Read ejagham 2 Ane tesaronika, echî 3 Bible Online

2 Ane tesaronika, echî 3 - ejagham bible

2 Ane tesaronika, echî 3

¹Atem-abhon-í-nnyen, ka ejeghé nchot, deê ó góre ên Obhasi ka echî ejə́ré. Gorê ên Obhasi sê a kak êt ikom é nôk otîp mbi Ńtâ Jisos ó jên wát-wát ó jábhe ngûm, ó fôn ejík noŋ ó yími ka ekam ejə́né.

²Gorê ên fə́ne Obhasi sê deê a kâ kâm ane abhí á yîm êt ejûm, ka ane chénchén asík nâ á káme na otîp obhê.

³Kən Ńtâ Jisos a kí yim nji a chimî, tîk a kâk ên ikom, a nyáŋe ên ka obhô nne-ndibhí.

⁴Ka ekpin ejə́ré na Ńtâ Jisos, é ka fon kpe efup ka ḿbə́ŋé na ên. É məŋe sê o ri ên ágo o yimá ên chénchén iyîm mbi é səra ên, sê tîk o yimá ên o jak ochî.

⁵Deê Ńtâ Jisos a yim ên ó tʉ́ri oməŋé ên okot Obhasi na okə́bhá-ḿbə́ŋé mbi yê Jisos Krayis á kará ane.

⁶Atem-abhon-í-nnyen, é ko mbiŋ nnyi Ńtâ Jisos Krayis é səre ên sê deê o kâ chə̂m ên biji na ane mba á kíi ḿbə́ŋé na Jisos kən á chə́bhe ajan, ejûm á yíma cháŋ, á bhó top achot mma e sə́re ên.

⁷Ên áfoné ó tʉri oməŋé ên nono sê o ri ó yîm ên ka ekpak êt e yimî. Ka ebhú e ri ágo, é ka jan ojan.

⁸É ka fə́t abhô e kî sê ane á kə̂p êt iyîm okəp, kən e gyée ka etûm na echî-echî, atʉ́ na efín, sê é fôn édî êt áfoné, e kâ káre ên oseŋe.

⁹E kamê ekpatə́m etûm njí, cháŋ sê é ka fon ikom mfi kə́n e bhə̂p ên ogye obhə́ré, kən e yimî sê é kpí ên erû nji o kí top ên.

¹⁰Ebhú e ri ágo na ên, e sə́rá ên sê nne nnyo á to se yê á bhó yim etûm, a kâ káre yê fə́ne édî.

¹¹É chorá áno nchot nnyí, ka é yuk sê etʉ̂ ane abhə́né á rî mba á jána ojan, ejûm etat cháŋ nji ábho á yíma é ká chiŋi a ri nnyo ekaghám ka nchot ane etat.

¹²Ka ikom í Ńtâ Jisos Krayis, e kí tʉ ntʉ́ghi ane mbá obhô ka otûŋ sê á yóŋé ên ekpin, á nôk ekpak á kí yim etûm á gyê biji.

¹³Kən atem-abhon-í-nnyen, deê o kâ kêt ên ono eyimím.

¹⁴Ebhú tat nne yót tîk a jóe ka echəme ejə́né nnyo se yê á bhó yuk otîp obhə́ré ka osêŋ mbí. Ó yen ên nne ntʉ́ghi nnyó, məŋê ên yê nobhé-nobhé, o kâ chə̂m ên biji ibhə́né na yê. Tîk echî é yûp yê.

¹⁵Kən deê o kâ bhân ên yê, tʉ ên yê obhô ka otûŋ, ka yê a ri ntem-mmon-i-nnyen eróŋ.

¹⁶Deê Ńtâ Jisos yê ḿfoné nnyo a ri nâ echî enare a karé ên enare ejê chénchén ebhú kpe ka bhaghé ejûm. Deê a joé na ên chénchén.

¹⁷Na obhô obhámé mme ḿfoné, mme Pol, n kí seŋ ń kúp ên. Kpe mbə́n osêŋ obhámé mbi n kí seŋ mbâ nne nâ ekpak nji ń seŋa.

¹⁸Deê Ntûfâm owəré Jisos Krayis a tóŋé ên chénchén onobhá-eji.