Read ejagham 1 Timoti, echî 1 Bible Online

1 Timoti, echî 1 - ejagham bible

1 Timoti, echî 1

¹Nwet nnyí a dʉ mbâ amé, Pol, nnyo Obhasi a sáŋe se ń jóe ḿgbán i Jisos Krayis. A ri Obhasi, nnyo á yimá êt e sémá, na Jisos Krayis yê ḿfoné nnyo a ri osoná-ḿbə́ŋé obhə́ré nâ á túmi ə̂m.

²N séŋe n tûm wâ, Timoti, nnyo o ri mfoné-mfoné mmon omé ka ḿ kpi wâ nchot Obhasi. Deê Obhasi Ńsé owəré na Ntûfâm i Jisos Krayis á tóŋé wâ onobhá-eji, á rî wâ nsôn, á káre wâ fə́ne enare.

³Kən ḿ mághe ḿ bá nnyi Masedoniya n sə́re wâ bəre ó kúmi ka Efesus. Bəre ó nôk etʉ̂ ane mba á kpîk áno okpígha-ejûm áfúbhí á mághe ḿbə́ne ekpíím.

⁴Sə́re ábho á mághe fə́ne atəm achot áfúbhí áma, na ékúí esə́re ntə̂m cháŋ ekpak ane-atəm ábho á rî. Achot mmá á bhâk a ri na áfírí, á bhó yim nchot Obhasi a ji ochî. Nchot Obhasi a kí ji ochî a ri ka ḿbə́ŋé nnyi e kíi na Jisos.

⁵Echî ń kará ebhín njí a ri jen? Bəre ń nyíŋi ḿbə́ŋé ane á fôn okot mbi ó kí dʉ ka ḿbə́ŋé jáé efonóm, na mfoné ḿbə́ŋé ekíím na Jisos.

⁶Etʉ̂ ane á maghe achot mmá chénchén, á tan mbá á gye ka énə́mé achot.

⁷Á kí nok á kpí ebhín Obhasi mbâ ane, ńga ábho a ri mfoné-mfoné achí. Á ká məŋé ebhín í nchane ka ekpak ábho á kéra sê á məŋe.

⁸É məŋe sê ebhín Obhasi a ri nnyen ejûm ájoé nne á fi ńjə́ne ka ekpak a fonê ka efiím.

⁹É məŋe fə́ne sê á ká yim ebhín mbâ anyen-ane. Á yími mbâ agboghá-ebhín, na ane abhí, na ane mba á bhó fup Obhasi, na mba á bhó top ebhín Obhasi, á kóra achot akôp. Á yími fə́ne mbâ ayúá-ane mba kpe ásé ábho kə́n á yúi.

¹⁰Á yími mbâ agboghá-ekun, na ane mba á maghe enuŋ ka ekpak Obhasi a yimî se nne-ndûm a nuŋí na nne-nkáé, á chəbhe á yimá ekpak etat. Á yími mbâ ane mba á jʉ́gha abhon ane etat, na mba á sə́ra áfúbhí, na mba á gyíma ntî-isê áfúbhí, na mba á yíma achot mma mfoné-mfoné okpígha-ejûm Obhasi ó ká wom.

¹¹Mfoné-mfoné okpígha-ejûm mbí o kí yen ka otîp ogyebhá-ḿbə́ŋé mbi á mághe ka obhô obhámé sê ń sə́ré. Otîp mbí ó rî nná na ejík ó dʉ̂ mbâ Obhasi nnyo á kará enare.

¹²N kí karé ekûp mbâ Ntûfâm owəré Jisos Krayis ka ikom mfi a karê ə̂m ka etûm njí. Ń kup yê nji a kóe ə̂m se ḿ bik nnyo ń tʉgha yê.

¹³A kóe ə̂m se ḿ bik, á ka kí echî se ebhú áji ń chorá obhí m kpek na yê, n yúá ane abhê, n túk yê. Kən Obhasi a rî nsôn a sû obhí obhámé. Echî é rî sê ebhú áji ń ka kí ḿbə́ŋé na yê, ń ka məŋé nji ń yimá.

¹⁴Yê a tóŋe ə̂m otóŋé ekpatə́m onobhá-eji obhê. A yîm ə̂m fə́ne n kî ḿbə́ŋé m fôn okot ka ekpin ejámé na Jisos Krayis.

¹⁵Ńgyê mfoné nchot nnyi áfúbhí cháŋ ka etím. Nne a fonê ka ekamám se a ri ka etʉri. Jisos Krayis a bháe ka ngun a bhá yim se ayimá-obhí á sém. Mme nâ mfoné-mfoné nyima-obhí nnyo n kə́re okə́t.

¹⁶Ka echî njí nâ é yími kən Obhasi a kí ri ə̂m nsôn. Echî aŋ? Se Jisos a kó ə̂m, mme nnyo n yimî obhí n chíŋi ochíŋ, a tóŋé ane se okə́bhá-ḿbə́ŋé obhê ntə̂m cháŋ. Ńji tîk é jóe noŋ eriŋ mbâ ane chénchén mba tîk á kî ḿbə́ŋé na yê á fôn ekpin ótúm-ótúm.

¹⁷Deê ekûp na ejík é jóe ka nyâ na nyâ mbâ ekpatə́m í Ntûfâm nnyo a ri ta ótúm-ótúm, á bhó kpo, kən nne nnyo a kí yen yê cháŋ. Obhasi yê átíŋ kpót. Áno.

¹⁸Mmon omé, Timoti, ḿ maghe ebhín njí ka obhô obhâ. M maghê ka ekpak akará-otîp Obhasi á chóre ta ka ebhú áji á kpê na we. Echî é rî sê ó top nchot ábho, tîk o mə́ŋe onok enok etûm Obhasi.

¹⁹Ka mághe ḿbə́ŋé ekíím na Jisos Krayis, joê na ḿbə́ŋé eya jáé. Etʉ̂ ane á ká top ekpak njí. Ka obhô mbí, okíghá-ḿbə́ŋé ábho ó gye ka etə́m.

²⁰Etʉ̂ ane ntʉ́ghi mbá a ri Imenayus na Areksanda. Ń nyaŋe fə́ne ábho obhô, ń kare Satan. Ńji tîk é kpî ábho aron, á kâ kpô chot obhí á kpek na Obhasi.