Read ejagham 1 Timoti, echî 5 Bible Online

1 Timoti, echî 5 - ejagham bible

1 Timoti, echî 5

¹Nne a kâ nyân nne-nkúí. Gorê yê ogoré noŋ ńsé owa. Fiî abhonche ane-arûm noŋ kpe abhon-í-nnyen abhâ mba ane-arûm.

²Fiî akúí ane-akáé noŋ anyen abhâ, abhonche ane-akáé noŋ abhon-í-nnyen abhâ mba ane-akáé. Deê ekpin ejə́né na ábho é kâ fôn kpe akôp.

³Tóŋe onobhá-eji mbâ ane-akáé ekə́t mba á ká fon kpe nne nnyo á nyaŋa ábho.

⁴Kən ájoé nne-nkáé ekə́t a fôn kpe abhon, kpe biyábhé-abhon, deê abhon mbá á yîm etûm Obhasi ka ndə́p-i-njû ábho. Ekpak njí nâ á kí fe otʉ̂k ásé ábho na mba ane-akúí. Nâ ekpin nji é gyébha Obhasi ka ḿbə́ŋé.

⁵Kən deê echəme á nyáŋé nne-nkáé ekə́t nnyo á ka fon nne etat nnyo á kebha yê. Echî é rî sê a fî Obhasi noŋ osoná-ḿbə́ŋé obhê, a kə̂t a gorá Obhasi a kará yê atʉ́ na efín se a nyáŋé yê.

⁶Kən nne-nkáé ekə́t nnyo á karé biji ka echâk ekpin, deê a məŋé se ta a kpô, kpe noŋ a ri áno mbít.

⁷Deê ó sə́ré ábho achot mmá, nne a kâ bhâ oyén kpe ejûm ebhí jə́t na ábho.

⁸Kən ájoé nne á ka fi ane abhê, títí mba ndə́p-i-njû eye, nâ a táŋe nchot Obhasi. Ntʉ́ghi nne nnyó a bhîp a chíŋi nne nnyo á ka kí ḿbə́ŋé na Jisos.

⁹Ka bhîŋ nne-nkáé kpe yót se nne-nkáé ekə́t, á nyáŋé yê ájoé á ka chíŋí nsam i nyâ ésá, a kâ jóe nne-nkáé nnyo a kô arûm a yóŋe.

¹⁰A ri a joé nne-nkáé nnyo á mə́ŋe yê sê á yimá ekpin eno, a gyek abhon abhê a tóŋá nnyen-i-mbá, a fik ajéné, a jíghá ane Obhasi ekpatə́m, a nyáŋá ane mba á rî ka oseŋe, a kará biji a yimá chénchén nji é rî nono.

¹¹Abhonche ane-akáé asík nâ o kí bhiŋ se ane-akáé ekə́t, ka ebhú ḿbə́ŋé ábho á yoŋe, á kí kpo ko arûm etat, á mághe etûm í Jisos Krayis nji ábho.

¹²Á yim áno nâ á gbo, ka á ká ki ejûm nji á tími na Obhasi ka eróghá-ndə́p.

¹³Á kí kpi ekpin efín-éfîn esíghím, á gyêk ojû á yoŋa. Nji é bhíbhi mân é chîŋ, á kí gye ka ogəm ane, á kaghá nnyo ka nchot ane, á chorá achot mma á ká bhik kə́n ka echoróm.

¹⁴Ka obhô mbí, kə́n n sə́re bəre ane-akáé ekə́t ntʉ́ghi mbá á chə́bhe njəm á kó arûm etat, á jî abhon, á fî arə́p-ojû ábho. Á yim áno, tîk ane ebhan abhə́ré á bhó fon kpe ebhə̂k á chôt nchot i mbí á kpée na êt.

¹⁵Ń chorá áno, ka ane-akáé ekə́t etat ta á kpighi á chəbhe á tobha Satan.

¹⁶Kən ájoé nne-nkáé a ri nnyo a kíi ḿbə́ŋé na Jisos Krayis, a fôn ane-akáé ekə́t ka ndə́p-i-njû eye, ntʉ́ghi nne-nkáé nnyó a fôn ka egyeém ane-akáé ekə́t mbá, a kâ mághe se ta echəme atóbhá Jisos á yîm etûm njí. Deê echəme á gyée ane-akáé ekə́t mba á rî átíŋ.

¹⁷Ane-echî mba á yíma etûm ábho nono ka echəme atóbhá Jisos, deê á mə́ŋe sê á fon mkpak orʉrí ébháe, títí ábho mba á kágha biji ka esə́rə́m na ekpíím ane.

¹⁸Echî aŋ? Á séŋe ka osêŋ Obhasi sê, “Ka bhóp nnyo mfoŋ ka ebhú a kí yim etûm ka ebhin.” Á séŋe fə́ne sê, “Deê nyima-etûm a fon ekəp ejê.”

¹⁹Ane á ká fap á sí ábháe, á sí ásá, á sə́re sê nne-echî nnyó a yîm ejûm ebhí njí, ka kó se ka etʉri.

²⁰Fáme ayimá-obhí jáé ka obhí ábho, tîk nne etat a fûp, á bhó kpo yim obhí nchane.

²¹Ka ochî Obhasi na Jisos Krayis na baénjel mba yê a sáŋe, n kí goré wâ bəre ó fî ka achot mmá na ḿbə́ŋé eya jáé, o kâ kêp kpe nne ka ochî, kpe ka jen nji o kí yim.

²²O kâ rə̂m orəm ó kó kpe énê-énê se a yim etûm í Ńtâ Obhasi. O kâ chə̂m ekap ka obhí ane etat. Kî biji ibhâ nono, akôp o kâ fôn.

²³Ó məŋe se ó kət emaŋé-émáŋe. Ka obhô mbí, ka kə́t o wók ayép ḿmáne-mmanê. Wógha mkpât aməm a yim etûm ka oya obhâ na édî nji ó dik. A kí nyaŋe wâ fə́ne na bimaŋé ibhâ.

²⁴Obhí ane etat ó tóŋa jáé, ó kí ji fə́ne mbá-ochî ka ofú Obhasi a kí taŋ ngun. Kən obhí etʉ̂ ane á kpó to á yén, ta ebhú é chiŋ.

²⁵Ka ekpak njí jə́t, nnyen erû é tóŋa áno jáé, kpe nji é bhó toŋe jáé, é bhó kət a ri ka ebhə̂t.