Read ejagham 1 Ane tesaronika, echî 5 Bible Online

1 Ane tesaronika, echî 5 - ejagham bible

1 Ane tesaronika, echî 5

¹Atem-abhon-í-nnyen, ka nchot ofú na áwa mma achot mmá á kí fap, é ká kpo nop se é séŋ é kpê na ńnyə́ne.

²Echî aŋ? Ên áfoné, ó tʉri oməŋé ên sê Ńtâ Jisos a kə́ bha gbantə́m noŋ nnyágha-ejʉ̂ nnyo a kə́ bha ka njû eya ó bhó məŋé.

³Ebhú ane á kí ki ḿbə́ŋé sê, “Nn̂, eték ejə́ré é rî nono, kpe nchot cháŋ, e kí kumí biji í nak êt.” Ka ntʉ́ghi ebhú áji, ekpatə́m í nchot é bhâ gbô ábho. Kpe ónyáŋe ó bhó kpo joé. É kí joé noŋ ojî mbi ó fi nne-nkáé gbantə́m.

⁴Kən atem-abhon-í-nnyen, ó məŋe ên achot mmá chénchén. Deê ofú mbí ó kâ gbô ên gbantə́m noŋ ejʉ̂.

⁵Ên fép o ri ên ane mba á jéna ka ebhát na efín, ó ka joé ên ane mba á yíma achot ka ejírim na atʉ́.

⁶Ka obhô mbí, deê e kâ yáe eyô é gyíni biji noŋ ane mba tat. Deê é mə́ŋe ekpak nji e kí fi biji ta ofú ábhi ó sí.

⁷A ri na atʉ́ nâ ane á kí yae eyô. A ri na atʉ́ nâ agwóghá-aməm á gbôk.

⁸Kən êt nâ e ri ka ebhát, deê é fî biji. Deê ḿbə́ŋé nnyi e kíi na Jisos, na okot mbi e fonê na atem, í nyáŋé êt noŋ nkʉ̂ enok. Deê osona-ḿbə́ŋé obhə́ré mbi ó rî sê Obhasi a kí yim êt e sémá ó nyáŋé êt noŋ itam enok.

⁹Echî aŋ? Obhasi a sáŋe êt se Jisos Krayis a yim êt é sém, e kâ chə́me ka oseŋe oyámá-ḿbə́ŋé mbi yê á foná na obhí.

¹⁰A re Ńtâ Jisos nnyó nâ a kpóe ka echî ejə́ré se kpe e kpóe okpó na é ka kpó, deê é chə̂m é fôn ekpin na yê.

¹¹Deê ó nyáŋé ên mân atem, o kâk ên atem ḿbə́ŋé. É məŋe sê o ri ên ágo o yimá erû njí kən deê ó fî ên ka obhô ábhi.

¹²Atem-abhon-í-nnyen, e kí goré ên sê ó káre ên ejík mbâ ane mba á rî ane-echî á yimá etûm ka ekam ejə́né, á tʉ̂k ên mbá, á kpik ên achot amê.

¹³Karê ên ábho ekpatə́m ejík, tóŋé ên ábho okot ka obhô etûm nji á yíma. Joê ên ka ekone na atem eróŋ.

¹⁴Atem-abhon-í-nnyen, e kí sere ên sê ó tʉ̂ ên ane abhə́né obhô ka otûŋ á kâ kúmi ajan, ejûm á yíma cháŋ. Nok ên na mba á fóne efup ka ḿbə́ŋé á yíghi efup áji. Nyáŋe ên mba á ká fon osoná-ḿbə́ŋé, nne a kâ kô ejûm ka ofúbhá-ḿbə́ŋé na nne kpe yót.

¹⁵O kâ kâm ên sê ntem a fé obhí na obhí, kən deê onono eyimím na ntem na ane chénchén ó jóe ên ejûm eyúp kpe bhaghé ebhú.

¹⁶Joê ên ka ogyebhá-ḿbə́ŋé kpe bhaghé ebhú.

¹⁷Gorê ên Obhasi chénchén ebhú.

¹⁸Kpe jen-jen nâ é tə́me ên, karê ên yê ekûp. Nâ ekpak nji yê á woma se ó yîm ên ka ekpin ejə́né na Jisos Krayis.

¹⁹Ka gbʉ́í ên Obhasi Ebhare Ntʉgantʉ nnyo a kí yim etûm ka ekpin ejə́né.

²⁰O kâ kô ên ńgô fóŋ nji etʉ̂ ane abhə́né á kí karé otîp mbi sê ó dʉ̂ mbâ Obhasi.

²¹Kən gaê ên achot chénchén, yên ên ájoé á dʉ̂ mbâ Obhasi ka etʉri. Tôp ên mma no.

²²Maghê ên mma bhí chénchén.

²³Deê Obhasi, nnyo á kará enare, a su ên ó gyímí ên kpe akôp cháŋ ka achot chénchén. Deê yê a yim ên kpe akôp nne owəné a kâ fôn ka ńtʉgântʉ, ka ḿbə́ŋé na ka ekpin fép tata ebhú áji é sî nji Ńtâ Jisos Krayis a kə́ bha.

²⁴Obhasi nnyo a sáŋe ên, tîk a yîm etûm njí ka biji ibhə́né, ka yê nne áfúbhí asík.

²⁵Atem-abhon-í-nnyen, gorê ên fə́ne Obhasi mbâ eyəré.

²⁶Kup ên chénchén atem-abhon-í-nnyen ágo, o tamá ên ábho ngaŋ ka mbiŋ Obhasi.

²⁷Ka ikom mfi Ńtâ Jisos, n kí səre ên bəre ó bhîŋ ên nwet nnyí mbâ atem-abhon-í-nnyen chénchén á yúk.

²⁸Deê onobhá-eji Ntûfâm owəré Jisos Krayis ó jóe na ên.