Read ejagham 2 Timoti, echî 1 Bible Online

2 Timoti, echî 1 - ejagham bible

2 Timoti, echî 1

¹Nwet nnyí a dʉ mbâ amé, Pol, nnyo Obhasi a sáŋe ka okot obhê se ń jóe ḿgbán i Jisos Krayis. A túmi ə̂m se ḿ bá sə́ré ane nchot ekpin nji yê a chimî se e kí fon ka ochəma-biji obhə́ré na Jisos Krayis.

²N séŋe n tûm wâ, Timoti, nnyo ó chəbhe mmon okot omé ka achot Obhasi. Deê Obhasi Ńsé owəré na Ntûfâm i Jisos Krayis á tóŋé wâ onobhá-eji, á rî wâ nsôn, á káre wâ fə́ne enare.

³Ka atʉ́ ka efín, n kí tirâ wâ nji ń gorá Obhasi, n kará yê ekûp. Ń tʉgha Obhasi nnyó na ḿbə́ŋé amé jáé noŋ ane-atəm abhámé á tʉ́ghi.

⁴N kí tirâ fə́ne noŋ obhə́bhe obhâ ó síi nsi ka ebhú ḿ maghá wâ. Ka echî njí, n kí wom ḿ kpó yen wâ, ogyebhá-ḿbə́ŋé obhámé ó súí nono.

⁵N kí tirâ ekpak nji o kíi ḿbə́ŋé eya chénchén na Jisos Krayis. Ekpin njí é ráŋe mbá kpá mbâ nnyen-i-nkúí owa Lowis, kən é sî nnyen owa Yunis. Ń kam bəre nâ ekpak í ḿbə́ŋé nchane nnyi o kíi na Jisos.

⁶Nâ ńjə́ne n kí tit wâ mfá-mfá bəre deê ó yîm ekəp nji Obhasi a karê wâ ka ebhú n kunî wâ obhô ka echî é súí é fúk.

⁷Echî aŋ? Ntʉgantʉ nnyo Obhasi a karê êt, á ka joé Ntʉgantʉ nnyo á yimá êt e joá njəm-ńjə̂m, kən a ri Ntʉgantʉ nnyo á kará êt ikom na okot, a yimá êt fə́ne e fik biji.

⁸Nâ mân o kâ bê nsôn bhúghí-bhúghí ka egyímím ntî-isê Ńtâ Jisos. O kâ bê fə́ne nsôn na mme, ka ń gye ókúmí ka echî ejê. Kən deê ó chə̂m na mme, é yén oseŋe ka obhô otîp ogyebhá-ḿbə́ŋé Obhasi, ka ḿbə́ŋé nnyi á kaghá wâ.

⁹Yê nâ a yimî êt e sêm, a sáŋe êt se é jóe ane abhê. É ká joé sê e yimî ejûm eno, kən é dʉ̂ ka ekpak yê a kére. É dʉ̂ fə́ne ka onobhá-eji obhê. Ta a tóŋe êt onobhá-eji mbí ka ekpin í Jisos Krayis kən kpe ngun a róghé.

¹⁰Mfá-mfá a tóŋe ḿbə́ne ka ebháám nji Jisos Krayis a bháe. Jisos Krayis nnyó nâ á yimá êt e sémá. Nji a bháe a sə́re se nchot ekʉ̂ a mân, a tóŋe fə́ne ekpin ótúm-ótúm ka otîp ogyebhá-ḿbə́ŋé obhê.

¹¹Obhasi a sáŋe ə̂m noŋ ḿgbán se ḿ bá sə́ré otîp mbí, ḿ kpí ane nchot eye.

¹²A ri ka obhô mbí nâ ń yena oseŋe mbí fép. Kən kpe nsôn á bhó yim ə̂m, ka ḿ məŋe nne nnyo n yuŋî ḿbə́ŋé n kî na yê. Ḿ məŋe fə́ne bəre otîp obhê mbi a karê ka obhô obhámé se ń sə́ré ane, tîk a fî ḿbə́ne nono ta ofú ábhi ó sî mbi yê a kə́ bha.

¹³Deê ó fíi nnyen achot mma m kpíi wâ nono, á jóe wâ noŋ eriŋ nji o kí top. Ka ikom í Jisos Krayis, deê ó kə́t o korá atem-ane, o kík fə́ne ḿbə́ŋé na yê.

¹⁴Ka ikom Obhasi Ebhare Ntʉgantʉ nnyo a ri êt ka biji, fiî nnyen achot mma á káre wâ.

¹⁵Ó məŋe se ane chénchén ka ebhat Esiya á be á maghe ə̂m, mme átíŋ, kpe na Fayijerus na Emojines.

¹⁶Deê Obhasi a ri nsôn na ndə́p-i-njû Onesiforos, ka yê nâ á kaghá ə̂m ḿbə́ŋé ntə̂m etî-etî. Á ka kó noŋ oyúbhá-echî se n di ka ókúmí.

¹⁷Kən nji a síi Rom, a kô ebhú a wôm ta a yên eji n di.

¹⁸N kí goré bəre deê Ńtâ Obhasi a kam yê a yén noŋ Ńtâ Jisos a kí ri yê nsôn ka ofú mbi á kí taŋ ngun. Ó tʉri oməŋé nono ekpak onyáŋá-ejûm mbi Onesiforos a nyáŋe ə̂m ka eték í Efesus.