Read ejagham 1 Timoti, echî 3 Bible Online

1 Timoti, echî 3 - ejagham bible

1 Timoti, echî 3

¹Ńgyê mfoné nchot nná. Ájoé nne á woma a joé nne-echî ka echəme atóbhá Jisos, deê a məŋé se a ri mfoné-mfoné ekpatə́m etûm áno.

²Kən nne a joé nne-echî, a ri a joé nne nnyo ekpin ejê é ká fon kpe akôp. Deê a kâ kô nkáé a chíŋi yót. A ri a joé nne nnyo a fonê ekpin í nyamḿ, a fik biji, a kók ebhú kən a yimá ejûm, a fik fə́ne ajéné. A ri a kpí ane achot Obhasi nono.

³A kâ gwô aməm kpe-eji, a kâ jóe mfúbha-ḿbə́ŋé. Deê a joé nnobha-eji, a kâ fíri áfírí, a kâ kô ntí se ḿ faŋ ń chiŋ ochíŋ.

⁴A ri a joé nne nnyo á fik ndə́p-i-njû eye nono, a kpík abhon á kúí á jíghí yê.

⁵Ó ka məŋé noŋ o kí fi eya ndə́p-i-njû, o kí yim nan ó fíi echəme ane Obhasi?

⁶Deê nne nnyo a kí joé nne-echî a kâ jóe nne nnyo a gyée ka echəme atóbhá Jisos mfê-mfê a kâ bhâ oyuŋ biji, nkat a kâ bhâ yê echî okpíghí, Obhasi a kpəré yê noŋ a kpə́re Satan.

⁷É nóbhe fə́ne sê nne-echî a joé nne nnyo ane ngun á jígha. Tîk á bhó fon eré, a gbo ka ntám i Satan.

⁸Ka iyîm etat, ane mba á nyáŋa nne-echî ka etûm á rî á jóe ane mba á jígha biji, á kâ jóe ayóŋá-ka-nnyo. Deê á wok aməm mma á bhíghi obhik, á kâ jóe ane mba á wóma ntí ka mbá nnyi bhí.

⁹Á rî á jóe ane mba á fíi esə́n í nchot Obhasi na ḿbə́ŋé ábho jáé.

¹⁰Deê á jóe ane mba á kep á ká yen kpe nchot i mbí yə́t na ábho, kən á kâm sê á bhik enyáŋám nne-echî ka etûm.

¹¹Ka ekpak njí jə́t, akáé ábho á rî á jíghí biji ábho, á kâ gə̂m ane. Á rî á fôn ekpin í nyamḿ nji nne a kí kam na ábho á bhó fon kpe efup.

¹²Nne nnyo á nyaŋa nne-echî ka etûm, ájoé a kí ko nkáé, a kâ chíŋi yót. A ri a joé nne nnyo á fik abhon na ndə́p-i-njû eye nono.

¹³Ane mba á kí nyaŋe nne-echî ka etûm, mba á fíi etûm ábho nono, á kí fon mbiŋ i nyúp ka ochî atem-ane. Á kí yen fə́ne sê ḿbə́ŋé ábho nnyi á kíi na Jisos Krayis a sôn nnyen esonóm.

¹⁴Nji ń seŋa áno osêŋ mbí ń túm, ḿ fon íkíkéré bəre ḿ bá yén wâ ka mkpât ebhú.

¹⁵Kən ń do waghe obhá, deê osêŋ mbí ó tóŋé wâ ka ekpak é fik biji ibhə́ré ka ndə́p-i-njû Obhasi. Ńnyə́ne nâ a ri echəme atóbhá Jisos nji é rî ka obhô mfoné-mfoné Obhasi. Ńnyə́ne nâ á fik mfoné nchot Obhasi noŋ ego njû.

¹⁶Kpe nne nnyo a kí firi se nchot Obhasi owəré á ka joé ekpatə́m ejûm ebhə̂t cháŋ. Mmon Obhasi a bháe ka nne. Obhasi Ebhare Ntʉgantʉ a tóŋe se ekpin ejê é rî ka nnyen-i-mbá. Baénjel á yên yê. Ane á sə́re esə́re ejê ka ngun, á kî ḿbə́ŋé na yê. Obhasi a kô yê a jak ka ekumi otúi obhê.