Read ejagham 2 Timoti, echî 3 Bible Online

2 Timoti, echî 3 - ejagham bible

2 Timoti, echî 3

¹Kən deê ó yúk ên! Ekpatə́m oseŋe tîk ó jóe ka ntə́ma-ndə́p ofú.

²Ane tîk á nyəma ofî, á korá ntí, á suma obhô-ngaŋ, á yuŋá biji. Tîk á tuk ane, á bhó yuk nchot ásé ábho. Kpe o kəbhê ábho jen, á bhó yubhi, á bhó kot nchot Obhasi.

³Á bhó nyaŋe atem-ane, á bhó ri nne nsôn, á bhíbha obhiŋ atem, á bhó fi biji ábho, á chubhá ochubhí. Ejûm eno á bhó kot.

⁴Á kí joé ane óríghi, a joá echâk-échâk, á fôn ekpatə́m enyaŋe. Á kí kot a ri ekpin eyúp edíím, á mághe Obhasi.

⁵Ó kep ábho ka ochî se á kam nchot Obhasi, kən ikom í nchot nnyí í ká gye ábho ka ḿbə́ŋé. Deê o kâ chə̂m ekát na ane ntʉ́ghi mbá.

⁶Etʉ̂ ábho nâ á nyógha biji ka arə́p-ojû ane, á rirá ánə́mé ane-akáé mba á yim obhí, echî é chəbhe é yubha ábho. Á kət á korá achot abhí ka mkpak ka mkpak.

⁷Ane-akáé mbá á kí daŋ kpe bhaghé ofú sê á mə́ŋe, kən kpe ofú bhə́t á bhó bha oməŋé mfoné nchot Obhasi.

⁸Ka ekpak njí, Jane na Jambre á ká kam na Mosis, nâ noŋ fə́ne ane-arûm mbá á bhó kam na mfoné nchot Obhasi. Íkíkéré cháŋ ábho kpe mkpât, á kí maghé ḿbə́ŋé ekíím na Obhasi.

⁹Kən tîk á bhó ji mbá a râp, ka kpe énê tîk a yên énə́mé ábho ekan-ékân noŋ é fábhe na Jane na Jambre.

¹⁰Kən we ó top nji m kpíi wâ, ó məŋe ekpin ejámé na ejûm nji n wóme ka ngun nnyí. Ó məŋe se n kík ḿbə́ŋé na Obhasi, ḿ bó fup ḿbə́ŋé, ḿ fon okot na atem-ane, n kə́bhá fə́ne ḿbə́ŋé.

¹¹Ó məŋe achot mma á tə́ma ə̂m na oseŋe obhámé. Ó məŋe chénchén nji é fábhe na mme ka nték i Antiyok na Ikoniyam na Litra, ekpatə́m achot mma á tə́ma ə̂m, kən n kə́bhá ḿbə́ŋé. Kən Ńtâ Jisos a yíghi ə̂m ka achot mmá chénchén.

¹²Nâ məŋê mân se kpe énê nnyo a kí wom a fon ekpin Obhasi, ka a chə̂m na Jisos Krayis, achot á rî á tə́m yê.

¹³Kən ane abhí na ane áfúbhí tîk á kə̂t á bhibha á jak ochî, á rirá biji ábho, á rirá ane.

¹⁴Kən deê we ó jî ochî na mfoné nchot Obhasi nnyi á kpíi nná wâ, o kâm na ḿbə́ŋé-a-ḿbə́ŋé. Ó məŋe ane mba á kpíi wâ ńnyə́ne.

¹⁵Ó məŋe se ebhú o ri ta ka obhonche, o mə́ŋe nchot i nwet Obhasi. Achot mmá á séŋe nâ á káre wâ aron o mə́ŋe se nne a kí sem ebhú á ki ḿbə́ŋé na Jisos Krayis.

¹⁶A ri Obhasi nâ a kaghê ane íkíkéré kən á kí seŋ chénchén achot amê. Ḿmáne nâ á kí ko á kpik mfoné nchot eye, á fama ka nji nne á ka məŋé oyim, á toŋa ekpak á yíma nji nne a gbô, á səra ekpak nji nne a kí fon ekpin ka nnyen-i-mbá.

¹⁷Echî é rî sê ane mba á kam mân ka eyimím etûm Obhasi, á kí fon erû nji é kí yim ábho á bhîk ka eyimím kpe bhaghé etûm nji no.