Read ejagham 2 Timoti, echî 2 Bible Online

2 Timoti, echî 2 - ejagham bible

2 Timoti, echî 2

¹We, mmon omé ka nchot Obhasi, joê mân na osoná-ḿbə́ŋé ka onobhá-eji mbi ó chəbhe obhə́ré nji é chəm na Jisos Krayis.

²Deê ó kó achot mma o yúghi ə̂m m kpî ka ochî ane etî-etî, sə́ré mbâ ane mba ó ka fon efup na ekpin ábho, mba kə́n á kpî fə́ne ane etat achot mmá.

³Deê ó yén obhâ oseŋe fə́ne noŋ nnyen i nne-enok nnyo Jisos Krayis.

⁴Mfoné-mfoné nne-enok, ka ebhú etûm, á noghá se yê a yim é gyébhe ntûfâm owe ka ḿbə́ŋé, á bhó fon ebhú na achot eték mma tat.

⁵Nne nnyo a bhéná ábhiî, kən á ka tóp ebhín ache ábhiî á bhó fon ekəp érûm.

⁶Nyima-ebhin nnyo a kâk ikom ka etûm nâ á raŋá mbá fə́ne a fôn ekəp ejê ka ebhú efʉ.

⁷Kére nji ń səra wâ nná, ka Ńtâ Jisos tîk a yîm wâ ó tʉ́ri oməŋé echî achot mmá chénchén.

⁸Deê o kâ gyíni Jisos Krayis, eyábhé-mmon í Debhit nnyo a kpóe nná kən a nyə́me. A ri mmon nnyó nâ ń səra ên nná ka otîp ogyebhá-ḿbə́ŋé mbi ḿ kpik.

⁹Ka obhô ḿ kpik otîp ogyebhá-ḿbə́ŋé mbí, n kí yen oseŋe. Á chəbhe á kuma ə̂m noŋ nne ndibhí, kən nne nnyo á kumá esə́re Obhasi cháŋ.

¹⁰Ka obhô mbí, ń kam oseŋe chénchén ka echî ane mba Obhasi a sáŋe bəre Jisos Krayis a yim ábho eróŋ á sém, á fôn fə́ne ekpatə́m énoê ekpin ótúm-ótúm.

¹¹Ńgyê mfoné-mfoné nchot nná. “Ájoé é kpo na yê, e kí fon ekpin fə́ne na yê.

¹²Ájoé e kí kəbhâ ḿbə́ŋé ka oseŋe obhə́ré, tîk e kúmi fə́ne atúi-ofâm noŋ yê. Ájoé é taŋé yê, yê a kí taŋé êt eróŋ.

¹³Kpe êt é yoŋa ayum, yê á bhó yoŋe, ka yê á bhó rirí biji ibhê.”

¹⁴Tirâ ane abhâ nchot nnyí. Ka mbiŋ Obhasi, tʉ ábho fə́ne obhô ka otûŋ se á mághe áfírí ka achâk achot. Áfírí ntʉ́ghi mmá á ká fon echî, á kí bhibhi aron ane mba á kí yuk.

¹⁵Nok Obhasi a kam se we a ri mfoné nyima-etûm nnyo echî é bhó yup wâ ka achot amê, nnyo ó kpik mfoné nchot eye ka ekpak o fonê ka ekpíím.

¹⁶Ka gyé ka achot mma á bhó karé Obhasi ejík. Echî aŋ? Ane mba á kóra ḿmáne á mágha Obhasi á jak nnyi ábho mbá.

¹⁷Okpígha-ejûm ane ntʉ́ghi mbá, mba cháŋ kpít na Obhasi, ó rî noŋ ekpatə́m erôk nji é kí di ngu-biji. Ntʉ́ghi ane mbá á rî ábho ábháe, Imenayus na Firetus.

¹⁸Á maghe mbá mfoné nchot Obhasi, á chəbhe á chara íkíkéré etʉ̂ ane mba á ki ḿbə́ŋé na Obhasi. Á sə́ra ane sê ebhú Obhasi á sʉghá ane ka ekʉ̂ ta é chiŋ.

¹⁹Kən Obhasi á chot, nâ a chôt. Nchot eye a ri noŋ isôk mfi í fíi njû, mməghá cháŋ. Á séŋe ka isôk mfí sê, “Ńtâ Obhasi a mə́ŋe ane abhê.” Sê, “Kpe énê nnyo á səre se yê nne Ńtâ Jisos, a ri a maghé iyîm ibhí eyimím.”

²⁰Ka njû nne nyúp, nsé ń dî ka mkpak ka mkpak. Etʉ̂ a ri afúsan mma á yími na gûl, etʉ̂ na sírbha, etʉ̂ na étí, etʉ̂ na otop. Etʉ̂, təm ofú oyúp ó gbô mbi nná kən á kí ko á yîm édî, kən mmi tat kpe jen á kô á yîm.

²¹Nâ mân nne nnyo á yighí biji ka chénchén achot abhí mmá, a kí joé noŋ isé mfi təm ofú oyúp ó jóe nji nná kən á kô á yîm édî. Mfone a kí saŋ yê a kî ka mkpe se obhô-orûm obhê, ka a bhîk nnyo a kí yim kpe bhaghé etûm eno.

²²Deê achot abhí mma obhóné á mân ka íkíkéré ifâ. Nok ó fôn ekpin ka nnyen-i-mbá. Kî ḿbə́ŋé na Jisos. Fon okot, o joá ka ekone na ane chénchén mba á bhíŋa na ḿbə́ŋé ábho jáé sê Ńtâ Jisos a nyáŋé ábho.

²³Ka gyé ka énə́mé áfírí, mma nne á ka məŋé ejûm. Ó məŋe se áfírí ntʉ́ghi mmá á bhâk na okpóŋe.

²⁴Nne nnyo á to se yê a ri nne-etûm i Ńtâ Jisos, a kâ kpóŋe okpóŋe. A ri a tóŋé onobhá-eji mba chénchén ane. A ri a joé mfoné-mfoné nne-echî ka achot Obhasi, ḿbə́ŋé á bhó fup.

²⁵A kí kəp ḿbə́ŋé a tóŋá ane mba á bhó kam na nchot Obhasi ekpak á gbóe. Ebhú tat Obhasi tîk a káre ábho mbá se á yén obhí ábho á mághe ḿbə́ne, á bhá mə́ŋe mfoné nchot eye.

²⁶Tîk íkíkéré í bhak mân ábho á bê á mághe ntám i Satan. Ntám nnyi a fiî ábho mbôp nnyí, a yimá ábho á tobha chénchén nji Satan a wóme.