Read ejagham 2 Timoti, echî 4 Bible Online

2 Timoti, echî 4 - ejagham bible

2 Timoti, echî 4

¹Timoti, ka mbiŋ Obhasi na Jisos Krayis nnyo a kə́ bha chénchén ane otáŋ, kpe á kpóe okpó, kpe á rî mbít, n kí karé wâ etûm. Ka ebháám nji a kə́ bha noŋ Ntûfâm, n kí səre wâ bəre,

²sə́re ane nchot Obhasi. Jen sə́re ane, na á gyée wâ ka eték oo, na á kâ gyê oo, kpî ane ńnyə́ne. Yim ábho á mə́ŋe sê á gbo, fáme ábho á mághe achot abhí, kaghâ ábho ḿbə́ŋé. Nji o kí kpi ábho iyîm mbí, kə́bhá ḿbə́ŋé.

³Echî é rî sê ebhú é kə́ bha nji ane á bhó top mfoné-mfoné okpígha-ejûm. Á kí top a ri nji é kóre ábho ka ḿbə́ŋé. Á kí ko ane etî-etî mba á kí kpi ábho iyîm mbi ábho á korá eyúghúm.

⁴Á kí maghé eyúghúm mfoné nchot nnyi kpe áfúbhí cháŋ, á yóŋe á yugha a ri achot áfúbhí éməné.

⁵Kən we, kpe jen nâ é fábhe, o ri ó fî biji ibhâ, kpe ó yena oseŋe nan, kə́p ḿbə́ŋé, sə́re ane otîp ogyebhá-ḿbə́ŋé mbí. Jeghê oyim chénchén etûm nji Obhasi a karê wâ se ó yîm.

⁶Ń səra wâ áno achot mmá chénchén, ka n kí kpo ekʉ̂ ka etûm í Jisos Krayis. Ebhú é si nji n kí maghé ngun nnyí.

⁷Ń nok egaé-ábhiî njí nnyen enoghóm, ḿ bene ta ń si ntə̂m. Ka achot Obhasi, ń top, ń ka chaghé ache.

⁸Mfá-mfá, orʉrí érûm ó kí chik ə̂m. Ńtâ Jisos nnyo á taŋá achot ka nnyen-i-mbá a kî ə̂m orʉrí mbí, ka ekpin ejámé é rî ka nnyen-i-mbá. Tîk a káre ə̂m ḿbə́ne ka ofú mbi yê a kə́ bha. Á bhó karé ə̂m mme átíŋ, kən a kí karé fə́ne ane chénchén mba á chígha mbôp nnyí na ḿbə́ŋé-a-ḿbə́ŋé sê yê a bhá.

⁹Kpe é fóghe nan, nok yén ə̂m, o kâ bhíbhi ebhú.

¹⁰Echî aŋ? Demas a tôp ekot í ngun, a mághe ə̂m, a jî nnyi Tesaronika. Kresen a jî nnyi Garasiya, Tayitus nnyi Damatiya.

¹¹Təm Luk átíŋ nâ a ri na mme. Ebhú o kə́ bha, kó Mak bhák na yê, ka tîk a nyáŋe ə̂m ka etûm.

¹²Techikos ngá, ń tum ágo nnyi Efesus.

¹³Kó fə́ne nkʉ̂ egyʉk amé nnyi m maghê mbâ Kapus ka Trowas. Kó fə́ne osêŋ obhámé bhák, títí mbi agu-onyam ábhi.

¹⁴Ó məŋe Areksanda nnyo ntʉ́gha-nsené ányo a? Ndibhí nnyi a yimî ə̂m áfo oô, a chíŋi obhô. Kən deê Obhasi a fé yê ka ekpak ejûm nji a yimî.

¹⁵We ḿfoné, kó ebhú na yê, ka á ka wóm owóm a yúk nchot Obhasi nnyi é kpik ane.

¹⁶Kpe nne nnyo a gyími njəm amé cháŋ ka ndaŋa-mbá ebhú nji n gyími ka óchâm esup. Chénchén á bê ə̂m. Deê Obhasi a kâ yâm ḿbə́ŋé na nne ábho kpe yót.

¹⁷Kən kpe noŋ á bée ə̂m áno, Ńtâ Obhasi a gyími na mme, a káre ə̂m ikom ń sə́ré esə́re ejê é mân oman, etî-etî ajéné á yúk. Ń sem ka ekʉ̂, kə́n oki ó dî ə̂m.

¹⁸Tîk a yíghi ə̂m fə́ne ka chénchén obhí mbi ane á kéra á kpek na mme. Tîk a kô ə̂m tebhee a jak ka eji ekumi otúi ejê. Deê ejík é jóe é káre yê ka ótúm-ótúm. Áno.

¹⁹N kí tum ekûp mbâ Prisiriya na Akira na mbâ ndə́p-i-njû Onesiforos.

²⁰Eratus a kə́re ka eték í Korin. Ḿ maghe Trofimas ka eték í Miretus, ka a kí maŋé.

²¹Kpe é fóghe nan, nok bhák kən ekok é sí. Eyuburus na Puden na Layinus na Krodiya sê ń kúp. Chénchén atem abhon-í-nnyen mba ngá á kí kup fə́ne.

²²Timoti, deê Ńtâ Jisos a joé na wâ. Deê Obhasi a tóŋé ên chénchén fə́ne onobhá-eji.