba o kíi ên ḿbə́ŋé na yê.

¹⁴Atem-abhon-í-nnyen, ekpak achot mma á fábhe na ane Obhasi ka ebhat í Judiya á fap fə́ne na ên. Ekpak ane Jus á káre atóbhá Jisos Krayis oseŋe ka Judiya nâ ekpak fə́ne nji ane abhə́né á káre ên.

¹⁵Ane Jus nâ á yúi Ńtâ Jisos, ábho nâ á yúi akará-otîp Obhasi éməné. Mfá-mfá á bîm êt eróŋ. Erû njí é bhó gyebhé Obhasi ka ḿbə́ŋé kpe mkpât. Erû njí fə́ne é tóŋa sê á kí bhan kpe bhaghé énê.

¹⁶Ka nan? Á nok mkpak a mân nnyi kə́n á kí taŋé êt e kâ kpî achot Obhasi mbâ ane nték ajéné. Achot mmá ngá nâ á kí yim ane á sém. Kən obhí mbí nâ ejegha-ndə́p. Á yim tata Obhasi a yâm ḿbə́ŋé a bhíbhi ábho.

¹⁷Atem-abhon-í-nnyen, ka mkpât ebhú á yími áno e mághe ên, ḿbə́ŋé á ka gyebhé êt ka etím. É nok sê é kpó bha ejen ágo. Ka ḿbə́ŋé eyəré, kpe noŋ é ro kpó yen áno atem, é ka gyiní ên.

¹⁸Nâ ńjə́ne e wóme sê é chə́bhe njəm é bhá. Mme Pol, ka biji ibhámé, ń nok ntə̂m etî-etî bəre ḿ kpó si mbâ eyəné, kən Satan a gbʉ́i mbá.

¹⁹Kən echî a ri jen nji é woma é bhá kpo yen ên? To ebhú Ńtâ Jisos á bha, ên nâ o kí joé ên osona-ḿbə́ŋé na ejûm nji ogyebhá-ḿbə́ŋé ejə́ré ka ochî obhê. Ên nâ e kí ko é tóŋe noŋ érûm ka etûm nji yê a káre êt.

²⁰Ka etʉri, ên nâ o ri ên noŋ ejûm í nkat ejə́ré. Ogyebhá-ḿbə́ŋé obhə́ré ó dʉk mbâ eyəné.