Read ejagham 1 Timoti, echî 6 Bible Online

1 Timoti, echî 6 - ejagham bible

1 Timoti, echî 6

¹Ane chénchén mba á rî ka osʉ́ŋ, á rî á káre ejík kpe ntə̂m cháŋ mbâ ásé ábho. Echî aŋ? Ane á kâ bhâ ochíŋ á chôt ejûm ebhí kpe jə́t é bháŋé na mbiŋ Obhasi na okpígha-ejûm obhə́ré.

²Kpe mba ásé ábho á kíi ḿbə́ŋé na Jisos, deê á kâ kô ábho á chághe ache, ka ábho á chəbhe atem-abhon-í-nnyen. Deê á káre mân ásé ábho ejík é chíŋí ochíŋ, ka ane mba á kí fon orʉrí ka etûm ábho a ri atem-abhon-í-nnyen mba á kóre. Nâ iyîm mbi o kí kpi ábho, o chóá ábho á yîm fə́ne ka ekpak njí.

³Ane á rî mba á kpîk achot áfúbhí, á bhó kpighâ mfoné okpígha-ejûm mbi Ntûfâm owəré Jisos Krayis. Á bhó kpi fə́ne mfoné nchot nnyi Obhasi.

⁴Nâ ane mba á ká məŋé kpe ejûm, nkat a bhíbhi ábho echî. Á fóne íkíkéré ibhí mfi se ábho á kə́t á fira achâk áfírí, á bhəbha énə́mé bibhə̂p. Chénchén njí é bhâk na okígha-ntem amə̂t na achât na atû. É bhâk fə́ne na íkíkéré ibhí mfi se ńnyô nâ a yimî ńjî na ńji.

⁵É bhâk fə́ne na áfírí chénchén ebhú. Ntʉ́ghi ane mbá, óbhə́ŋé ábho ó bhip, á ká kpo məŋé mfoné nchot Obhasi. Á kéra sê a ri ka nchot Obhasi nâ á kí fon ntí.

⁶Kən ekpin nji Obhasi a wóme é kára ekpatə́m efaŋ mbâ kpe énê nnyo nji-nji a fonê, é kí bhik yê.

⁷Echî aŋ? Nji á jíi êt ka nsi nnyí, é ka bhá kpe na ejûm, é bhó ko fə́ne kpe jə́t é chə́bhe njəm.

⁸Ájoé e kí fonâ édî ejə́ré e dík, e foná ḿfô eyəré e kaghá, deê iyîm mbí í bhîk êt.

⁹Kpe énê nnyo á woma se yê a gbo efaŋ, á bhó yuŋi egaé egboóm. A kí gbo ka ntám íkíkéré ibhí mfi í chóa nne í kaghá ka ekʉ̂.

¹⁰Echî aŋ? Ekot í ntí a ri eróghá-ndə́p mkpak obhí chénchén. Ka ekot í ntí, etʉ̂ ane etî-etî á maghe nchot Obhasi, á chəbhe á kará biji ábho onyʉghá-ḿbə́ŋé.

¹¹We, ka nne nnyo o karê biji mbâ Obhasi, ka kâk biji ibhâ ka iyîm í nsi mbí. Nok yim ekpin ka nnyen-i-mbá, fon ekpin ka ekpak Obhasi á woma. Nok ḿbə́ŋé eya nnyi o kíi na Jisos na okot obhâ í sôn í chíŋ. Kə̂p ḿbə́ŋé, ekpin í nyamḿ é nop é chiŋ.

¹²Nok énoê enok ka nchot i Jisos nnyi o kamê, ó fôn érûm nji é kí karé wâ ekpin nji ótúm-ótúm. A ri ekpin njí nâ Obhasi a bhiŋî wâ ka ebhú áji. Nâ ebhú o sə́re jáé se o kamê na Jisos, ane etî-etî á gyími wâ ntî-isê.

¹³Ka ochî Obhasi, nnyo a ri nâ echî ekpin, na ka ochî Jisos Krayis, nnyo a chorê noŋ ntî-isê mfoné nchot Obhasi ka ochî Pontus Piratus, n kí karé wâ etûm.

¹⁴Etûm í nchane a ri jen? Yim chénchén nji o yúghi, o kâ mághe kpe jə́t, o kâ gbô, ta ofú ó sî mbi Ntûfâm owəré Jisos Krayis a kə́ bha.

¹⁵Yê nnyo Obhasi a kí toŋe nji ebhú é bhik. Obhasi nnyo a ri yê átíŋ, Ntûfâm enare, ekpatə́m í Ntûfâm nnyo a chíŋi atem chénchén, Ntûfâm atúi-ofâm.

¹⁶Yê á bhó kpo, njû eye a fonê ebhát nji ó bhó kep. Yê nnyo nne á ka nok oyén, nne á bhó yen yê fə́ne. Deê ejík na ikom mfi ótúm-ótúm í jóe na yê. Áno.

¹⁷Tʉ ane mba á gbóe efaŋ ka ngun nnyí obhô ka otûŋ se á kâ kêp ane ábho fóŋ. Á kâ kî ḿbə́ŋé ka ntí, ka ń kí yop ane. Deê á kí ḿbə́ŋé a ri na Obhasi nnyo a kí karé êt chénchén iyîm se é fôn ogyebhá-ḿbə́ŋé.

¹⁸Sə́re ábho á yimá ono. Deê á gbô efaŋ a ri ka ono eyimím. Á kâ sôn obhô, kən á kirá na atem nji á fon na ogyebhá-ḿbə́ŋé.

¹⁹Á kpin ka ekpak njí, tîk á fôn ekpatə́m ejûm nji á kí ki é fíi ekpin ábho ka ngun ochî. Ka ekpak njí, tîk á fôn mân mfoné-mfoné ekpin.

²⁰Timoti, fiî etûm nji á káre wâ nono. Ka chə̂m biji ka achot mma á bhó karé Obhasi ejík na ánə́mé áfírí mma á kéra sê a ri oməŋá-ejûm.

²¹Etʉ̂ ane á kére sê ábho á fon oməŋá-ejûm mbí. Ka obhô mbí, á tan mbá ka nchot Obhasi. Deê Obhasi a tóŋé ên onobhá-eji.