Read ejagham 1 Timoti, echî 4 Bible Online

1 Timoti, echî 4 - ejagham bible

1 Timoti, echî 4

¹Obhasi Ebhare Ntʉgantʉ a sə́re jáé se ka nsígha-njəm ebhú, etʉ̂ ane tîk á ro kpó ki ḿbə́ŋé na Jisos. Tîk á kpíghi á yugha a ri nchot áfúbhí na okpígha-ejûm mbi ó dʉ̂ mbâ ágbán í Satan.

²Okpígha-ejûm mbí, a ri ane áfúbhí nâ á kí ko ka mbá amoe ábho, á kpik ane. Ane áfúbhí mbá, óbhə́ŋé ábho ó sʉi na ejírim.

³Ábho mba á kí chot sê ebháé ekóóm é rî ka ebhín. Á yim bibhín sê nne a kâ dî édî nji Obhasi a yimî. Kən Obhasi a yimî édî njí se ane mba á kíi ḿbə́ŋé na yê, á mə́ŋe mfoné nchot eye, deê á dí na ekûp.

⁴Echî aŋ? Chénchén nji Obhasi a yimî é nop, kpe édî jə́t nji nne a fonê emaghám cháŋ ka eji ó kup Obhasi kən ó dí ńjə́ne.

⁵Ka nan? Eyum Obhasi na Obhasi egoróm í kí yim édî áji é bhó fon akôp.

⁶Ó yim atem abhon-í-nnyen á mə́ŋe achot mmá chénchén, nâ we a ri mfoné-mfoné nne-etûm i Jisos Krayis. O kí toŋe se o kúá ka nchot Obhasi na nnyen okpígha-ejûm mbi ó tobha ta ka eróghá-ndə́p.

⁷O kâ gyê ka achâk achot áfúbhí. Á ká fon kpe ejûm jə́t á kpê na Obhasi. Gyeê biji ibhâ ó yîm ekpin ka ekpak Obhasi a wóme. Egyeém njí é rî noŋ nne á chaghá ache, biji í jóe nono.

⁸Ache echaghám se biji ibhâ í jóe ka osoná-biji, é nop. Kən é nop é chiŋ ka eyimím ejûm se é fôn ekpin ka ekpak Obhasi á woma. Echî aŋ? Ntʉ́ghi oyima-ejûm mbí nâ ó kí fi ekpin ejâ ka mfá-mfá na nsígha-njə̂m ebhú.

⁹Ńgyê mfoné nchot nná. Nne a fonê ka ekamám se a ri ka etʉri.

¹⁰Echî ojuŋi obhə́ré ka nsi nnyí é rî sê é fî ên mfoné-mfoné Obhasi noŋ osoná-ḿbə́ŋé obhə́ré. Yê nâ á yimá ngun ndə́m á sema, títí ane mba á yúŋi ḿbə́ŋé á kî na yê.

¹¹Nâ ejûm nji o ri ó kâk ikom ó kpí ane abhâ.

¹²O kâ kâm se ane á kép wâ fóŋ ka o ri mmonche. Kən deê ó jóe noŋ eriŋ mbâ ane mba á kíi ḿbə́ŋé na Jisos. Joê eriŋ ka nchot i nnyo eya, na oyima-ejûm obhâ, na okot, na ḿbə́ŋé nnyi o kíi na Jisos Krayis. Joê fə́ne eriŋ ka ekpin ejâ, é kâ fôn kpe akôp.

¹³Kən ḿ bá, kak echî, bhiŋâ eyum Obhasi ane á yúk. Deê fə́ne ó sə́ré ábho otîp obhê, o kpík ábho nchot eye.

¹⁴Ó fon ekəp Ebhare Ntʉgantʉ nji á káre wâ ta ebhú akará-otîp Obhasi á chóre á kpê na we, ane-echî ka echəme atóbhá Jisos á kúni wâ abhô ka echî á káre óyôt. O kâ kâm ekəp njí é bhíp ka nsi.

¹⁵Kére achot mmá nono, yim ḿmáne, kpe énê tîk a kô amə̂t a yên noŋ ó jak ochî.

¹⁶Kó ebhú ka kpe jen nji ó yimá, o kpík. Yim ka ekpak njí chénchén ebhú. Ó yim áno, tîk o nyáŋe biji ibhâ na chénchén ane mba á yúgha nchot eya.